ପେଶାଓ୍ବର,୧।୮: ପାକିସ୍ତାନର ଖାଇବର ପଖତୁନ୍ଖ୍ବା ପ୍ରଦେଶରେ ଏକ ରାଜନୈତିକ ଦଳର ସମ୍ମିଳନୀ ବେଳେ ହୋଇଥିବା ଆତ୍ମଘାତୀ ଆକ୍ରମଣରେ ମୃତ୍ୟୁସଂଖ୍ୟା ସୋମବାର ୫୪କୁ ବୃଦ୍ଧି ପାଇଛି। ଆକ୍ରମଣ ପଛରେ ସମ୍ପୃକ୍ତ ବ୍ୟକ୍ତିଙ୍କୁ ଧରିବା ପାଇଁ ପୋଲିସ ପକ୍ଷରୁ ତନାଘନା ଜାରି ରହିଛି। ଆକ୍ରମଣ ପଛରେ ଆତଙ୍କବାଦୀ ସଂଗଠନ ଆଇଏସ୍ ସମ୍ପୃକ୍ତ ଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। ପୂର୍ବରୁ ଆଇଏସ୍ର ସ୍ଥାନୀୟ ଶାଖା ଜେୟୁଆଇ-ଏଫ୍ ଦଳର ନେତାଙ୍କ ଉପରେ ଆକ୍ରମଣ କରିଥିଲା। ରବିବାର ଅପରାହ୍ନରେ ଏହି ଦଳ ପକ୍ଷରୁ ବଜାଉର ଜିଲାର ଖାର୍ଠାରେ ସମ୍ମିଳନୀ ଚାଲିଥିବାବେଳେ ସେଥିରେ ୪୦୦ରୁ ଊର୍ଦ୍ଧ୍ୱ ଦଳୀୟ କର୍ମୀ ଓ ସମର୍ଥକ ଯୋଗ ଦେଇଥିଲେ। ଏହି ସମୟରେ ମଞ୍ଚ ନିକଟରେ ଜଣେ ନିଜକୁ ବିସ୍ଫୋରଣରେ ଉଡ଼ାଇ ଦେଇଥିଲେ।
