ଭୁବନେଶ୍ୱର,୧୪।୪(ବ୍ୟୁରୋ): ନିଜର ୨ ସ୍ତ୍ରୀଙ୍କୁ ଗିଫ୍ଟ ଦେଇ ଖୁସି କରିବାକୁ ଜଣେ ବ୍ୟକ୍ତି ଆପଣାଇଥିଲେ ଅଭିନବ ତରିକା। ଦିନରେ ରଙ୍ଗମିସ୍ତ୍ରି ଭାବେ କାମ କରୁଥିବାବେଳେ ରାତିରେ ଚୋରି କରୁଥିଲେ। ସେଥିପାଇଁ ନିଜ ବ୍ୟାଗରେ ରଙ୍ଗଦେବା ଉପକରଣ ସହ ଝରକା, କବାଟ ସ୍କୃ ଖୋଲିବାକୁ ଯନ୍ତ୍ରପାତି ରଖୁଥିଲେ। ଏଭଳି କାର୍ଯ୍ୟ ସେ ଦୀର୍ଘଦିନ ଚଳାଇଥିବାବେଳେ ମଙ୍ଗଳବାର ଲକ୍ଷ୍ମୀସାଗର ଥାନା ପୋଲିସ ହାତରେ ଧରାପଡ଼ିଛନ୍ତି। ଗିରଫ ଅଭିଯୁକ୍ତ ଜଣକ ହେଉଛନ୍ତି ନୟାଗଡ଼ର ଦିଲ୍ଲୀପ ନାୟକ। ସେ ୨୦୧୬ରୁ କମିଶନରେଟ ପୋଲିସର ମୋଷ୍ଟ ଓ୍ବାଣ୍ଟେଡ୍ ଲିଷ୍ଟରେ ରହିଥିଲେ। ରଙ୍ଗମିସ୍ତ୍ରି ଆଳରେ ଦିଲୀପ ଭୁବନେଶ୍ବରର ବିଭିନ୍ନ ସ୍ଥାନରୁ ଚୋରି କରିବା ସହ ୨୦୨୦ ଅଗଷ୍ଟ ୨୧ରେ ବଡଗଡ ଅଞ୍ଚଳର ଜଣେ ନାବାଳିକାଙ୍କୁ ବଳାତ୍କାର ଉଦ୍ୟମ କରିଥିବା ନେଇ ମଧ୍ୟ ଅଭିଯୋଗ ହୋଇଥିଲା। କିନ୍ତୁ ଏ ନେଇ ତାଙ୍କ ନାମରେ କୌଣସି ଥାନାରେ ମାମଲା ରୁଜୁ ହୋଇ ନ ଥିବା ପୋଲିସ କହିଛି। ଚୋରି ଟଙ୍କାରେ ଦିଲ୍ଲୀପ ମଉଜ କରିବା ସହ ଦୁଇ ସ୍ତ୍ରୀଙ୍କୁ ଲୁଟ୍ ଅଳଙ୍କାର ଗିଫ୍ଟ ଦେଉଥିବା ପୋଲିସ ଜେରାବେଳେ ଜାଣିବାକୁ ପାଇଛି। ଚୋରି ସୁନା ଜିନିଷକୁ ନେଇ ଭୁବନେଶ୍ବର ବାହାରେ ଥିବା ସୁନାଦୋକାନରେ ସେ ବିକ୍ରି କରୁଥିଲେ। ୧୧ଟି ଚୋରି, ବଳାତ୍କାର ମାମଲାରେ ଦିଲ୍ଲୀପଙ୍କୁ ଗିରଫ କରାଯାଇଛି। ତାଙ୍କଠାରୁ ଚୋରି ଗହଣା କିଣିଥିବା ବାଳକାଟୀର ସୁନା ଦୋକାନୀ ସୁଶାନ୍ତ କୁମାର ଜେଠୀଙ୍କୁ ମଧ୍ୟ ଗିରଫ କରାଯାଇଛି ବୋଲି ଭୁବନେଶ୍ବର ଡିସିପି ଉମାଶଙ୍କର ଦାଶ ସୂଚନା ଦେଇଛନ୍ତି। ଦିଲୀପଙ୍କ ଠାରୁ ଏକ କାର୍ (ଓଡି ୦୨ ବିଏଚ୍ ୮୮୨୦), ୩ଟି ବାଇକ, ୬୦ଲକ୍ଷ ଟଙ୍କାର ସୁନା ଅଳଙ୍କାର, ନଗଦ ୪୪ ହଜାର ଟଙ୍କା, ଏସି, ମୋବାଇଲ ଫୋନ ଆଦି ଜବତ କରାଯାଇଛି। ତେବେ ଏହି ଘଟଣାରେ ସମ୍ପୃକ୍ତ ଅନ୍ୟ ଜଣେ ସୁନା ଦୋକାନୀ ନୟାଗଡ ଜିଲା ଚାହାଳିର ସନ୍ତୋଷ ଫେରାର ହୋଇଯାଇଛନ୍ତି।
