ନୂଆଦିଲ୍ଲୀ, ୮।୯: ଭାରତ ଚାଇନା ମଧ୍ୟରେ ଏଲ୍ଏସିରେ ଉତ୍ତେଜନା ବଢ଼ି ଚାଲିଛି। ଏପରିସ୍ଥଳେ ଭାରତକୁ ପାକିସ୍ତାନ ହାସ୍ୟାସ୍ପଦ ଧମକ ଦେଇଛି। ପାକିସ୍ତାନ ସୈନ୍ୟ ବାହିନୀ ମୁଖ୍ୟ ଜେନେରାଲ କମର ଜାବେଦ୍ ବାଜଓ୍ବା କହିଛନ୍ତି ଯେ, ଭାରତ ସହିତ ଯୁଦ୍ଧ ପାଇଁ ପାକିସ୍ତାନ ପ୍ରସ୍ତୁତ। ପାକିସ୍ତାନ ପଞ୍ଚମ ପୀଢ଼ିର ହାଇବ୍ରିଡ୍ ଓ୍ବାର ଜିଣିବା ଲାଗି ପ୍ରୟାସ କରିବ ବୋଲି ସେ କହିଛନ୍ତି। ଭାରତ ଆକ୍ରମଣ କଲେ ଏହାର କଡ଼ା ଜବାବ ଦେବାକୁ ପାକିସ୍ତାନ ସକ୍ଷମଥିବା ବାଜଓ୍ବା କହିଛନ୍ତି। ଭାରତ ଲଗାତାର ପାକିସ୍ତାନ ସୈନ୍ୟ ବାହାନୀ ବିରୋଧରେ ଅପବାଦ ପ୍ରଚାର ଜାରି ରଖିଛି। ପାକିସ୍ତାନ ଶହୀଦ୍ ଦିବସ ପାଳନ ଅବସରେ ରାଓ୍ବଲପିଣ୍ଡିରେ ଏକ କାର୍ଯ୍ୟକ୍ରମରେ ଯୋଗଦେଇ ସେ ଭାରତର ନାମ ନ ନେଇ ଏଭଳି କହିଛନ୍ତି। ୨୦୧୯ରେ ବାଲାକୋଟ ସର୍ଜିକାଲ ଷ୍ଟ୍ରାଇକ୍ ପରେ ପାକିସ୍ତାନ କଡ଼ା ଜବାବ ଦେଇଥିବା ସେ କହିଛନ୍ତି। ପାକିସ୍ତାନର ପାଲଟା ଆକ୍ରମଣ ପ୍ରସ୍ତୁତି ନେଇ କାହା ମନରେ କୌଣସି ସନ୍ଦେହ ସୃଷ୍ଟି ହେବା ଅନୁଚିତ ବୋଲି ସେ କହିଛନ୍ତି। ବାଲଚିସ୍ତାନ ଏବଂ ଖାଇବର ପସ୍ତୁନଖ୍ବା ଅଞ୍ଚଳରେ ସ୍ଥାନୀୟ ବାସିନ୍ଦାଙ୍କ ବିରୋଧକୁ ପାକିସ୍ତାନ ସହ୍ୟ କରୁଛି। ଏହାର ସମାଧାନ ପ୍ରକ୍ରିୟା ଜାରି ରହିଥିବା ସେ କହିଛନ୍ତି। ଏଠାରେ ବହୁ ପାକିସ୍ତାନ ସୈନ୍ୟଙ୍କ ମୃତ୍ୟୁ ଘଟିଛି। ଭାରତ ଏଠାରେ ବିଦ୍ରୋହକୁ ସମର୍ଥନ କରୁଛି। ବାଲୁଚିସ୍ତାନର ବିକାଶ ପାଇଁ ଚାଇନା ନିବେଶ କରୁଥିବା ସେ କହିଛନ୍ତି। ଏପରି କହି ପାକିସ୍ତାନ ଚାଇନା ମଧ୍ୟରେ ଜାରି ରହିଥିବା ଭାରତ ବିରୋଧୀ ଷଡ଼ଯନ୍ତ୍ର ସମ୍ପର୍କରେ ବାଜଓ୍ବା ସୂଚନା ଦେଇଥିବା ନେଇ ଚର୍ଚ୍ଚା ହେଉଛି।
