ଇସଲାମାବାଦ,୨୪।୫: ପାକିସ୍ତାନ ଏକ ଗୁରୁତର ଜଳ ସଙ୍କଟର ସମ୍ମୁଖୀନ ହେବାକୁ ଯାଉଛି। ଭାରତ ଏପ୍ରିଲ ୨୨ରେ ପହାଲଗାମ ଆତଙ୍କବାଦୀ ଆକ୍ରମଣ ପରେ ଇଣ୍ଡସ ଜଳ ଚୁକ୍ତି (ଇଣ୍ଡସ ଓାଟର୍ସ ଟ୍ରିଟି)କୁ ସ୍ଥଗିତ ରଖିବା ପରେ, ଏବେ ଆଫଗାନିସ୍ତାନ ମଧ୍ୟ ପାକିସ୍ତାନକୁ ନଦୀ ଜଳ ଯୋଗାଣ ବନ୍ଦ କରିବାକୁ ନିଷ୍ପତ୍ତି ନେଇଛି। ଏହି ନିଷ୍ପତ୍ତି ଖୈବର ପାଖତୁନଖୱା ଅଞ୍ଚଳରେ ଗୁରୁତର ସମସ୍ୟା ସୃଷ୍ଟି କରିପାରେ ବୋଲି ଆଶଙ୍କା କରାଯାଉଛି।
ପାକିସ୍ତାନର ପ୍ରାୟ ୮୦ ପ୍ରତିଶତ ପାନୀୟ ଓ ସିଞ୍ଚନ ଜଳ ଇଣ୍ଡସ ବେସିନ ଏବଂ ଅନ୍ୟ ନଦୀଗୁଡ଼ିକରୁ ମିଳିଥାଏ। ଆଫଗାନିସ୍ତାନରୁ କାବୁଲ ନଦୀର ଶାଖା କୁନାର ନଦୀ ଖୈବର ପାଖତୁନଖୱାର କୃଷି ଓ ପାନୀୟ ଜଳ ଆବଶ୍ୟକତା ପୂରଣ କରିଥାଏ। କିନ୍ତୁ ଆଫଗାନିସ୍ତାନ ଏବେ ଏହି ଜଳ ପ୍ରବାହକୁ ଅଟକାଇବାକୁ ଯୋଜନା କରୁଛି, ଯାହା ପାକିସ୍ତାନର କୃଷି, ପାନୀୟ ଜଳ ଓ ବିଦ୍ୟୁତ ଉତ୍ପାଦନ ଉପରେ ଗଭୀର ପ୍ରଭାବ ପକାଇପାରେ।
ଏହି ସଙ୍କଟକୁ ମୁକାବିଲା କରିବା ପାଇଁ ପାକିସ୍ତାନ ସରକାର ପାନୀୟ ଜଳ ଯୋଗାଣ ପାଇଁ ୨୨୫୦୦ କୋଟି ଟଙ୍କା ବ୍ୟୟ କରିବାକୁ ଯୋଜନା କରିଛନ୍ତି। ଏହା ସହିତ ଚୀନ ସରକାରୀ କମ୍ପାନୀ ଚାଇନା ଏନର୍ଜି ଇଞ୍ଜିନିୟରିଂ କର୍ପୋରେସନ ଦ୍ୱାରା ଖୈବର ପାଖତୁନଖୱାରେ ମୋହମଣ୍ଡ ଜଳବିଦ୍ୟୁତ ପ୍ରକଳ୍ପର କାର୍ଯ୍ୟକୁ ତ୍ୱରାନ୍ବିତ କରାଯାଉଛି। ଏହି ବନ୍ଧ ପେଶାୱାରକୁ ଦୈନିକ ୩୦୦ ନିୟୁତ ଗ୍ୟାଲନ ପାନୀୟ ଜଳ ଯୋଗାଇବା ସହ ୮୦୦ ମେଗାୱାଟ ବିଦ୍ୟୁତ ଉତ୍ପାଦନ କରିବ।
ତେବେ, ଏହି ଜଳ ସଙ୍କଟ ପାକିସ୍ତାନର ଅର୍ଥନୀତି ଓ ଜନଜୀବନ ଉପରେ ଗଭୀର ପ୍ରଭାବ ପକାଇପାରେ। ଜଳବାୟୁ ପରିବର୍ତ୍ତନ ଓ ପୂର୍ବରୁ ଥିବା ଜଳ ଅଭାବ ଏହି ସମସ୍ୟାକୁ ଆହୁରି ଜଟିଳ କରୁଛି। ୨୦୨୨ରେ ପାକିସ୍ତାନରେ ଆସିଥିବା ବନ୍ୟା ପରେ ୧୦୦ ଲକ୍ଷରୁ ଅଧିକ ଲୋକ ସୱଚ୍ଛ ପାନୀୟ ଜଳରୁ ବଞ୍ଚିତ ହୋଇଥିଲେ। ବର୍ତ୍ତମାନର ଏହି ନୂଆ ସଙ୍କଟ ଦେଶର ଚାଷ ଓ ଜନସାଧାରଣଙ୍କ ଜୀବନଧାରଣ ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିପାରେ।
