ବଲାଙ୍ଗୀର,୩୧ା୭(ବୀରେନ୍ଦ୍ର କୁମାର ଝାଙ୍କର):ବଲାଙ୍ଗୀର ଲୋୟର ସୁକ୍ତେଲ ଜଳଭଣ୍ଡାର ଭିତରୁ ବିସ୍ଥାପିତ ହୋଇନଥିବା କୁମିଆପାଲି ଗାଁର ପ୍ରାୟ ୧୦୦ ପରିବାର ଏବେ ବି ଗାଁରେ ରହିଛନ୍ତି। ବୁଧବାର ରାତିରେ ବନ୍ୟା ପରିସ୍ଥିତି ଯୋଗୁ କୁମିଆପାଲି ଗାଁରେ ସାଂଘାତିକ ପରିସ୍ଥିିତି ସୃଷ୍ଟି ହୋଇଥିଲା। ଜଳଭଣ୍ଡାରର ଜଳସ୍ତର ୨୦୨ ମିଟରକୁ ଛୁଇଁବା ପରେ ଗାଁ ଭିତରେ ଥିବା ପ୍ରେମରାଜ ବରିହାଙ୍କ ଘର ପର୍ଯ୍ୟନ୍ତ ଡ୍ୟାମ ପାଣି ଚାଲି ଆସିଥିଲା। ଫଳରେ ଗାଁ ଲୋକେ ଆତଙ୍କିତ ହୋଇପଡିଥିଲେ। ରାତିରେ ବିଦ୍ୟୁତ୍ ଯୋଗାଣ ବନ୍ଦ ହୋଇଯିବାରୁ ଜଳଘେରରେ ଘୋର ଅନ୍ଧକାର ମଧ୍ୟରେ ଲୋକେ ରହିଥିଲେ। ଅନେକ ଲୋକ ବହୁ କଷ୍ଟରେ ସେମାନଙ୍କର କିଛି ଜିନିଷପତ୍ର ଗାଁର ଉଚ୍ଚସ୍ଥାନକୁ ନେଇଥିଲେ। ଅନ୍ୟ ଜିନିଷପତ୍ର ସବୁ ଡ୍ୟାମ ପାଣିରେ ଭିଜି ଯାଇଥିଲା।
ରାତିରେ ପୋଲିସ ଟିମ୍ ଓ ଅନ୍ୟ କିଛି ଅଧିକାରୀଙ୍କ ଉପସ୍ଥିତିରେ ଏକ ପିକ୍ଅପ୍ ଭ୍ୟାନ୍ରେ ଗାଁ ଲୋକଙ୍କ ପାଇଁ ରନ୍ଧାଖାଦ୍ୟ ଅଣାଯାଇଥିଲା। ପିକ୍ଅପ୍ ଭ୍ୟାନ ଡ୍ରାଇଭର ଜୀବନକୁ ବାଜି ଲଗାଇ ଗାଁ ଲୋକଙ୍କ ପାଇଁ ଖାଦ୍ୟ ଆଣିଥିବା ଲୋକେ କହିଛନ୍ତି। ରାତି ୨ଟା ପରେ ଜଳସ୍ତର ବୃଦ୍ଧି କମିଥିଲା। ତେବେ ଆଜିବି ଗଁାର ଜଳସ୍ତର ବିଶେଷ କମିନାହିଁ। ବର୍ଷା କମିଯିବା ପରେ କୁମିଆପାଲି-କପିଲବାହାଲ ରାସ୍ତା ଉପରେ ଯାଉଥିବା ପାଣି କମିଯାଇଛି। ଗୁରୁବାର ଦିନ ପ୍ରାୟ ଗୋଟାଏରେ ବିଜେଡିର ଏକ ତଥ୍ୟ ଅନୁସନ୍ଧାନକାରୀ ପ୍ରତିନିଧି ମଣ୍ଡଳୀ କୁମିଆପାଲି ଗସ୍ତ କରିଥିଲେ। ଏଥିରେ ଜିଲା ପରିଷଦ ସଭାପତି ଦେବକୀ ସାହୁ, ବଲାଙ୍ଗୀର ସଦର ବ୍ଲକ ଅଧ୍ୟକ୍ଷା