ନୂଆଦିଲ୍ଲୀ,୨୬।୪: କୋଭିଡ୍-୧୯ର ଦ୍ୱିତୀୟ ଲହର ଯୋଗୁ ସାରା ଦେଶରେ ସଂକ୍ରମଣ ଏବେ ବଢିଚାଲିଛି। ଏଭଳି ସ୍ଥିତିରେ ମେଡିକାଲ ଅକ୍ସିଜେନର ଅଭାବ ଏକ ପ୍ରମୁଖ ସମସ୍ୟା ଭାବେ ଉଭା ହୋଇଛି। ଅକ୍ସିଜେନ ଅଭାବକୁ ପୂରଣ କରିବା ଲାଗି ଦେଶର ଶିଳ୍ପ ଜଗତ ଆଗେଇ ଆସିବା ସହ ଏହାର ପରିବହନ ଦିଗରେ ମଧ୍ୟ ସହାୟତା କରୁଥିବା ଦେଖାଯାଉଛି। ଦେଶର ପ୍ରମୁଖ କର୍ପୋରେଟଗୁଡିକ ଅକ୍ସିଜେନ ଯୋଗାଣ ଦିଗରେ ଅଦ୍ୟାବଧି ନିଜର ଯୋଗଦାନ ରଖିଛନ୍ତି।
ସୂଚନା ମୁତାବକ, ଜେଏସ୍ଡ୍ଲ୍ୟୁ ଷ୍ଟିଲ ଦୈନିକ ୯୦୦ ନିୟୁତ ଟନ ଲିକ୍ୟୁଡ ମେଡିକାଲ ଅକ୍ସିଜେନ(ଏଲ୍ଏମ୍ଓ) ଯୋଗାଣ ଲାଗି ଆଗେଇ ଆସିଛି। ଯୋଗାଣ ଧାରା ବୃଦ୍ଧି କରିବା ଲାଗି ପ୍ରସ୍ତୁତ ଥିବା କମ୍ପାନୀ କହିଛି। କମ୍ପାନୀ ଏହାର ମହାରାଷ୍ଟ୍ର, କର୍ନାଟକ ଏବଂ ତାମିଲନାଡୁରେ ରହିଥିବା ପ୍ଲାଣ୍ଟଗୁଡିକରୁ ଚଳିତ ମାସରେ ପ୍ରାୟ ୨୦ ହଜାର ଟନ୍ ମେଡିକାଲ ଅକ୍ସିଜେନ ଯୋଗାଣ ଲକ୍ଷ୍ୟ ରଖିଥିବା ଶନିବାର କହିଛି। ଜେଏସ୍ଡ୍ଲ୍ୟୁ ଗ୍ରୁପ ଅଧ୍ୟକ୍ଷ ସଜ୍ଜନ ଜିନ୍ଦଲ ସରକାରଙ୍କ ସହ ଏ ନେଇ ଆଲୋଚନା ପରେ ପୂର୍ଣ୍ଣ କ୍ଷମତାରେ ଅକ୍ସିଜେନ ଯୋଗାଣ ଲକ୍ଷ୍ୟ ରହିଥିବା ସ୍ପଷ୍ଟ କରିଛନ୍ତି। ଦେଶର ଅଧିକାଂଶ ଇସ୍ପାତ କମ୍ପାନୀ ଏ ଦିଗରେ ନିଜର ଯୋଗଦାନ ରଖୁଥିବା ଜଣାପଡିଛି।
ଆଦାନୀ ଗ୍ରୁପ ଅଧ୍ୟକ୍ଷ ଗୌତମ ଆଦାନୀ ଟୁଇଟ କରି କହିଛନ୍ତି, ଅକ୍ସିଜେନ ଯୋଗାଣ ଦିଗରେ ଯୋଗଦାନ ଜାରି ରହିବ। କମ୍ପାନୀ ପ୍ରାଥମିକ ପର୍ଯ୍ୟାୟରେ ୮୦ ଟନ୍ର ଲିକ୍ୟୁଡ ଅକ୍ସିଜେନ ଶନିବାର ପଠାଇଛି। ସାଉଦି ଆରବରୁ ୫ ହଜାର ମେଡିକାଲ ଅକ୍ସିଜେନ ସିଲିଣ୍ଡର ଅଣାଯିବା ସହ ଏଗୁଡିକ ଶୀଘ୍ର ଯୋଗାଇ ଦିଆଯିବ। କ୍ରାୟୋଜେନିକ କଣ୍ଟେନର ଅଭାବ ଯୋଗୁ ଅକ୍ସିଜେନ ଯୋଗାଣ ବାଧାପ୍ରାପ୍ତ ହେଉଛି। ଏହି ସମସ୍ୟା ସମାଧାନ ଲାଗି ପ୍ରୟାସ ଜାରି ରହିଛି ବୋଲି ଆଦାନୀ କହିଛନ୍ତି। ସେହିଭଳି ଦେଶର ଅନ୍ୟ ପ୍ରମୁଖ ବାଣିଜି୍ୟକ ଗ୍ରୁପ ଆଇଟିସି ପକ୍ଷରୁ କୁହାଯାଇଛି ଯେ, ୨୦ ଟନ୍ର ୨୪ କ୍ରାୟୋଜେନିକ କଣ୍ଟେନରରୁ ବିମାନ ଯୋଗେ ଆଣିବା ଲାଗି ଲିଣ୍ଡେ ଇଣ୍ଡିଆ ସହ ଚୁକ୍ତି କରାଯାଇଛି। ଯୋଗାଣ ଲାଗି ବୃହତ୍ ସଂଖ୍ୟକ ଅକ୍ସିଜେନ କନସେନଣ୍ଟ୍ରେଟର ବିମାନ ଯୋଗେ ଏହି କମ୍ପାନୀ ପରିବହନ କରୁଥିବା ଜଣାପଡିଛି। ଏହାବାଦ ମେଡିକାଲଗୁଡିକରେ କିଭଳି ଅକ୍ସିଜେନ ଉତ୍ପାଦନ ହୋଇପାରିବ ସେ ନେଇ କମ୍ପାନୀ ବିଭିନ୍ନ ଅଂଶୀଦାରଙ୍କ ସହ ଆଲୋଚନା ଜାରି ରଖିଛି। ଟାଟା ଗ୍ରୁପର ପ୍ରଥମ ୪ କ୍ରାୟୋଜେନିକ କଣ୍ଟେନର ଶନିବାର ପହଞ୍ଚିଛି। ଅକ୍ସିଜେନ ଅଭାବକୁ ଦୂର କରିବା ଲାଗି ଗ୍ରୁପ ପକ୍ଷରୁ ୨୪ କ୍ରାୟୋଜେନିକ କଣ୍ଟେନର ବ୍ୟବସ୍ଥା କରାଯାଉଛି। ଏହାବାଦ ଟାଟା ଷ୍ଟିଲ ପକ୍ଷରୁ ବିଭିନ୍ନ ରାଜ୍ୟଗୁଡିକୁ ୩୦୦ ଟନ୍ର ମେଡିକାଲ ଲିକ୍ୟୁଡ ଅକ୍ସିଜେନ ପଠାଯାଇଛି। ଘରୋଇ ଇସ୍ପାତ କମ୍ପାନୀ ମଧ୍ୟରେ ଆର୍ସେଲର ମିତ୍ତଲ ଏବଂ ନିପନ ଷ୍ଟିଲ ଦୈନିକ ୨୧୦ ଟନ୍ ମେଡିକାଲ ଅକ୍ସିଜେନ ଯୋଗାଉଛି। ଜିନ୍ଦଲ ଷ୍ଟିଲ ଆଣ୍ଡ ପାଓ୍ବାରର ଅଧ୍ୟକ୍ଷ ନବୀନ ଜିନ୍ଦଲ କହିଛନ୍ତି, ୧୦୦ ଟନ୍ ଦୈନିକ ଅକ୍ସିଜେନ ଯୋଗାଣ ହେଉଥିବା ବେଳେ ଏହାକୁ ୧୫୦ ଟନ୍କୁ ବଢାଇବା ନେଇ ଯୋଜନା ରଖାଯାଇଛି।
ଶିଳ୍ପକୁ ମିଳିବନି ତରଳ ଅମ୍ଳଜାନ
ହସ୍ପିଟାଲଗୁଡ଼ିକରେ ଅମ୍ଳଜାନ ସଙ୍କଟ ଦେଖାଦେଇଥିବାରୁ ଶିଳ୍ପସଂସ୍ଥାଗୁଡ଼ିକୁ ମେଡିକାଲ ଅକ୍ସିଜେନ ନ ଯୋଗାଇବାକୁ ପୂର୍ବରୁ କେନ୍ଦ୍ର ସରକାର ନିର୍ଦ୍ଦେଶନାମା ଜାରି କରିଥିଲେ। ତେବେ ଏଥିରୁ ୯ ପ୍ରକାର ଶିଳ୍ପକୁ ବାଦ୍ ଦିଆଯାଇଥିଲା। ରବିବାର ସରକାର ଏହି ନିର୍ଦ୍ଦେଶନାମାରେ ପରିବର୍ତ୍ତନ କରି ଲିକ୍ୟୁଇଡ୍ ଅକ୍ସିଜେନ କେବଳ ମେଡିକାଲ ବ୍ୟବହାର ପାଇଁ ଉଦ୍ଦିଷ୍ଟ। ଏହାକୁ ଅଣମେଡ଼ିକାଲ କାର୍ଯ୍ୟରେ ବ୍ୟବହାର କରାଯାଇପାରିବ ନାହିଁ। କୌଣସି ଶିଳ୍ପସଂସ୍ଥାକୁ ତରଳ ଅମ୍ଳଜାନ ନ ଯୋଗାଇବା ଲାଗି କେନ୍ଦ୍ର ସଂଶୋଧିତ ନିର୍ଦ୍ଦେଶନାମା ଜାରି କରିଛି।
