ଭବାନୀପାଟଣା,୨୭ା୬(ଉତ୍ତମ କୁମାର ଦାଶ): କଳାହାଣ୍ଡିରେ ଗତ ମେ ୨୦ରୁ ରବି ଧାନ ମଣ୍ଡି ଆରମ୍ଭ ହୋଇଥିବାବେଳେ ଏପର୍ଯ୍ୟନ୍ତ ଉକ୍ତ ମାସର ଧାନ ଉଠିପାରିନାହିଁ। ଫଳରେ ଗତ ମାସେ ହେଲା ଚାଷୀ ମଣ୍ଡିରେ ଧାନ ରଖି ଜଗିରହିଛନ୍ତି। ଧାନ କିଣା ମନ୍ଥରତା ଯୋଗୁ ଜିଲାରେ ବିଭିନ୍ନ ମଣ୍ଡିରେ ବର୍ତ୍ତମାନ ହଜାର ହଜାର କୁଇଣ୍ଟାଲ ଧାନ ବିକ୍ରି ନ ହୋଇ ପଡିରହିଛି। ଏପରିସ୍ଥଳେ ମୌସୁମୀ ବର୍ଷା ଆରମ୍ଭ ହୋଇଯାଇଛି। ଯଦି ବର୍ଷାରେ ସେମାନଙ୍କ ଧାନ ଭିଜିଯାଏ ତା’ହେଲେ ବିକ୍ରିଯୋଗ୍ୟ ହୋଇପାରିବ ନାହିଁ ବୋଲି ଚାଷୀମାନେ ଦୁଃଖରେ ପ୍ରକାଶ କରିଛନ୍ତି।
ମିଲରଙ୍କ ମନମାନି ଏବଂ ପ୍ରଶାସନିକ ସ୍ଥାଣୁତା ଚାଷୀର ଆର୍ଥିକ ମେରୁଦଣ୍ଡକୁ ଦୋହଲାଇ ଦେଇଛି। ଏପରିସ୍ଥଳେ ଚାଷୀଙ୍କ ଟୋକନ କଟିଯିବ ଭାବି ଗତ କିଛିଦିନ ତଳେ ପ୍ରଶାସନ ପକ୍ଷରୁ ତରବରିଆ ଭାବେ ଆସନ୍ତା ୩୦ ତାରିଖ ପର୍ଯ୍ୟନ୍ତ ଜିଲାର ସମସ୍ତ ଚାଷୀଙ୍କ ଭେଣ୍ଡର (ଆଖିଦେଖା ମାଧ୍ୟମରେ) କଟାଯାଇଛି। ଏହାଦ୍ବାରା ସରକାରୀ ଭାବେ ଚାଷୀଙ୍କ ଧାନ ଉଠିଥିବାବେଳେ ମଣ୍ଡିରେ କିନ୍ତୁ ବିକ୍ରି ନ ହୋଇ ପଡିରହିଛି। ଜିଲା ଯୋଗାଣ ବିଭାଗ ପକ୍ଷରୁ ମିଳିଥିବା ତଥ୍ୟ ଅନୁଯାୟୀ, ଶୁକ୍ରବାର ସୁଦ୍ଧା ଜିଲାର ୫୦ ହଜାର ୭୫୧ ଜଣ ଚାଷୀ ୩୧ଲକ୍ଷ ୮୮ ହଜାର ୨୪୫ କୁଇଣ୍ଟାଲ ଧାନ ବିକ୍ରି କରିସାରିଛନ୍ତି। କେବଳ ଶୁକ୍ରବାର ଦିନ ୫୯ ଜଣ ଚାଷୀ ମାତ୍ର ୫ ହଜାର ୨୦୭ କୁଇଣ୍ଟାଲ ଧାନ ବିକ୍ରି କରିଛନ୍ତି।
