ଇସଲାମାବାଦ,୧୫।୬: ଆରବ ସାଗରରେ ଆସୁଥିବା ସାଇକ୍ଲୋନିକ ଷ୍ଟର୍ମ ‘ବିପର୍ଯ୍ୟୟ’ ଗୁରୁବାର ପାକିସ୍ତାନରେ ବହୁ କ୍ଷତି ଘଟାଇପାରେ ବୋଲି ଅନୁମାନ କରିଛି ପାଣିପାଗ ବିଭାଗ। ଏଭଳି ପରିସ୍ଥିତିରେ ସାରା ବିଶ୍ୱରେ ନ୍ୟୁଜ ଚ୍ୟାନେଲଗୁଡ଼ିକ ଏହି ଖବର ଉପରେ ନଜର ରଖିଛନ୍ତି। ଏହି ସମୟରେ ସୋସିଆଲ ମିଡିଆରେ ଜଣେ ପାକିସ୍ତାନୀ ଖବରଦାତାଙ୍କ ଭିଡିଓ ଖୁବ ଭାଇରାଲ ହେବାରେ ଲାଗିଛି। ଲୋକମାନେ ଏହି ଖବରଦାତାଙ୍କ ଭାଇରାଲ ରିପୋର୍ଟର ଷ୍ଟାଇଲକୁ ଚାନ୍ଦ ନବାବଙ୍କ ସହ ଯୋଡି ଦେଇଛନ୍ତି।
ଭାଇରାଲ ଭିଡିଓରେ ଦେଖିବାକୁ ମଳିଛି ଜଣେ ପାକିସ୍ତାନୀ ଖବରଦାତା ସାଇକ୍ଲୋନ ବିପର୍ଯ୍ୟୟ ଉପରେ ରିପୋର୍ଟ କରୁଛନ୍ତି। ଏହି ରିପୋର୍ଟ ସମୟରେ ସେ ଝଡ଼ ସୃଷ୍ଟି କରିଥିବା ବିପଦ ବିଷୟରେ କହୁଛନ୍ତି।
ଆଶ୍ଚର୍ଯ୍ୟ ସେତେବେଳେ ଲାଗିଲା ଯେତେବେଳେ ଖବରଦାତା ଜଣକ ରିପୋର୍ଟିଂ କରୁ କରୁ ପାଣିକୁ ଡେଇଁ ପଡିଲେ। ତେବେ ପାଣି ଭିତରକୁ ଯିବା ପରେ ମଧ୍ୟ ପାକିସ୍ତାନୀ ଖବରଦାତା ରିପୋର୍ଟିଂବନ୍ଦ କରନ୍ତି ନାହିଁ। ଭାଇରାଲ ଭିଡିଓରେ ଏହା ଦେଖିବାକୁ ମିଳେ ଯେ ସେ ପାଣିରେ ବୁଡ଼ ପକାଇ ଗଭୀରତା ବିଷୟରେ କହୁଛନ୍ତି। ଭାଇରାଲ ଭିଡିଓରେ ସାମ୍ବାଦିକ ତାଙ୍କ ନାମ ଅବଦୁର ରହମାନ ଦେଉଛନ୍ତି।
ସୂଚନାଯୋଗ୍ୟ, ସାଇକ୍ଲୋନିକ ଷ୍ଟର୍ମ ବିଷୟରେ ପାକିସ୍ତାନରେ ମଧ୍ୟ ହାଇ ଆଲର୍ଟ ଜାରି କରାଯାଇଛି। ଏହାକୁ ଦୃଷ୍ଟିରେ ରଖି ସିନ୍ଧ ପ୍ରଦେଶର ହଜାର ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ପାକିସ୍ତାନର ଜଳବାୟୁ ଶକ୍ତି ମନ୍ତ୍ରୀ ଶେରି ରେହମାନ କହିଛନ୍ତି ଯେ ଗୁରୁବାର ଦିନ ସାଇକ୍ଲୋନିକ ଷ୍ଟର୍ମ ବିପର୍ଯ୍ୟୟ ସିନ୍ଧର କେଟି ବନ୍ଦରରେ ଲ୍ୟାଣ୍ଡଫଲ କରିପାରେ।
