ନୂଆଦିଲ୍ଲୀ,୧୫।୯: କେନ୍ଦ୍ର ଏବଂ ଆସାମ ସରକାର ଗୁରୁବାର ଆସାମର ୮ ଆଦିବାସୀ ଉଗ୍ରପନ୍ଥୀ ସଂଗଠନ ସହ ଶାନ୍ତି ଚୁକ୍ତିନାମାରେ ସ୍ବାକ୍ଷର କରିଛନ୍ତି। ଏହି ତ୍ରିପାକ୍ଷିକ ଚୁକ୍ତିନାମାରେ ସ୍ବାକ୍ଷର କରିଥିବା ଉଗ୍ରପନ୍ଥୀ ସଂଗଠନ ମଧ୍ୟରେ ଅଛନ୍ତି ଅଲ୍ ଆଦିବାସୀ ନ୍ୟାଶନାଲ ଲିବରେଶନ ଆର୍ମି ଆଦିବାସୀ କୋବ୍ରା ମିଲିଟାଣ୍ଟ ଅଫ୍ ଆସାମ, ବିର୍ଶା କମାଣ୍ଡୋ ଫୋର୍ସ, ସାନ୍ତାଳ ଟାଇଗର ଫୋର୍ସ ଏବଂ ଆଦିବାସୀ ପିପୁଲ୍ସ ଆର୍ମି। ଚୁକ୍ତିନାମା ସ୍ବାକ୍ଷର ବେଳେ ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା ଏବଂ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ପ୍ରମୁଖ ଉପସ୍ଥିତ ଥିଲେ। ଏହି ସଂଗଠନଗୁଡ଼ିକ ୨୦୧୨ରୁ ଅସ୍ତ୍ରବିରତି କରିବା ସହ ନିର୍ଦ୍ଦିଷ୍ଟ କ୍ୟାମ୍ପରେ ରହିଆସୁଥିଲେ। ଏହି ରାଜିନାମା ଫଳରେ ଆସାମରେ ଶାନ୍ତି ଓ ସଦ୍ଭାବନାର ଏକ ନୂଆ ଯୁଗ ଆରମ୍ଭ ହେବ ବୋଲି ବିଶ୍ୱଶର୍ମା କହିଛନ୍ତି। କେବଳ ପରେଶ ପରୁଆଙ୍କ ନେତୃତ୍ୱାଧୀନ ଉଲ୍ଫା ଏବଂ କମତାପୁର ଲିବରେଶନ ଅର୍ଗାନାଇଜେଶନକୁ ବାଦ୍ ଦେଲେ ରାଜ୍ୟରେ ସକ୍ରିୟ ଥିବା ଅନ୍ୟ ସମସ୍ତ ବିଦ୍ରୋହୀ ଗୋଷ୍ଠୀ ସରକାରଙ୍କ ସହ ଶାନ୍ତି ଚୁକ୍ତିନାମାରେ ସାମିଲ ହୋଇଛନ୍ତି।
