ପଦ୍ମପୁର, ୨୨।୧ (ଡି.ଏନ.ଏ.) ଭଦ୍ରକ ଜିଲା ବାସୁଦେବପୁର ବ୍ଲକ ଅଧୀନ ବିଭିନ୍ନ ସମିତି ଓ ସ୍ବୟଂସହାୟକ ଗୋଷ୍ଠୀଠାରୁ ଧାନ ଉଠାଉ ନାହାନ୍ତି ସହବନ୍ଧିତ ମିଲର। ବ୍ଲକର ୨୦ଟି ସେବା ସମବାୟ ସମିତି ଓ ୭ଟି ସ୍ବୟଂ ସହାୟକ ଗୋଷ୍ଠୀ ଚାଷୀମାନଙ୍କଠାରୁ ଧାନ କିଣିବା ପାଇଁ ସହବନ୍ଧିତ ହୋଇଛନ୍ତି। ଚାଷୀମାନଙ୍କୁ ଟୋକନ ପ୍ରଦାନ କରାଯିବା ପରେ ସେମାନେ ଧାନ ଆଣି ବିଭିନ୍ନ ମଣ୍ଡିରେ ପହଞ୍ଚାଇଛନ୍ତି। ହେଲେ ଧାନର ମାନ, କଟ୍ନୀ ଓ ଲୋଡ଼ିଂ ପାଇଁ ଲେବର ଅଭାବ ଦର୍ଶାଇ ମିଲରମାନେ ମଣ୍ଡିରୁ ଧାନ ଉଠାଇ ନାହାନ୍ତି। ବିଭିନ୍ନ ମଣ୍ଡିରେ ୫୦ ହଜାର କୁଇଣ୍ଟାଲରୁ ଊର୍ଦ୍ଧ୍ୱ ଧାନ ଖୋଲା ଆକାଶ ତଳେ ପଡ଼ି ରହିଛି। ସମିତିର ନିଜସ୍ବ ଗୋଦାମ ନ ଥିବା ବେଳେ ଧାନବସ୍ତା ରଖିବାକୁ ଜାଗା ନାହିଁ। ପାଣିପାଗ ବିଭାଗ ସୂଚନା ଅନୁସାରେ ଲଘୁଚାପ ସୃଷ୍ଟି ହୋଇଥିବା ବେଳେ ଶନିବାରଠାରୁ ବର୍ଷା ଆରମ୍ଭ ହୋଇଯିବ। ବର୍ଷା ହେଲେ ବିଲରେ ଗଦା ହୋଇଥିବା ଅମଳ ଧାନ ଓ ମଣ୍ଡିରେ ଥିବା ଧାନ ସବୁ ବର୍ଷାରେ ଭିଜି ନଷ୍ଟ ହୋଇଯିବ। ବର୍ଷାରେ ଓଦା ହେଲେ ଆଉ କୌଣସି ମିଲ୍ ଭିଜିଥିବା ଧାନ ନେବ ନାହିଁ। ଫଳରେ ସମିତି ଓ ଚାଷୀମାନେ ବିଶେଷ ଭାବେ କ୍ଷତିଗ୍ରସ୍ତ ହେବେ ବୋଲି ପ୍ରକାଶ କରିଛନ୍ତି।
ପଦ୍ମପୁର, ଏଡ଼ତାଳ, ସୁଗୋ, ବାଲିମେଦ ସମିତିରେ ୧୦ ହଜାର କୁଇଣ୍ଟାଲରୁ ଊର୍ଦ୍ଧ୍ୱ ଧାନବସ୍ତା ଜମା ରହିଥିବା ସୂଚନା ମିଳିଛି। ଧାନ ଉଠା ନ ହେଲେ ଆଉ ଚାଷୀମାନଙ୍କଠାରୁ କିଣାଯାଇ ପାରିବ ନାହିଁ ବୋଲି ପଦ୍ମପୁର, ସୁଗୋ ଓ ଏଡ଼ତାଳ ସମିତି ସମ୍ପାଦକ ଅନିରୁଦ୍ଧ ନାୟକ କହିଛନ୍ତି। ଏ ସମ୍ପର୍କରେ ଭଦ୍ରକ ସେବା ସମବାୟ ସମିତି ସମୂହର ଉପ ସହକାରୀ ନିବନ୍ଧକ ସତ୍ୟପ୍ରକାଶ ସେଠୀଙ୍କୁ ପଚାରିବାରୁ ମିଲରମାନେ ଖୁବ୍ଶୀଘ୍ର ମଣ୍ଡିରୁ ଧାନ ଉଠାଇ ନେବେ ବୋଲି କହିଛନ୍ତି।
