ଇସଲାମବାଦ,୩।୬: ଭାରତ ସହିତ ସମ୍ପର୍କ ସୁଧାରିବାକୁ ଆଶା ରଖିଥିବା ପାକିସ୍ତାନ ଏବେ ଇଟାଲୀ ଆଡକୁ ଦୃଷ୍ଟି ଦେଇଛି। ପାକିସ୍ତାନର ସୂଚନା ଏବଂ ପ୍ରସାରଣ ମନ୍ତ୍ରୀ ଆତାଉଲ୍ଲାହ ତାରାର ଇଟାଲୀକୁ ଏକ ସମ୍ଭାବ୍ୟ ’ଶାନ୍ତି ସ୍ଥାପନକାରୀ’ ଦେଶ ଭାବରେ ବର୍ଣ୍ଣନା କରିଛନ୍ତି। ସେ ଏପରିକି କହିଛନ୍ତି ଯେ ଯଦି ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନି ମଧ୍ୟସ୍ଥତାର ଦାୟିତ୍ୱ ଗ୍ରହଣ କରନ୍ତି, ତେବେ ଭାରତ ଏବଂ ପାକିସ୍ତାନ ମଧ୍ୟରେ ଶାନ୍ତିର ଏକ ସ୍ଥାୟୀ ପଥ ମିଳିପାରିବ। ଇସଲାମାବାଦରେ ଇଟାଲୀର ଜାତୀୟ ଦିବସ ଅବସରରେ ଆୟୋଜିତ ଏକ କାର୍ଯ୍ୟକ୍ରମରେ ସେ ଏହି ବକ୍ତବ୍ୟ ଦେଇଥିଲେ, ଯେଉଁଠାରେ ଦୁଇ ଦେଶ ମଧ୍ୟରେ ସମ୍ପର୍କର ମଜବୁତତା ଉପରେ ମଧ୍ୟ ଗୁରୁତ୍ୱାରୋପ କରାଯାଇଥିଲା।
ତାରାର କହିଛନ୍ତି ଯେ ପାକିସ୍ତାନ ଏବଂ ଇଟାଲୀର 75 ବର୍ଷ ପୁରୁଣା କୂଟନୈତିକ ସମ୍ପର୍କ ରହିଛି, ଯାହା ସମୟ ସହିତ ଆହୁରି ମଜବୁତ ହୋଇଛି। ସେ କହିଛନ୍ତି ଯେ ଆମେ ଇଟାଲୀ ସହିତ ବିଶ୍ୱାସ ଏବଂ ସହଯୋଗ ଉପରେ ଆଧାରିତ ସମ୍ପର୍କକୁ ବାଣିଜ୍ୟ, ନିବେଶ, ସୁରକ୍ଷା, ଶିକ୍ଷା ଏବଂ ପ୍ରବାସ ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ରରେ ଏକ ବହୁମୁଖୀ ସହଭାଗୀତାରେ ପରିଣତ କରିବାକୁ ଚାହୁଁଛୁ।
