ହେମଗିର,୩୧।୫(ଚୈତନ୍ୟ ପଟେଲ): ସୁନ୍ଦରଗଡ ଜିଲା ହେମଗିର ଥାନା ଅନ୍ତର୍ଗତ ଉସତାଲି ଘାଟି ନିକଟରେ ଏକ ଶ୍ରମିକ ନେଇ ଯାଉଥିବା କ୍ୟାମ୍ପର ଭ୍ୟାନ ଭାରସାମ୍ୟ ହରାଇ ଦୁଘଟଣାଗ୍ରସ୍ତ ହୋଇଛି। ଏଥିରେ ୨ ଜଣଙ୍କ ମୃତ୍ୟୁ ହୋଇଥିବା ବେଳେ ୬ ଜଣ ଗୁରୁତର ଆହତ ହୋଇଛନ୍ତି। ଆହତମାନଙ୍କ ମଧ୍ୟରୁ ୨ ଜଣଙ୍କୁ ସୁନ୍ଦରଗଡ ମୁଖ୍ୟ ଡାକ୍ତରଖାନାକୁ ଚିକିତ୍ସା ପାଇ ପଠାଯାଇଛି।
ମିଳିଥିବା ସୂଚନା ଅନୁସାରେ, ହେମଗିର ବ୍ଲକ ସ୍ଥିତ ଡୁଡୁକା ଠାରେ ବାଲାଜି କମ୍ପାନୀରେ କାମ କରିବା ପାଇ ହେମଗିର ଠାରୁ ଏକ କ୍ୟାମ୍ପର ଗାଡି (ଓଡି ୨୩ଏଲ ୩୯୧୨)ରେ ହେମଗିର ଗ୍ରାମର ରୁପେଶ ମୈତ୍ରୀ, ହୁକୁମ ଚନ୍ଦ ମୈତ୍ରୀ, ବିନୋଦ ମୈତ୍ରୀ, ଧନୁକୁମାରି ମୈତ୍ରୀ,ମମତା ଗନ୍ଧବା, ଶେମବାଇ ଗନ୍ଧବା, ମତିବାଇ ଗନ୍ଧବାଙ୍କ ଯାଉଥିବା ସମୟରେ ଉସତାଲି ଘାଟି ନିକଟରେ ଗାଡ଼ିଟି ଭାରସାମ୍ୟ ହରାଇ ଦଶଫୁଟ ତଳକୁ ଓଲଟି ପଡିଥିଲା। ଏଥିରେ ଦୁଇ ଜଣ ଶେମବାଇ ଗନ୍ଦବା ଓ ମତିବାଇ ଗନ୍ଦବାଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ଆହତ ମାନଙ୍କୁ ହେମଗିର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇ ଅଣାଯାଇ ଥିବାବେଳେ ଗୁରୁତର ଆହତ ମାନଙ୍କୁ ଅଧିକ ଚିକିତ୍ସା ପାଇ ସୁନ୍ଦରଗଡକୁ ପଠାଯାଇଛି । ଘଟଣାସ୍ଥଳରେ ଚାପା ଉତ୍ତେଜନା ଦେଖା ଦେଇଥିଲା। ପରେ ଘଟଣା ସ୍ଥଳରେ କମ୍ପାନୀ କର୍ତ୍ତୃପକ୍ଷ ଓ ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରି କ୍ଷତି ପୂରଣ ବାବଦକୁ ଲକ୍ଷେ ଟଙ୍କା ପ୍ରଦାନ କରାଜିବା ସହ ଇନ୍ସୁରାନ୍ସର ଟଙ୍କା ପ୍ରଦାନ କରାଯିବ ବୋଲି ପ୍ରତିଶ୍ରୁତି ମିଳିବା ପରେ ଉତ୍ୟକ୍ତ ଲୋକେ ଶାନ୍ତ ହୋଇଥିଲା । ପରେ ହେମଗିର ପୋଲିସ ମୃତଦେହ ଜବତ କରି ବ୍ୟବଛେଦ ପାଇ ପଠାଇଛି।
