ପାରାଦୀପ,୨୯।୧୦(ସ୍ବ.ପ୍ର.): ବହୁ ପ୍ରତୀକ୍ଷିତ ପାରାଦୀପ ବନ୍ଦର ଲେବର ଟ୍ରଷ୍ଟି (ବୋର୍ଡ ସଦସ୍ୟ)ନିର୍ବାଚନ ଶୁକ୍ରବାର ଶେଷ ହୋଇଛି। ଏଥିରେ ପାରାଦୀପ ବନ୍ଦର ମଜ୍ଦୁର ସଂଘ ୧୦୭ ଓ ପାରାଦୀପ ଏରସମା ଶିଳ୍ପାଞ୍ଚଳ ୱାର୍କର୍ସ ୟୁନିୟନ ୭୬ ଖଣ୍ଡ ଭୋଟ ପାଇ ଟ୍ରଷ୍ଟବୋର୍ଡରେ ପ୍ରତିନିଧିତ୍ୱ କରିବାର ସୁଯୋଗ ପାଇଛନ୍ତି। ଏହି ଦୁଇ ସଙ୍ଗଠନର ପୂର୍ବ ଘୋଷିତ ଟ୍ରଷ୍ଟି ପ୍ରାର୍ଥୀ ଶ୍ରୀକାନ୍ତ ରାୟ ଓ ସୁନୀଲକାନ୍ତ ଦାସ ବୋର୍ଡକୁ ଯିବା ଏକପ୍ରକାର ନିଶ୍ଚିତ ହୋଇଛି। ସମୁଦାୟ ୩୯୧ ଭୋଟର ମଧ୍ୟରୁ ୩୮୨ ମତଦାନ କରିଥିଲେ। ଅନ୍ୟ ଶ୍ରମିକ ୟୁନିୟନକୁ ମିଳିଥିବା ଭୋଟ୍ଗୁଡିକ ହେଲା ବି.ଆର. ଆମ୍ବେଡ଼କର ୱାର୍କର୍ସ ୟୁନିୟନ ୩୭, ପାରାଦୀପ ବନ୍ଦର ଶ୍ରମିକ ୟୁନିୟନ ୪୩, ପୋର୍ଟଡକ ଆଣ୍ଡ କନଷ୍ଟ୍ରକସନ ୱାର୍କର୍ସ ୟୁନିୟନ ୩, ପୋର୍ଟ ଶ୍ରମିକ ସଂଘ ୯, ପୋର୍ଟ ୱାର୍କର୍ସ ୟୁନିୟନ ୫୫ ଏବଂ ଉତ୍କଳ ପୋର୍ଟ ଆଣ୍ଡ ଡକ ୱାର୍କର୍ସ ୟୁନିୟନ ୫୧ଖଣ୍ଡ ଭୋଟ ପାଇଛନ୍ତି। ଗୋଟିଏ ଭୋଟ ନାକଚ ହୋଇଛି ବୋଲି ନିର୍ବାଚନ ଅଧିକାରୀ ଘୋଷଣା ପତ୍ରରେ ଦର୍ଶାଇଛନ୍ତି। ସମ୍ପଦ ବିଭାଗ କାର୍ଯ୍ୟାଳୟ ଓ ୪ ନଂ. ଗେଟ ପାଖରେ ଏନେଇ ୨ ବୁଥ୍ ହୋଇଥିଲା। ସେଠାରେ ମତଦାନ ହୋଇଥିଲା।
ପ୍ରଥମ ଓ ଦ୍ୱିତୀୟ ସର୍ବାଧିକ ଭୋଟ ପାଇଥିବା ଦୁଇ ୟୁନିୟନ ମଧ୍ୟରେ ଗତ ସପ୍ତାହରେ ନିର୍ବାଚନ ପ୍ରଚାରକୁ ନେଇ ଗଣ୍ଡଗୋଳ ହୋଇଥିଲା। ପାରାଦୀପ ବନ୍ଦର ମଜ୍ଦୁର ସଂଘର ସଭାପତି ହେଲେ ରାକେଶ ପଟ୍ଟନାୟକ (ରାକା)। ପାରାଦୀପ ଏରସମା ଶିଳ୍ପାଞ୍ଚଳ ୱାର୍କର୍ସ ୟୁନିୟନ ସଭାପତି ହେଲେ ଅରିନ୍ଦମ ସର୍ଖେଲ (ବାପି)। ନିର୍ବାଚନ ଜିତିବା ପରେ ପ୍ରଥମ ସ୍ଥାନ ପାଇଥିବା ୟୁନିୟନର ସଭାପତି ପଟ୍ଟନାୟକ କୁହନ୍ତି, ଆମ ସଙ୍ଗଠନକୁ କର୍ମଚାରୀମାନେ ଅଧିକ ପସନ୍ଦ କରିଥିବାରୁ ଧନ୍ୟବାଦ। ଏହି ସଙ୍ଗଠନ ଶ୍ରମିକ କର୍ମଚାରୀଙ୍କ କଲ୍ୟାଣ ପାଇଁ ଯଥାସାଧ୍ୟ ଉଦ୍ୟମ କରିବ। ସେହିପରି ଦ୍ୱିତୀୟ ସ୍ଥାନ ପାଇଥିବା ୟୁନିୟନ ମୁଖ୍ୟ ସର୍ଖେଲ କୁହନ୍ତି ଆମକୁ ଲଗାତାର ଦ୍ୱିତୀୟ ଥର ସେବା କରିବା ପାଇଁ ସୁଯୋଗ ମିଳିଛି। ବନ୍ଦର ବିକାଶ ସହିତ କର୍ମଚାରୀ ଶ୍ରମିକଙ୍କ ବିକାଶ ମୂଳକ କାମ ଜାରି ରହିବ। ନିର୍ବାଚନ ସମୟରେ ୟୁନିୟନ ଅଦଳବଦଳ କରିଥିବା ପୂର୍ବତନ ଟ୍ରଷ୍ଟି ପରେଶ ମୁର୍ମୁ ଭାଜପା ସମର୍ଥନରେ ପ୍ରତିଦ୍ୱନ୍ଦ୍ୱିତା କରିଥିଲେ ହେଁ ତାଙ୍କୁ ୬ଷ୍ଠ ସ୍ଥାନ ମିଳିଛି। ଏନେଇ ଚର୍ଚ୍ଚା ଜୋର ଧରିଛି।
