ଇସଲାମାବାଦ,୨୬।୧୧: ଆସନ୍ତା ବର୍ଷ ପାକିସ୍ତାନରେ ଚାମ୍ପିୟନ୍ସ ଟ୍ରଫି ଆୟୋଜନ ହେବ। ଏହାକୁ ନେଇ ଅନିଶ୍ଚିତତା ଲାଗି ରହିଛି। ଭାରତ ସରକାର ପାକିସ୍ତାନରେ ସୁରକ୍ଷାକୁ ନେଇ ବିପଦ ଦର୍ଶାଇ ଟିମ୍ ଇଣ୍ଡିଆକୁ ପଠାଇବାକୁ ମନା କରିଦେଇଛନ୍ତି। ଅପରପକ୍ଷେ ପାକିସ୍ତାନୀ ବୋର୍ଡ ଟୁର୍ନାମେଣ୍ଟର ହାଇବ୍ରିଡ ମଡେଲର ଆୟୋଜନକୁ ସହମତି ପ୍ରକାଶ କରୁନାହିଁ। ପିସିବି ଅଧ୍ୟକ୍ଷ ମୋହସିନ ନକବି ସୁରକ୍ଷାକୁ ନେଇ ଲଗାତାର ବଡ଼ ବଡ଼ ଦାବି କରୁଛନ୍ତି। ହେଲେ ଏବେ ସେ ପାକିସ୍ତାନୀ ସେନାକୁ ଗୁଳି ମାରିବାକୁ ନିର୍ଦ୍ଦେଶ ଦେଇଛନ୍ତି। ଯେଉଁ କାରଣରୁ ସେ ଏହି ଆଦେଶ ଦେଇଛନ୍ତି, ତାହା ଚକିତ କରିଥିବା ବେଳେ ପାକିସ୍ତାନରେ ଚାମ୍ପିୟନ୍ସ ଟ୍ରଫିର ଆୟୋଜନକୁ ନେଇ ଅଡ଼ୁଆ ବଢ଼ିଛି।
କହିବାକୁ ଗଲେ ବର୍ତ୍ତମାନ ସମୟରେ ପାକିସ୍ତାନର ଆଭ୍ୟନ୍ତରୀଣ ଅବସ୍ଥା ଖରାପ ଅଛି। ପ୍ରାୟ ୩ ମାସ ପରେ ହେବାକୁ ଥିବା ଚାମ୍ପିଅନ୍ସ ଟ୍ରଫି ପୂର୍ବରୁ ପାକିସ୍ତାନରେ ହିଂସା ପରିସ୍ଥିତି ସୃଷ୍ଟି ହୋଇଛି। ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ୍ଙ୍କୁ ଜେଲରୁ ମୁକ୍ତ କରିବାକୁ ନେଇ ତାଙ୍କ ଦଳର ସମର୍ଥକମାନେ ରାଜଧାନୀ ଇସଲାମାବାଦକୁ ଘେରି ରହିଛି, ଏହା ପରେ ସେଠାରେ ସୁରକ୍ଷା କର୍ମୀ ଏବଂ କର୍ମୀଙ୍କ ମଧ୍ୟରେ ହିଂସା ଦେଖିବାକୁ ମିଳିଛି।
ପାକିସ୍ତାନରୁ ଆସୁଥିବା ରିପୋର୍ଟ ମୁତାବକ, ‘ଲକ୍ଡାଉନ୍’ ବିଫଳ ହେବା ପରେ ପାରାମିଲିଟାରୀ ରେଞ୍ଜରମାନେ ବିକ୍ଷୋଭକାରୀଙ୍କ ଉପରେ ଲୁହବୁହା ଗ୍ୟାସ ଏବଂ ରବର ବୁଲେଟ୍ ଚଳାଇଥିଲେ। ଏହାପରେ ବିକ୍ଷୋଭକାରୀମାନେ ସିଧାସଳଖ ସୁରକ୍ଷାବାହିନୀ ଉପରେ ଆକ୍ରମଣ କରିଥିଲେ। ଏଥିରେ ୪ ପାକିସ୍ତାନୀ ରେଞ୍ଜର ନିହତ ହୋଇଥିଲେ। ଏହାପରେ ମୋହସିନ ନାକଭି ବିକ୍ଷୋଭକାରୀଙ୍କ ଗୁଳିର ଜବାବ ଗୁଳିରେ ଦେବାକୁ ଚେତାବନୀ ଦେଇଥିଲେ।କେବଳ ଏତିକି ନୁହେଁ ସେନା ମୁତୟନ ହେବା ପରେ ‘ଶୁଟ୍ ଆଣ୍ଡ ସାଇଟ୍’ ନେଇ ଆଦେଶ ଦେଇଥିଲେ। କହିରଖୁଛୁ ଯେ, ମୋହସିନ ନାକଭି କେବଳ ପିସିବିର ଅଧ୍ୟକ୍ଷ ନୁହନ୍ତି, ସେ ପାକିସ୍ତାନର ଆଭ୍ୟନ୍ତରିଣ (ଗୃହ ମନ୍ତ୍ରୀ) ମଧ୍ୟ ଅଟନ୍ତି।
Grey skies in Islamabad due to shelling and gas 🇵🇰💔
The video is from D Chowk today 🚨
— Farid Khan (@_FaridKhan) November 26, 2024
ତାଜା ପରିସ୍ଥିତି କେବଳ ଯେ ଦେଶ ପାଇଁ ତାହା ନୁହେଁ ପାକିସ୍ତାନ କ୍ରିକେଟ ବୋର୍ଡ ପାଇଁ ଚିନ୍ତାର କାରଣ ପାଲଟିଛି। ଏହାଦ୍ୱାରା ଚାମ୍ପିଅନ୍ସ ଟ୍ରଫି ଆୟୋଜନକୁ ନେଇ ଥିବା ଆଶାକୁ ଝଟ୍କା ଲାଗିଛି। କାରଣ ଟୁର୍ନାମେଣ୍ଟର ଏକ ସ୍ଥାନ ରାଓ୍ବଲପିଣ୍ଡି କ୍ରିକେଟ ଷ୍ଟାଡିୟମ, ରାଜଧାନୀ ଇସଲାମାବାଦଠାରୁ ମାତ୍ର ୧୪-୧୫ କିମି ଦୂରରେ ରହିଛି। ଏମିତିରେ ଆଇସିସି ନଭେମ୍ବର ୨୯ରେ ଟ୍ରଫିକୁ ନେଇ ନିଷ୍ପତ୍ତି ନେବାକୁ ବୈଠକ ଡାକିଛି, ଏଥିରେ ବିସିସିଆଇ ଏବଂ ପିସିବି ବ୍ୟତିତ ଅନ୍ୟ ବୋର୍ଡ ସଦସ୍ୟମାନେ ଉପସ୍ଥିତ ରହିବେ। ଏହି ବୈଠକ ପରେ ଟୁର୍ନାମେଣ୍ଟର କାର୍ଯ୍ୟସୂଚୀ ଉପରେ ଚୂଡାନ୍ତ ନିଷ୍ପତ୍ତି ନିଆଯିବ। ସାମ୍ପ୍ରତିକ ସ୍ଥିତିକୁ ଦେଖିଲେ ହାଇବ୍ରିଡ ମଡେଲ ମଧ୍ୟ ପିସିବି ପାଇଁ ବଡ଼ କଥା ହେବ ବୋଲି କୁହାଯାଉଛି।