ସରିତା ବାଗ, ବିଜେଡି ଲୋଇସିଂହା ବିଧାୟକ ପ୍ରାର୍ଥୀ ନିହାର ବେହେରା, ଯୁବ ବିଜେଡି ଜିଲା ସଭାପତି ଯତୀନ୍ଦ୍ର ପଟେଲ, ପୂର୍ବତନ ଅଧ୍ୟକ୍ଷ ଗୋଲାପ ବାଗ, ଲେଙ୍କା ସାହୁ, ବିଜେଡି ଛାତ୍ରନେତା ସୁମନ ନନ୍ଦ, କୈଲାସ ବରିହା, ପୂର୍ବତନ ସରପଞ୍ଚ ଶେଷ ମହାକୁର ଗାଁରେ ପହଞ୍ଚତ୍ ଆଦିବାସୀମାନଙ୍କ ସହ ଆଲୋଚନା କରିଥିଲେ। ଜିଲା ପରିଷଦ ଅଧ୍ୟକ୍ଷା ସାହୁ କୁମିଆପାଲି ଗାଁ ଲୋକଙ୍କ ବିସ୍ଥାପନ ଦୁଃଖ ଏବଂ ସେମାନଙ୍କ ତ୍ୟାଗ ସମ୍ପର୍କରେ କହିଥିଲେ। ସେମାନଙ୍କ ଦାବିକୁ ବିଜେଡି ସମର୍ଥନ କରୁଛି ବୋଲି କହିଥିଲେ। ବରଗଡ ଜିଲା ଆଦିବାସୀ ସଙ୍ଗଠନ ‘ବାରଭାଇ ବେଣ୍ଟକାର’ର କିଛି ସଦସ୍ୟ ମଧ୍ୟ ଗାଁକୁ ଆସି କୁମିଆପାଲି ଗାଁ ଲୋକଙ୍କ ଦାବିକୁ ସମର୍ଥନ କରିଥିଲେ। ଆଦିବାସୀଙ୍କୁ ନ୍ୟାୟ ପ୍ରଦାନ ନକଲେ ସେମାନେ ଜଗା ଛାଡିବେ ନାହିଁ ବୋଲି କହିଥିଲେ।
କୁମିଆପାଲି ଗାଁକୁ ଆଜି ବଲାଙ୍ଗୀର ଉପଜିଲାପାଳ ଆଲୋକ ପଟେଲ ଯାଇ ସ୍ଥିତି ନିରୀକ୍ଷଣ କରିଥିଲେ। ଏହି ସମୟରେ ଲୋୟର ସୁକ୍ତେଲ ପ୍ରକଳ୍ପ ମୁଖ୍ୟ ନିର୍ମାଣ ଯନ୍ତ୍ରୀ ସୁରେନ୍ଦ୍ର କୁମାର ଭୋଇ, ଅଧୀକ୍ଷଣ ଯନ୍ତ୍ରୀ ଅଜୟ ବେହେରା, ପ୍ରକଳ୍ପ ନିର୍ଦ୍ଦେଶକ ସୁଶୀଳ କୁଅଁର ଓ ଅନ୍ୟମାନେ ଉପସ୍ଥିତ ଥିଲେ। ଗାଁ ଲୋକଙ୍କ ପାଇଁ କପିଲବାହାଲ ମୌଜାରେ ପୁନର୍ବାସ କଲୋନୀ ତିଆରି ହୋଇଛି ଓ ଲୋକେ ସେଠାକୁ ସ୍ଥାନାନ୍ତର ହୁଅନ୍ତୁ ବୋଲି ଅନୁରୋଧ କରିଥିଲେ। ତେବେ ଲୋକେ ସେମାନଙ୍କ ଦାବିରେ ଅଡି ବସିଛନ୍ତି। ଆଜି ଗଁାରେ ଘର ସର୍ଭେ କାର୍ଯ୍ୟ ଓ ୨ଟି ପରିବାରର ଘରଭଙ୍ଗା ହୋଇଥିବା ଜଣାପଡିଛି।
Dharitri – Odisha’s No.1 Odia Daily
