ବାହାନଗା,୮।୩(ଅରୂପ କୁମାର ଦାସ): ବାଲେଶ୍ୱର ଜିଲା ବାହାନଗା ବ୍ଲକ ୧୬ ନମ୍ବର ଜାତୀୟ ରାଜପଥ ଖନ୍ତାପ ନିକଟରେ ରବିବାର ୨ ଯାତ୍ରୀବାହୀ ବସ୍ ମଧ୍ୟରେ ମର୍ମନ୍ତୁଦ ଦୁର୍ଘଟଣା ଘଟିଛି। ୨ଟି ବସ୍ରେ ୮୦ରୁ ଊଦ୍ଦର୍ବ ଯାତ୍ରୀ ଯାତ୍ରା କରୁଥିବା ବେଳେ ୩୫ଜଣ ଆହତ ହୋଇଥିବା ବେଳେ ୫ଜଣ ଯାତ୍ରୀ ଗୁରୁତର ହୋଇ ଚିକିତ୍ସିତ ହେଉଛନ୍ତି।
ମିଳିଥିବା ସୂଚନା ମୁତାବକ, କୁପାରୀରୁ ବାଲେଶ୍ୱର ଯାଉଥିବା ଆଶୀର୍ବାଦ ନାମକ ଯାତ୍ରୀବାହୀ ବସରୁ ଖନ୍ତାପ ବଜ଼ାର ବସ୍ ଷ୍ଟାଣ୍ଡରେ ଯାତ୍ରୀ ଓହ୍ଲାଉ ଥିଲେ। ସେତିକିବେଳେ ପୁରୀରୁ ରାଞ୍ଚି ଅଭିମୁଖେ ଯାଉଥିବା ପାନିକୋଚ ଯାତ୍ରୀବାହୀ ବସ୍ ଭାରସାମ୍ୟ ହରାଇ ବସ୍ ପଛକୁ ଧକ୍କା ଦେଇଥିଲା। ଫଳରେ ୩୫ ଜଣ ଯାତ୍ରୀ ଆହତ ହୋଇଥିବା ବେଳେ ୫ଜଣ ଗୁରୁତର ହୋଇଥିଲେ।
ଖବର ପାଇ ଖନ୍ତାପ ପୋଲିସ ଏବଂ ଅଗ୍ନିଶମବାହିନୀ ସ୍ଥାନୀୟ ଲୋକଙ୍କ ସହ ଆହତମାନଙ୍କୁ ଉଦ୍ଧାର କରି ଖନ୍ତାପ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଆଣିଥିଲେ। ଅଧିକ ଗୁରୁତରଙ୍କୁ ବାଲେଶ୍ୱର ମେଡିକାଲ କଲେଜକୁ ସ୍ଥାନାନ୍ତର କରାଯାଇଛି। ପୋଲିସ ଦୁର୍ଘଟଣା ଘଟାଇଥିବା ବସ୍ ଦ୍ୱୟକୁ ଜବତ କରି ଘଟଣାର ତଦନ୍ତ ଆରମ୍ଭ କରିଛି।
