ସୁନାବେଡ଼ା, ୬।୫ (ସ୍ବ.ପ୍ର.): କୋରାପୁଟ ଜିଲା ସୁନାବେଡ଼ା ପୌର ପରିଷଦ ଅଞ୍ଚଳରେ କାଗଜପତ୍ରରେ ଚାଲିଛି ସ୍ବାସ୍ଥ୍ୟକେନ୍ଦ୍ର। ୨୦୧୫-୧୬ରେ ୧୭ଲକ୍ଷ ୬୪ହଜାର ଟଙ୍କା ଖର୍ଚ୍ଚ କରି ଏଇଏଫ୍ ମାର୍କେଟ-ହାଉସିଂ ରାସ୍ତା ପାର୍ଶ୍ୱରେ ପୌର ପରିଷଦ ଏକ ମିନି କଲ୍ୟାଣ ମଣ୍ଡପ ନିର୍ମାଣ କରିଥିଲା। ଦୀର୍ଘ ବର୍ଷ ଧରି ଏହା ତାଲା ପଡି ରହିଥିଲା। ପରେ ପୌର ପରିଷଦ ଏଠାରେ ସ୍ବାସ୍ଥ୍ୟ ବିଭାଗକୁ ଏକ ସ୍ବାସ୍ଥ୍ୟ ଓ ଆରୋଗ୍ୟ କେନ୍ଦ୍ର କରିବାକୁ ପ୍ରସ୍ତାବ ଦେଇଥିଲା। ଏହା ହୋଇଥିଲେ ପୁରୁଣା ସୁନାବେଡ଼ା, ଡ୍ରାଇଭର କଲୋନି, ହାଉସିଂ ବୋର୍ଡ, ଗଞ୍ଜାମ କଲୋନି ସହ ଆଖପାଖ ଅଞ୍ଚଳର ଲୋକେ ଉପକୃତ ହୋଇଥାନ୍ତେ। ପୌର ପରିଷଦ ଦୀର୍ଘଦିନ ହେବ ଜିଲା ସ୍ବାସ୍ଥ୍ୟ ବିଭାଗକୁ ମଣ୍ଡପ ହସ୍ତାନ୍ତର କରିଥିଲେ ସୁଦ୍ଧା ଏପର୍ଯ୍ୟନ୍ତ ସ୍ବାସ୍ଥ୍ୟକେନ୍ଦ୍ର ଖୋଲିପାରିନାହିଁ । ଫଳରେ ଲକ୍ଷାଧିକ ଟଙ୍କାରେ ନିର୍ମିିତ ଘର ଏବେ ଭୂତକୋଠି ପାଲଟିଲାଣି। ସ୍ବାସ୍ଥ୍ୟ ବିଭାଗ ପକ୍ଷରୁ ଜ୍ୟୋତି ପ୍ରକାଶ ଗିରି ନାମକ ଜଣେ ଡାକ୍ତର ଏଠାରେ ଡେପୁଟିଶନରେ ରହିଛନ୍ତି। ଏହା କେବଳ କାଗଜ କଲମରେ ସୀମିତ ହୋଇ ରହିଛି। ସେ କେବେ ସ୍ବାସ୍ଥ୍ୟକେନ୍ଦ୍ରକୁ ଆସନ୍ତି ନାହିଁ। ତେବେ ଆଶ୍ଚର୍ଯ୍ୟର କଥା ଯେ, ସ୍ବାସ୍ଥ୍ୟକେନ୍ଦ୍ର ଖୋଲାଯାଇ ନ ଥିବା ବେଳେ ଏଠାରେ ପ୍ରତ୍ୟହ ୨୦ରୁ ଊଦ୍ଧର୍ବ ରୋଗୀ ଚିକିତ୍ସିତ ହେଉଥିବା କାଗଜପତ୍ରରେ ଦର୍ଶାଯାଉଛି। ଏ ସମ୍ପର୍କରେ ମଧ୍ୟ ଜିଲା ମୁଖ୍ୟ ଚିକିତ୍ସା ଅଧିକାରୀ ଅରୁଣ ପାଢ଼ୀଙ୍କ ପାଖରେ କିଛି ଖବର ନାହିଁ। ଏ ବିଷୟରେ ତାଙ୍କୁ ପଚାରିବାରୁ ସେ କହିଛନ୍ତି, ସେଠାରେ ଶୀଘ୍ର ସ୍ବାସ୍ଥ୍ୟକେନ୍ଦ୍ର ଖୋଲାଯାଇ ରୋଗୀ ସେବା ଆରମ୍ଭ ହେବ।
