ନୂଆଦିଲ୍ଲୀ,୨।୫: ପହଲଗାମରେ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ସମ୍ପର୍କରେ ଆହୁରି ତିକ୍ତତା ଦେଖାଦେଇଛି। ଭାରତ ପାକିସ୍ତାନ ବିରୁଦ୍ଧରେ ଅନେକ କଠୋର ପଦକ୍ଷେପ ନେଇଛି। ଯାହା ଯୋଗୁ ପାକିସ୍ତାନ ଏବେ ଖୁବ ରାଗିଯାଇଛି। ଏବେ ବିଶ୍ୱାସ କରାଯାଉଛି ଯେ ପାକିସ୍ତାନକୁ ଆଉ ଏକ ଝଟକା ଲାଗିପାରେ।
କାରଣ ଅନ୍ତର୍ଜାତୀୟ ମୁଦ୍ରା ପାଣ୍ଠି (IMF)ର କାର୍ଯ୍ୟନିର୍ବାହୀ ବୋର୍ଡର ବୈଠକ ମେ ୯ରେ ଅନୁଷ୍ଠିତ ହେବାକୁ ଯାଉଛି। ଏହି ବୈଠକ ସମୟରେ, ଜଳବାୟୁ ପରିବର୍ତ୍ତନ ମୁକାବିଲା ପାଇଁ ପାକିସ୍ତାନର ୧.୩ ବିଲିୟନ ଡଲାର ଚୁକ୍ତିନାମା ମଧ୍ୟ ସମୀକ୍ଷା କରାଯିବାର ଅଛି। ସେହି ସମୟରେ, ଯଦି ସବୁକିଛି ଠିକ ଠାକ ଚାଲେ, ତେବେ ୭ ବିଲିୟନ ଡଲାରର ବେଲଆଉଟ ପ୍ୟାକେଜ ଉପରେ ମଧ୍ୟ ଏକ ଚୁକ୍ତି ହୋଇପାରେ। ତଥାପି, ଏହା ପୂର୍ବରୁ ଭାରତ IMF ନିକଟରେ ଏକ ସ୍ବତନ୍ତ୍ର ଆବେଦନ କରିଛି।
ସମ୍ବାଦ ସରବରାହ ସଂସ୍ଥା ରଏଟର୍ସ ଏକ ସୂତ୍ରକୁ ଉଦ୍ଧାର କରି କହିଛି ଯେ ଭାରତ ପାକିସ୍ତାନକୁ ଦିଆଯାଇଥିବା ଋଣର ସମୀକ୍ଷା କରିବାକୁ ଅନ୍ତର୍ଜାତୀୟ ମୁଦ୍ରା ପାଣ୍ଠିକୁ କହିଛି। ସୂଚନାଯୋଗ୍ୟ, ପହଲଗାମ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ସମ୍ପର୍କରେ ଉତ୍ତେଜନା ଦେଖାଦେଇଛି। କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ଆତଙ୍କବାଦୀମାନେ ୨୬ ଜଣ ପର୍ଯ୍ୟଟକଙ୍କୁ ହତ୍ୟା କରିଥିଲେ। ତେଣୁ ଏବେ ପାକିସ୍ତାନ ଉପରେ ଭାରତର ମନୋଭାବ ଭଲ ନାହିଁ। ଏମିତି ପରିସ୍ଥିତିରେ IMF ନିକଟରେ ଭାରତ କରିଥିବା ସ୍ବତନ୍ତ୍ର ଅପିଲକୁ ଯଦି ଦେଖାଯିବ ତେବେ ପାକିସ୍ତାନର ଅଡୁଆ ବଢିପାରେ ବୋଲି କୁହାଯାଉଛି।
