ନୟାଗଡ ଅଫିସ,୨୦।୮: ବହୁଚର୍ଚ୍ଚିତ ପରୀ ହତ୍ୟାକାଣ୍ଡର ଶୁଣାଣି ଆରମ୍ଭ ହେବା ପାଇଁ ଅତିରିକ୍ତ ଜିଲା ଦୌରାଜଜ୍ ତଥା ଚିଲଡ୍ରେନ୍ କୋର୍ଟର ବିଚାରପତି ଇତିଶ୍ରୀ ମହାପାତ୍ର ଗୁରୁବାର ଚାର୍ଜଫ୍ରେମ କରିଛନ୍ତି। ଆଇପିସି ଦଫା ୩୭୬(ଏ), ୩୭୬(ଏବି), ୩୬୪, ୩୦୨, ୨୦୧, ପୋକ୍ସୋ ଆଇନର ଧାରା ୬କୁ ଆଧାର କରି ସେପ୍ଟେମ୍ବର ୨୦ରୁ ଏହି ଶୁଣାଣି ହେବ। ଏଥିରେ ୭୦ ଜଣ ସାକ୍ଷୀ ଅଛନ୍ତି। ଗୁରୁବାର କଲେଜ ଛାତ୍ରଙ୍କୁ କୋର୍ଟରେ ହାଜର କରାଯାଇଥିଲା ବୋଲି ଆଇନଜୀବୀ ଚନ୍ଦ୍ରବିଜୟୀ ମିଶ୍ର ଓ ସରକାରୀ ଓକିଲ ଅନୱର ମଲ୍ଲିକ କହିଛନ୍ତି। ପ୍ରକାଶ ଯେ, ନୟାଗଡ଼ ସଦର ଥାନା ଯଦୁପୁରରେ ଗତବର୍ଷ ଜୁଲାଇ ୧୪ରେ ୫ବର୍ଷର ଶିଶୁକନ୍ୟା ପରୀ ଗଁାଦାଣ୍ଡରେ ଖେଳୁଥିବାବେଳେ ନିଖୋଜ ହୋଇଥିଲେ। ସେହିମାସ ୨୩ ତାରିଖରେ କିଛି ଖପୁରି ଓ ହାଡ ଜବତ ହୋଇଥିଲା। ଏହି ଘଟଣାରେ ପୋଲିସର ତଦନ୍ତ ସନ୍ଦେହଘେରରେ ରହିବାରୁ ଗତ ନଭେମ୍ବର ୨୪ରେ ପରୀର ମା’ ସୌଦାମିନୀ ସାହୁ ଓ ବାପା ଅଶୋକ ସାହୁ ବିଧାନସଭା ସମ୍ମୁଖରେ ଦେହରେ ନିଅଁା ଲଗାଇ ଆତ୍ମାହୁତି କରିବାକୁ ଚେଷ୍ଟା କରିଥିଲେ। ଏହି ଘଟଣା ରାଜ୍ୟ ରାଜନୀତିରେ ଝଡ଼ ସୃଷ୍ଟି କରିଥିଲା। ପରେ କ୍ରାଇମବ୍ରାଞ୍ଚର ଏସ୍ଆଇଟି ପକ୍ଷରୁ ତଦନ୍ତ କରାଯାଇ ଜଣେ ନାବାଳକ କଲେଜ ଛାତ୍ରଙ୍କୁ ଅଭିଯୁକ୍ତ ଦର୍ଶାଇ କୋର୍ଟରେ ହାଜର କରାଯାଇଥିଲା। କଲେଜ ଛାତ୍ର ବାଳ ସୁଧାର ଗୃହରେ ଅଛନ୍ତି। ତେବେ ପରୀ ହତ୍ୟାକାଣ୍ଡର ତଦନ୍ତ ଠିକ୍ କରାଯାଉ ନାହିଁ ବୋଲି ମା’ ବାପା ପ୍ରଶ୍ନ ଉଠାଇଥିଲେ। ଏପରିକି ତଦନ୍ତ ଉପରେ ଅସନ୍ତୋଷ ବ୍ୟକ୍ତ କରି ସିବିଆଇ ତଦନ୍ତ ଦାବିରେ ଗତ ଜାନୁୟାରୀରେ ପରୀର ମା’ ସୁପ୍ରିମ୍କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ରାଜ୍ୟ ସରକାରଙ୍କ ପକ୍ଷରୁ ସତ୍ୟପାଠ ଦାଖଲ କରାଯାଇ ମାମଲାର ସିବିଆଇ ତଦନ୍ତକୁ ବିରୋଧ କରାଯାଇଛି। ଇତିମଧ୍ୟରେ ପରୀ ନିଖୋଜ, ହତ୍ୟା, ବଳାତ୍କାରକୁ ଗତ ଜୁଲାଇ ୧୪ରେ ବର୍ଷେ ପୂରିଯାଇଛି। ପରୀର ମା’ବାପା ନ୍ୟାୟ ପାଇନାହାନ୍ତି।
