ଭୁବନେଶ୍ୱର,(ବ୍ୟୁରୋ)/ ବାରଙ୍ଗ, ୭।୮(ଡି.ଏନ୍.ଏ.) : ରାଜ୍ୟରେ ବନ୍ୟଜନ୍ତୁ ଶିକାର ଓ ଚୋରା ଚାଲାଣ ଦିନକୁ ଦିନ ବଢିଚାଲିଛି। ବନକର୍ମଚାରୀ ଓ ଶିକାରୀଙ୍କ ମଧ୍ୟରେ ମଧୁଚନ୍ଦ୍ରିକା ଯୋଗୁ ବନ୍ୟପ୍ରାଣୀମାନେ ବଡ଼ ବିପଦର ସମ୍ମୁଖୀନ ହେଉଛନ୍ତି। ଏହି ର଼୍ୟାକେଟର ଚେର ଓଡ଼ିଶାର ବିଦେଶକୁ ଲମ୍ବିଥିବାବେଳେ ଭୁବନେଶ୍ୱରରେ ଡିଲ୍ ହେଉଛି। ଗୁରୁବାର କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ( ଏସ୍ଟିଏଫ୍) କଳିଙ୍ଗ ଷ୍ଟୁଡିଓ ଛକ ନିକଟରୁ ଏକ ଜୀବନ ବଜ୍ରକାପ୍ତାକୁ ଉଦ୍ଧାର କରିବା ସହ ସମ୍ପୃକ୍ତ ୩ଜଣଙ୍କୁ ଗିରଫ କରିଛି। ସେମାନେ ହେଲେ କଟକ ଜିଲା ବଡମ୍ବା ଥାନା ଅଞ୍ଚଳର ଚିତ୍ରସେନ ସାହୁ, ଭୁବନେଶ୍ୱର ଖଣ୍ଡଗିରି ଥାନା ପାତ୍ରପଡାର ଖଗେଶ୍ୱର ସାହୁ ଓ ଗଞ୍ଜାମ ଜିଲା ପାଟପୁର ଥାନା କଂସାମାରି ଗ୍ରାମର ଭାଗୀରଥି ବେହେରା। ଏନେଇ ଏସ୍ଟିଏଫ୍ ୱାଇଲ୍ଡ ଲାଇଫ୍ ପ୍ରୋଟେକ୍ସନ ଆକ୍ଟର ବିଭିନ୍ନ ଦଫାରେ ଏକ ମାମଲା (ନଂ.୨୭/୨୧) ରୁଜୁ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି। ଏଥିସହ ଏସ୍ଟିଏଫ୍ ଉଦ୍ଧାର ବଜ୍ରକାପ୍ତାକୁ ଚନ୍ଦକା ଡିଏଫ୍ଓଙ୍କୁ ହସ୍ତାନ୍ତର କରିଛି। ଶୁକ୍ରବାର ଉକ୍ତ ବଜ୍ରକାପ୍ତାକୁ ନନ୍ଦନକାନନ ଡାକ୍ତରଖାନା କ୍ୱାରାଣ୍ଟାଇନରେ ରଖାଯାଇ ସ୍ବାସ୍ଥ୍ୟାବସ୍ଥା ଅନୁଧ୍ୟାନ କରାଯାଉଛି। ସୁସ୍ଥ ହେବାପରେ ତାହାକୁ ସେଠାରେ ରଖାଯିବ କି ଜଙ୍ଗଲରେ ଛଡ଼ାଯିବ ତାହା ସ୍ପଷ୍ଟ ହେବ ବୋଲି ନନ୍ଦନକାନନ କାର୍ଯ୍ୟାଳୟ ପକ୍ଷରୁ କୁହାଯାଇଛି। ତେବେ ଚାଲାଣକାରୀମାନେ ଏହି ବଜ୍ରକାପ୍ତାକୁ କେଉଁଠୁ ଆଣିଲେ, କେତେଦିନ ହେବ ଏପରି ଚୋରା ଚାଲାଣ କରୁଛନ୍ତି ଓ ଚାଲାଣରେ ଆଉ କେଉଁମାନେ ସମ୍ପୃକ୍ତ ଅଛନ୍ତି ତାହା ଜାଣିବାକୁ ଏସ୍ଟିଏଫ୍ ଖୋଳତାଡ ଜାରି ରିଖିଛି।
ସୂଚନା ଅନୁଯାୟୀ, ଗୁରୁବାର ସାରେ ଅଭିଯୁକ୍ତମାନେ ଏକ ବ୍ୟାଗରେ ବଜ୍ରକାପ୍ତାକୁ ଭର୍ତ୍ତି କରି ଚାଲାଣ ଉଦ୍ଦେଶ୍ୟରେ କଳିଙ୍ଗ ଷ୍ଟୁଡିଓ ଛକ ନିକଟରେ ଅପେକ୍ଷା କରିଥିଲେ। ଏନେଇ ବିଶ୍ୱସ୍ତ ସୂତ୍ରରୁ ଜାଣିବା ପରେ ଏସ୍ଟିଏଫ୍ ଟିମ୍ ପୂର୍ବରୁ ସେଠାରେ ଛକି ରହି ସେମାନଙ୍କୁ କାବୁ କରିଥିଲା। ଏସ୍ଟିଏଫ୍ ରିପୋର୍ଟ ଅନୁଯାୟୀ. ଗତ ୧ବର୍ଷରେ ୧୫ ବାଘଛାଲ, ୯ ହାତୀ ଦାନ୍ତ, ୨ ହରିଣ ଛାଲ ଜବତ କରାଯାଇଛି। ଏଥିସହ ୪ଟି ଜୀବନ୍ତ ବଜ୍ରକାପ୍ତା ଉଦ୍ଧାର କରାଯାଇଥିବାବେଳେ ୧୩ କେଜି ବଜ୍ରକାପ୍ତା କାତି ଜବତ ହୋଇଛି। ଏଥିରେ ସମ୍ପୃକ୍ତ ୩୨ ଜଣଙ୍କୁ ଏସ୍ଟିଏଫ୍ ଗିରଫ କରିଛି।
