ଦାରିଙ୍ଗବାଡ଼ି,୫ା୧(ଅରୁଣ ସାହୁ): ଯେତିକି ଶୀତ ବୃଦ୍ଧି ପାଉଛି, କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଅଞ୍ଚଳରେ ରହିଥିବା ପର୍ଯ୍ୟଟନକ୍ଷେତ୍ରଗୁଡିକୁ ସେତିକି ପର୍ଯ୍ୟଟକଙ୍କ ସୁଅ ଛୁଟୁଛି। ପର୍ଯ୍ୟଟନକ୍ଷେତ୍ର ମଧ୍ୟରେ ପାଟ୍ଟାବାନ୍ଧା ଜଳପ୍ରପାତ ଅନ୍ୟତମ। ଏହି ଜଳପ୍ରପାତ ଦୁର୍ଗମ ଘାଟି, ପାହାଡ଼ ମଧ୍ୟରେ ରହିଥିଲେ ସୁଦ୍ଧା ପର୍ଯ୍ୟଟକ ଉକ୍ତ ଜଳପ୍ରପାତ ଖୋଜି ସେଠାରେ ପହଞ୍ଚି ଯାଆନ୍ତି ଓ ବଣ ଭୋଜି କରି ମଜା ନେଉଛନ୍ତି। ଉକ୍ତ କିସୁବାଡ଼ି ଗ୍ରାମ ଦେଇ ଯାଇଥିବା ନଦୀ ପ୍ରବାହିତ ହୋଇଥିବାବେଳେ ପାଟ୍ଟାବାନ୍ଧା ନିକଟରେ ବିସ୍ତୀର୍ଣ୍ଣ ପଥରରେ ଏକାଧିକ ଜଳପ୍ରପାତ ସୃଷ୍ଟି ହୋଇ ପର୍ଯ୍ୟଟକଙ୍କ ମନ ମୋହୁଛି। ନୂତନ ବର୍ଷର ପ୍ରଥମ ରବିବାରରେ ଉକ୍ତ ଜଳପ୍ରପାତରେ ପ୍ରବଳ ଭିଡ଼ ଜମିଥିଲା। ପର୍ଯ୍ୟଟକମାନେ ବଣଭୋଜି କରିବା ସହ ଜଳପ୍ରପାତରେ ଗାଧୋଇ ମଜା ଉଠାଇଥିଲେ।
କିଛି ପର୍ଯ୍ୟଟକ କୁହନ୍ତି, ଅନେକ ପଥର, ପାହାଡ଼ ଦେଇ ନଦୀ ପ୍ରବାହିତ ହେଉଛି। କନ୍ଧମାଳ ଜିଲା ଔଷଧୀୟ ବୃକ୍ଷରେ ଭରପୂର ରହିଥିବାରୁ ବୋହିଯାଉଥିବା ପାଣି ଅନେକ ଔଷଧୀୟ ବୃକ୍ଷ ସଂସ୍ପର୍ଶରେ ଆସିଥାଏ। ତେଣୁ ସେଠାରେ ଗାଧୋଇବା ଦ୍ୱାରା ଅନେକ ଫାଇଦା ମିଳିଥାଏ।
ଦାରିଙ୍ଗବାଡ଼ି ବ୍ଲକ ସିଆଙ୍ଗବାଲି ପଞ୍ଚାୟତ କିଶୁବାଡ଼ି ଗ୍ରାମରେ ରହିଛି ପାଟ୍ଟାବାନ୍ଧା ଜଳପ୍ରପାତ। ଏହି ଜଳପ୍ରପାତ କାହିଁ କେଉଁ କାଳରୁ ବହି ଆସୁଥିଲେ ସୁଦ୍ଧା ଦୁର୍ଗମ ପାହାଡ଼ ଦେଇ ପାଦ ଚାଲି ଯିବାକୁ ପଡୁଥିଲା। ଅନୁସୂଚିତ ଜନଜାତି ସମ୍ପ୍ରଦାୟର ଲୋକମାନେ ବସବାସ କରୁଥିବା ବେଳେ ସେହି ଜଳପ୍ରପାତକୁ କେବଳ ଅଞ୍ଚଳବାସୀ ହିଁ ଜାଣିଥିଲେ। ତେବେ ୩ ବର୍ଷ ତଳେ ଏହାକୁ ଲୋକଲୋଚନକୁ ଆଣିବା ପାଇଁ ତତ୍କାଳିନ ବିଧାୟକ ସାଲୁଗା ପ୍ରଧାନଙ୍କ ନିକଟରେ ଅଞ୍ଚଳବାସୀ ଦାବି ଜଣାଇଥିଲେ ଓ ସ୍ଥାନୀୟ ପ୍ରଶାସନ ପକ୍ଷରୁ ଉକ୍ତ ଜଳପ୍ରପାତକୁ ପାହାଡ଼ କାଟି ରାସ୍ତା ସମ୍ପ୍ରସାରଣ କରାଯାଇ ଲୋକାର୍ପଣ କରାଯାଇଥିଲା।
ଏବେ ଏହି ଶୀତ ଦିନରେ ପ୍ରତିଦିନ ଶହ ଶହ ପର୍ଯ୍ୟଟକ ବୁଲିବାକୁ ଆସିବା ସହ ବଣଭୋଜି କରି ପରିବାର, ସାଙ୍ଗସାଥୀଙ୍କ ସହ ମଜା ନିଅନ୍ତି। ତେବେ ଉକ୍ତ ଜଳପ୍ରପାତକୁ ଏବେ ମଧ୍ୟ ପକ୍କା ରାସ୍ତାସମ୍ପ୍ରସାରଣ କରାଯାଇ ନ ଥିବାରୁ ସମସ୍ତ ପ୍ରକାର ଗାଡ଼ି ସେହି ଜଳପ୍ରପାତ ନିକଟରେ ପହଞ୍ଚି ପାରୁନାହିଁ। ଯେଉଁ ସବୁ ଗାଡ଼ି ଯାଉଛି ଏକାଧିକ ଘାଟି ରହିଥିବାରୁ ପର୍ଯ୍ୟଟକମାନେ ବିପଦସଙ୍କୁଳ ଅବସ୍ଥାରେ ସେଠାରେ ପହଞ୍ଚୁଥିବା ନେଇ ଅସନ୍ତୋଷ ବ୍ୟକ୍ତ କରୁଛନ୍ତି।
