କାମାକ୍ଷାନଗର, ୨୪।୮(ଡି.ଏନ.ଏ.) ଢେଙ୍କାନାଳ ଜିଲାର ଆଦିବାସୀବହୁଳ ଦୁର୍ଗମ କାନ୍ତୋଲ ପଞ୍ଚାୟତରେ କମୁନି ଜନନୀ ଯନ୍ତ୍ରଣା। ଗ୍ରାମକୁ ଯିବା ରାସ୍ତାରେ ଏକାଧିକ ପାହାଡ଼ିଆ ନାଳ ସ୍ବାସ୍ଥ୍ୟସେବାରେ ସାଜିଛି ପ୍ରତିବନ୍ଧକ। ଫଳରେ ଜରୁରୀସମୟରେ ସ୍ରୋତପୂର୍ଣ୍ଣ ନାଳ ପାର ହୋଇ ମେଡିକାଲ ଆସିବାକୁ ସଂଘର୍ଷ କରୁଛନ୍ତି ଗର୍ଭବତୀ, ପ୍ରସୂତି। ଶନିବାର ଏଭଳି ଏକ ଘଟଣାର ପୁନରାବୃତ୍ତି ଘଟିଛି ଏକୁଲ ଗ୍ରାମରେ। ପ୍ରସବ ପରେ ଜଣେ ମହିଳା ଏବଂ ନବଜାତ ଶିଶୁଙ୍କୁ ଡାକ୍ତରଖାନା ଆଣିବାରେ ନାହିଁ ନ ଥିବା ସମସ୍ୟା ଭୋଗିଥିଲେ ପରିବାର ସଦସ୍ୟ। ଷ୍ଟ୍ରେଚରରେ ବହୁକଷ୍ଟରେ ପିଛୁଳି ନାଳ ପାର କରାଇବା ପରେ ଏକ ବେସରକାରୀ ଗାଡ଼ିରେ ମା’ ପିଲା ପହଞ୍ଚତ୍ଥିଲେ ଡାକ୍ତରଖାନାରେ। ସକାଳ ୮ଟାରୁ ଆରମ୍ଭ ହୋଇଥିବା ଏହି କସରତ ୬ଘଣ୍ଟା ପରେ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚତ୍ବା ସହ ଶେଷ ହୋଇଥିଲା।
ମିଳିଥିବା ସୂଚନା ଅନୁଯାୟୀ, ଏକୁଲ ଗ୍ରାମର ଆର୍ତ୍ତବନ୍ଧୁ ଦେହୁରୀଙ୍କ ସ୍ତ୍ରୀ ଅହଲ୍ୟା (୨୨)ଙ୍କ ଶନିବାର ସକାଳେ ପ୍ରସବ ବେଦନା ହୋଇଥିଲା। ଯୋଗାଯୋଗ ସମ୍ଭବ ହୋଇ ନ ପାରିବାରୁ ଆମ୍ବୁଲାନ୍ସ ପହଞ୍ଚତ୍ ପାରି ନ ଥିଲା। ଯନ୍ତ୍ରଣାରେ ଛଟପଟ ହୋଇ ଘରେ ହିଁ ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ ଅହଲ୍ୟା। ଅଧିକ ଚିକିତ୍ସା ଲାଗି ପରିବାର ଲୋକେ ଉଭୟଙ୍କୁ କାମାକ୍ଷାନଗର ଡାକ୍ତରଖାନାକୁ ଆଣିବାକୁ ନିଷ୍ପତ୍ତି ନେଇଥିଲେ। ଏଥିଲାଗି ସେମାନେ ଏକ ବେସରକାରୀ ଗାଡ଼ି ସହିତ ଯୋଗାଯୋଗ କରିଥିଲେ। ହେଲେ ପାଣି ଭର୍ତ୍ତି ପିଛୁଳି ନାଳ ଡେଇଁ ନ ପାରି ଗାଡ଼ି ଅଟକି ରହିଥିଲା ଅପରପାର୍ଶ୍ୱରେ। ଅନ୍ୟ ଉପାୟ ନ ଥିବାରୁ ଘର ଲୋକେ ଆଶାଦିଦିଙ୍କ ସହାୟତାରେ ଏକ ଷ୍ଟ୍ରେଚରରେ ମହିଳା, ଶିଶୁକୁ ଧରି ଦେଢ଼କିମି ବାଟ ଚାଲିଚାଲି ଆସିଥିଲେ। ବଡ଼କଷ୍ଟରେ ନାଳ ପାର ହେବା ପରେ ଉକ୍ତ ବେସରକାରୀ ଗାଡ଼ିରେ ମା’ଶିଶୁଙ୍କୁ କାମାକ୍ଷାନଗର ଉପଖଣ୍ଡ ମେଡିକାଲରେ ଭର୍ତ୍ତି କରାଯାଇଥିଲା। ଏ ସଂକ୍ରାନ୍ତରେ ଉପଖଣ୍ଡ ଚିକିତ୍ସା ଅଧିକାରୀ ଡା. ରତ୍ନାକର ସାମଲ କୁହନ୍ତି, ଚିକିତ୍ସା ପରେ ମା’ଶିଶୁ ସୁସ୍ଥ ଅଛନ୍ତି। ରବିବାର ଉଭୟଙ୍କୁ ଘରକୁ ପଠାଇ ଦିଆଯାଇଛି।
ସୂଚନାଯୋଗ୍ୟ, ଦୁର୍ଗମ କାନ୍ତୋଲ, ଏକୁଲ, ସେକୁଲ, କୋଟ ଅଞ୍ଚଳରେ ସବୁଦିନିଆ ସଡ଼କ ନ ଥିବାରୁ ବର୍ଷତମାମ ରୋଗୀମାନେ ଏପରି ସମସ୍ୟା ଭୋଗୁଛନ୍ତି। ସରକାରୀ ଏବଂ ପ୍ରଶାସନିକସ୍ତରରେ ଅନେକ ଯୋଜନା କରାଯାଉଥିଲେ ମଧ୍ୟ ଏହାକୁ କାର୍ଯ୍ୟକାରୀ ହେବାରେ ବିଳମ୍ବ ହେଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।
