ଜୟପୁର,୨୬ା୫(ନି.ପ୍ର.): ଜୟପୁର ତହସିଲର କୁମୁଲିପୁଟ ଓ ରଣ୍ଡାପାଲ୍ଲୀ ପଞ୍ଚାୟତରେ କୁଆପଥର ମାଡ଼ରେ ଧାନ ଫସଲ ନଷ୍ଟ ହୋଇଛି। ବୁଧବାରର କୁଆପଥର ବର୍ଷାରେ ଧନ ଫସଲ ନଷ୍ଟ ହୋଇଥିବାରୁ ଚାଷୀମାନେ ଭାଙ୍ଗି ପଡିଛନ୍ତି। କୁଆପଥର ମାଡ଼ରେ ଧାନ ଅମଳ ହେଉଥିବା ଧାନ ନଷ୍ଟ ହୋଇଛି। ଏନେଇ ସାମାଜିକ କର୍ମୀ ବି. ହରି ରାଓଙ୍କ ନେତୃତ୍ୱରେ ଚାଷୀମାନେ ଜୟପୁର ଉପଜିଲାପାଳଙ୍କ ଦ୍ୱାରସ୍ଥ ହୋଇ କେଉଁ ଅଞ୍ଚଳରେ କେତେ ପରିମାଣରେ ଧାନ ଗଛ ନଷ୍ଟ ହୋଇଛି ତାହା ଆକଳନ କ୍ଷତିପୂରଣ ଦେବାକୁ ଦାବି କରିଛନ୍ତି। ଏହି ଦାବିପତ୍ରର ନକଲ କୋରାପୁଟ ଜିଲାପାଳଙ୍କୁ ପଠାଯାଇଛି। ସୂଚନାପାଇ ଜୟପୁର ତହସିଲଦାର ସାଗରିକା ଷଡ଼ଙ୍ଗୀ ଯାଇ କ୍ଷେତ୍ର ପରିଦର୍ଶନ କରି ଚାଷୀଙ୍କ ସହ ଆଲୋଚନା କରିଛନ୍ତି। ଏ ନେଇ ଜୟପୁର ତହସିଲଦାର ସାଗରିକା ଷଡ଼ଙ୍ଗୀଙ୍କୁ ପଚାରିବାରୁ ରଣ୍ଡାପାଲ୍ଲୀ, ଜୟନ୍ତୀଗିରି, କୁମୁଲିପୁଟ, ଉମୁରି ଆଦି ଅଞ୍ଚଳରେ କୁଆପଥର ମାଡ଼ ହୋଇଛି। କ୍ଷେତ୍ର ପରିଦର୍ଶନ କରି ଜିଲା ପ୍ରଶାସନକୁ ଅବଗତ କରାଯାଇଛି। ଆର୍ଆଇ ଓ ଭିଏଲ୍ଡବ୍ଲ୍ୟୁର ମିଳିତ ଆକଳନ କରି ରିପୋର୍ଟ ଆସିବା ପରେ ପ୍ରଶାସନକୁ ଜଣାଯିବ ବୋଲି କହିଛନ୍ତି। ରଣ୍ଡାପାଲ୍ଲୀ ପଞ୍ଚାୟତରେ ୨ଟି ଘର ଭାଙ୍ଗିଥିବା ଜଣାପଡ଼ିଛି।