ଗୋଟିଏ ପଟେ ଚାଷୀର ଦୁଃଖ ସରୁ ନ ଥିବାବେଳେ ଅନ୍ୟପଟେ ଏହାକୁ ନେଇ ରାଜନୀତି ସରଗରମ ରହିଛି। ଚାଷୀଙ୍କ ସମସ୍ୟାକୁ ମୁଦ୍ଦା କରି ସରକାର ଏବଂ ବିରୋଧୀଙ୍କ ମଧ୍ୟରେ ଆରୋପ-ପ୍ରତ୍ୟାରୋପ ପର୍ବ ଥମିବାର ନାଁ ନେଉନାହିଁ। ସରକାରଙ୍କ ଏହି ନୀତିକୁ ପିସିସି ସଭାପତି ଭକ୍ତ ଚରଣ ଦାସ ଓ କଳାହାଣ୍ଡି ଜିଲା ବିଜେଡି ସଭାପତି ତଥା ଲାଞ୍ଜିଗଡ ବିଧାୟକ ପ୍ରଦୀପ ଦିଶାରି ତୀବ୍ର ସମାଲୋଚନା କରିଛନ୍ତି। ଆସନ୍ତା ପଞ୍ଚାୟତ ନିର୍ବାଚନରେ ଜନସାଧାରଣ ଏହି ସରକାରଙ୍କୁ ଉଚିତ ଜବାବ ଦେବେ ବୋଲି ଉଭୟେ କହିଛନ୍ତି।
ପିସିସି ସଭାପତି ଦାସ କହିଛନ୍ତି, ସମଗ୍ର ରାଜ୍ୟରେ ମଣ୍ଡି ବ୍ୟବସ୍ଥା ଶିଥିଳ ହୋଇଯାଇଛି। ସରକାର ପ୍ରୋକ୍ୟୁରମେଣ୍ଟ କରିବେ ବୋଲି କହି କରୁନାହାନ୍ତି। ଆଉ ଆମ ଜିଲାରେ ମଧ୍ୟ ସେହି ଅବ୍ୟବସ୍ଥା ଅଛି। ମିଲରଙ୍କ ମିଲରେ ଧାନ ରଖିବା ପାଇଁ ଜାଗା ନାହିଁ। ସରକାରଙ୍କର ଯେଉଁ ନୀତି ରହିଛି ତାହା ତ୍ରୁଟିପୂର୍ଣ୍ଣ। ଚାଷୀଙ୍କ ପାଇଁ ଆମେ ଆନ୍ଦୋଳନ କରୁଛୁ, ଦାବି ମଧ୍ୟ କରୁଛୁ। କଳାହାଣ୍ଡି ଜିଲାରେ ରବି ଧାନ କିଣା ବାଟବଣା ହୋଇଛି। ଶୀଘ୍ର ସମସ୍ତ ଚାଷୀଙ୍କ ଧାନ ଉଠାଯାଉ କହି ସେ ସରକାରଙ୍କ ଉପରେ ବର୍ଷିଛନ୍ତି।
ସେହିପରି ଲାଞ୍ଜିଗଡ଼ ବିଧାୟକ ଦିଶାରୀ କହିଛନ୍ତି,ଏ ସରକାରରେ ଚାଷୀମାନଙ୍କୁ ହଇରାଣ କରାଯାଉଛି। ମଣ୍ଡିରେ ହଜାର ହଜାର କୁଇଣ୍ଟାଲ ଧାନ ରହିଛି। ମିଲର ପାଖରେ ଟାର୍ଗେଟ ନାହିଁ। ଯେଉଁଠି ଟାର୍ଗେଟ ଅଛି, ସେଠି ମଧ୍ୟ ଠିକ ଭାବରେ ଧାନ ଉଠାଣ କରାଯାଉନାହିଁ ବୋଲି କହିଥିଲେ। ଏ ନେଇ ଜିଲା ଯୋଗାଣ ଅଧିକାରୀ ଅଜୟ ମଲ୍ଲିକଙ୍କୁ ପଚାରିବାରୁ ଆସନ୍ତା ୩ ତାରିଖ ସୁଦ୍ଧା ଜିଲାର ସମସ୍ତ ଚାଷୀଙ୍କ ଧାନ ଉଠାଣ କରାଯିବ ବୋଲି କହିଛନ୍ତି।