ସୂଚନା ମୁତାବକ, ଲକ୍ଷ୍ମୀସାଗର ଥାନା ଅନ୍ତର୍ଗତ ମହାଦେବ ନଗର ଲେନ-୫ ଅଞ୍ଚଳରେ ସୁଶାନ୍ତ କୁମାର ମଲ୍ଲିକ ପରିବାର ସହ ଭଡ଼ାଘରେ ରହନ୍ତି। ଗତ ୩ ତାରିଖରେ ସେ ଘରେ ତାଲା ପକାଇ ପରିବାର ସହ ଲିଙ୍ଗରାଜଙ୍କ ଦର୍ଶନ ପାଇଁ ଯାଇଥିଲେ। ରାତି ସାଢେ ୮ଟାରେ ଘରକୁ ଫେରି ଝରକାର ଗ୍ରୀଲ ନ ଥିବା ଦେଖି ଯାଞ୍ଚ କରିଥିଲେ। ଆଲମାରିରେ ଥିବା ସୁନାଗହଣା, ମୋବାଇଲ ଫୋନ ଓ ନଗଦ ୧ଲକ୍ଷ ଟଙ୍କା ଚୋରି ହୋଇଯାଇଥିବା ଦେଖିଥିଲେ। ଏନେଇ ସେ ଥାନାରେ ଏତଲା ଦେଇଥିଲେ। ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଥିଲା। ଏହାପରେ ପୁଣି ଗତ ୧୨ ତାରିଖରେ ଦିଲ୍ଲୀପ ଚୋରି କରିବା ଯୋଜନାରେ ମହାଦେବ ନଗରରେ ଏକ ବ୍ୟାଗ ଧରି ବୁଲୁଥିଲେ। ଏନେଇ ପୋଲିସ ଖବର ପାଇ ତାଙ୍କୁ କାବୁ କରିଥିଲା। ତାଙ୍କ ନିକଟରୁ ଏକ ବାଇକ ଓ ବ୍ୟାଗରୁ ଝରକା, କବାଟର ସ୍କୃ ଖୋଲିବା ଯନ୍ତ୍ରପାତି ମିଳିଥିଲା। ଜେରାବେଳେ ସେ ମହାଦେବ ନଗର ଓ ଗତ ଡିସେମ୍ବର ମାସରେ ବୈରାଗୀ ନଗରରୁ ଚୋରି କରିଥିବା ସ୍ବୀକାର କରିଥିଲେ। ସେହିପରି ବଡଗଡ, ଧଉଳି ଓ ଅନ୍ୟ ଥାନା ଅଞ୍ଚଳରେ ଚୋରି କରିଥିବା କହିଥିଲେ। ଘରେ ୨ସ୍ତ୍ରୀଙ୍କ ନିମନ୍ତେ ରଖିଥିବା ସୁନା ଅଳଙ୍କାରକୁ ପୋଲିସ ଜବତ କରିଛି। ଆଉ କିଛି ସୁନା ଗହଣାକୁ ସନ୍ତୋଷ ଓ ସୁଶାନ୍ତ ମିଶି ବିକିଦେଇଥିବା ପୋଲିସ ଅନୁସନ୍ଧାନରୁ ଜାଣିବାକୁ ପାଇଛି। ଅନ୍ୟପକ୍ଷରେ ଦିଲ୍ଲୀପଙ୍କଠାରୁ ଜବତ ହୋଇଥିବା ୪୪ ହଜାର ଟଙ୍କା ଓ ଏକ ମୋବାଇଲ ଫୋନ୍କୁ ମଙ୍ଗଳବାର ସନ୍ଧ୍ୟାରେ ଅଭିଯୋଗକାରୀ ସୁଶାନ୍ତ କୁମାର ମଲ୍ଲିକଙ୍କୁ ପୋଲିସ ଫେରାଇଛି।
