ଭୁବନେଶ୍ୱର,୩।୪: ପାରାଦୀପ ପୋର୍ଟ ଅଥରିଟି (ପିପିଏ) ପକ୍ଷରୁ ରବିବାର ବାର୍ଷିକ ଖବରଦାତା ସମ୍ମିଳନୀର ଆୟୋଜନ କରାଯାଇଥିଲା। ଏହି ଅବସରରେ ପାରାଦୀପ ପୋର୍ଟର ଚେୟାରମ୍ୟାନ ପି.ଏଲ. ହାରାନନ୍ଦା ସମ୍ମିଳନୀକୁ ସମ୍ବୋଧିତ କରି କହିଥିଲେ ଯେ କ୍ରମାଗତ ଭାବେ ପାରାଦୀପ ପୋର୍ଟ ଖାଲି ରାଜ୍ୟରେ ନୁହେଁ ଦେଶର ମଧ୍ୟ ଏକ ପ୍ରମୁଖ ବନ୍ଦର ଭାବେ ଉଭା ହୋଇଛି। ଏପରିକି ପ୍ରତି ବର୍ଷ ଅଭିବୃଦ୍ଧି ପଥରେ ପାରାଦୀପ ପୋର୍ଟ ଅଗ୍ରସର ହେଉଛି। ବିଶେଷ କରି ୨୦୨୨-୨୩ ଆର୍ଥିକ ବର୍ଷରେ ପୋର୍ଟ ବ୍ୟାପକ ସଫଳତା ହାସଲ କରିଥିବା ବେଳେ ଆଗାମୀ ଦିନରେ ମଧ୍ୟ ଅନେକ କାର୍ଯ୍ୟ ପୋର୍ଟକୁ ବିଶ୍ୱ ଦରବାରରେ ପରିଚିତ କରାଇବାରେ ବେଶ୍ ସହାୟକ ହେବ ବୋଲି ହାରାନନ୍ଦା ମତପ୍ରକାଶ କରିଛନ୍ତି।
ଏ ସମ୍ପର୍କରେ ହାରାନନ୍ଦା କହିଛନ୍ତି ୨୦୨୨-୨୩ ଆର୍ଥିକ ବର୍ଷରେ ପୋର୍ଟ ମୋଟ ୧୩୫.୩୬ ମିଲିୟନ ମେଟ୍ରିକ ଟନ ପଣ୍ୟ କାରବାର (ଟ୍ରାଫିକ) କରିଛି। ଏପରିକି ଗତବର୍ଷ ଏହି ଅବଧି ମଧ୍ୟରେ ପୋର୍ଟ ୧୧୬.୧୩ ମିଲିୟନ ମେଟ୍ରିକ ଟନ କାରବାର କରିଥିଲା। ଏହି ଆଧାରରେ ପୋର୍ଟ ଗତବର୍ଷ ତୁଳନାରେ ଚଳିତ ବର୍ଷ ମୋଟ ୧୯.୨ ମିଲିୟନ ମେଟ୍ରିକ ଟନର ଅଭିବୃଦ୍ଧି କରିପାରିଛି। ସେହିପରି ଉତ୍ପାଦନ (ବର୍ଥ ପ୍ରଡକ୍ଟଭିଟ)ରେ ବିରଳ ସଫଳତା ହାସଲ କରିଛି। ପୋର୍ଟ ୨୦୨୨-୨୩ ବର୍ଷରେ ୩୧,୦୫୦ ଏମ୍ଟି ଉତ୍ପାଦନ କରିଛି। ପୂର୍ବ ଆର୍ଥିକ ବର୍ଷରେ ପୋର୍ଟ ୨୭,୨୯୫ ଏମଟି ଉତ୍ପାଦନ କରିଥିଲା। ଏପରିକି ବର୍ଷକ ଭିତରେ ୧୩.୭୬% ବୃଦ୍ଧି ଘଟିଛି।
ଉଲ୍ଲେଖଯୋଗ୍ୟ ଯୋଗ୍ୟ ୨୦୨୨-୨୩ରେ ୨୦,୧୨୬ ସଂଖ୍ୟାର ର଼୍ୟାକ ପଞ୍ଜୀକରଣ ହୋଇଥିବା ବେଳେ ପୂର୍ବ ଆର୍ଥିକ ବର୍ଷରୁ ୧୬% ଅଧିକ ବୋଲି କୁହାଯାଉଛି। ସେହିଭଳି ୨୩୯୪ ଜାହାଜ ଆସିଥିବା ବେଳେ ପୂର୍ବଠାରୁ ୧୬% ଅଧିକ ବୋଲି ପୋର୍ଟ ପକ୍ଷରୁ ସୂଚନା ଦିଆଯାଇଛି। ଅପରପକ୍ଷରେ ପୋର୍ଟ ଆସନ୍ତା ବର୍ଷ ଓ ଆଗାମୀ ବର୍ଷରେ ଅନେକ ପ୍ରକଳ୍ପ ଶେଷ କରିବା ସହ ବିଶ୍ୱସ୍ବରୀୟ ପୋର୍ଟରେ ପରିଣତ କରିବା ପାଇଁ ବିଭିନ୍ନ ପଦକ୍ଷେପ ଓ ପ୍ରକଳ୍ପର କାର୍ଯ୍ୟ ହାତକୁ ନିଆଯାଉଛି ବୋଲି ହାରାନନ୍ଦା ବିସ୍ତୃତଭାବେ ଆଲୋକପାତ କରିଥିଲେ। ଅନ୍ୟମାନଙ୍କ ମଧ୍ୟରେ ପୋର୍ଟ ବରିଷ୍ଠ ଅଧିକାରୀ ଡି.ଏନ ସୋନ୍ଧି, ଜି ଏଡିସନ, ଏ.କେ. ବୋଷ, ପି.ଏନ. ଭାଏକର ଏବଂ କ୍ୟାପଟେନ ଏ.ସି ସାହୁ ପ୍ରମୁଖ ଉପସ୍ଥିତ ଥିଲେ।
