ଖୋର୍ଦ୍ଧା ଅଫିସ,୯।୫: ଖୋର୍ଦ୍ଧା ଉପକଣ୍ଠ ବରୁଣେଇ ରାସ୍ତାରେ ରହିଥିବା ଏକ ଶ୍ମଶାନରେ କୋଭିଡ୍ ରୋଗୀଙ୍କ ମୃତଦେହ ସତ୍କାର ନେଇ ଶନିବାର ଉତ୍ତେଜନା ପ୍ରକାଶ ପାଇଛି। ଶ୍ମଶାନ ନିକଟରେ ରହିଥିବା ଗ୍ରାମବାସୀଙ୍କ ବିରୋଧ ପରେ ଆମ୍ବୁଲାନ୍ସରେ ଆସିଥିବା କର୍ମଚାରୀମାନେ ମୃତଦେହ ନେଇ ଜିଲା ମୁଖ୍ୟ ଚିକିତ୍ସାଳୟ ଫେରିଯାଇଥିଲେ।
ମୁତାବକ, ବୋଲଗଡ଼ ଅଞ୍ଚଳରେ ଘରୋଇ ସଙ୍ଗରୋଧରେ ରହି ଚିକିତ୍ସିତ ହେଉଥିବା ଜଣେ କୋଭିଡ୍ ରୋଗୀ ଗୁରୁତର ହେବାରୁ ତାଙ୍କୁ ଖୋର୍ଦ୍ଧା ମେଡିକାଲ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ ମେଡିକାଲ କର୍ତ୍ତୃପକ୍ଷ ଜିଲା ପ୍ରଶାସନକୁ ଅବଗତ କରାଇଥିଲେ। ପରେ ଆମ୍ବୁଲାନ୍ସରେ ମୃତଦେହ ଜେମାଦେଇ ମୌଜାର ଶିଳ୍ପାଞ୍ଚଳରେ ରହିଥିବା ଶ୍ମଶାନକୁ ନେଇଥିଲେ। ଆମ୍ବୁଲାନ୍ସରେ ଥିବା କର୍ମଚାରୀମାନେ ପିପିଇ କିଟ୍ ପିନ୍ଧିଥିବା ଦେଖି ଉକ୍ତ ରାସ୍ତା ଦେଇ ଯାଉଥିବା କେତେଜଣ ବ୍ୟକ୍ତି ଗ୍ରାମବାସୀଙ୍କୁ ଜଣାଇଥିଲେ। ଗ୍ରାମବାସୀ ପହଞ୍ଚି ମୃତଦେହ ସତ୍କାରକୁ ବିରୋଧ କରିବା ସହ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା। ଖବରପାଇ ଖୋର୍ଦ୍ଧା ତହସିଲଦାର ପଦ୍ମଚରଣ ସାହୁ, ପୌର କାର୍ଯ୍ୟନିର୍ବାହୀ ଅଧିକାରୀ ଶ୍ୱେତପଦ୍ମା ଶତପଥୀ, ସଦର ଏସ୍ଡିପିଓ ସୁଶୀଲ କୁମାର ମିଶ୍ର୍ର, ଟାଉନ ଥାନା ଅଧିକାରୀ ଉମାଶଙ୍କର ସିଂ ପ୍ରମୁଖ ପହଞ୍ଚିବା ପରେ ଗ୍ରାମବାସୀଙ୍କ ପକ୍ଷରୁ ଏକ ପ୍ରତିନିଧି ଟିମ୍ ଉପସ୍ଥିତିରେ ଆଲୋଚନା ହୋଇଥିଲା। ଗ୍ରାମବାସୀଙ୍କ ବିନା ଅଗୋଚରରେ ଜିଲା ପ୍ରଶାସନ ପକ୍ଷରୁ କାହିଁକି ଏଠାରେ କୋଭିଡ୍ ରୋଗୀଙ୍କ ମୃତଦେହକୁ ପୋଡ଼ାଯିବାକୁ ଅନୁମତି ଦିଆଯାଇଛି ବୋଲି ଗ୍ରାମବାସୀ କହିଥିଲେ। ମୃତଦେହ ପୋଡାଯିବା ପରେ ଏହାକୁ ବିଶୋଧନ କରା ନ ଗଲେ, କରୋନା ବ୍ୟାପିବା ଆଶଙ୍କା ରହିଛି। ଏଠାରେ କୋଭିଡ୍ ଶ୍ମଶାନ ନ କରିବାକୁ ଗ୍ରାମବାସୀ ପ୍ରଶାସନକୁ ଅନୁରୋଧ କରିଥିଲେ। ପରେ ଜିଲା ପ୍ରଶାସନର ଲିଖିତ ପ୍ରତିଶ୍ରୁତି ପରେ ଗ୍ରାମବାସୀ ଗୋଟିଏ ଦିନ ଲାଗି ସତ୍କାର ପାଇଁ ଅନୁମତି ଦେଇଥିଲେ। ଅନ୍ୟପକ୍ଷେ ଗ୍ରାମବାସୀ ଏହି ଶ୍ମଶାନ ଚାରିପଟେ ପାଚେରି ନିର୍ମାଣ କରିଛନ୍ତି। ଉକ୍ତ ଶ୍ମଶାନରେ ପୂର୍ବରୁ ମଧ୍ୟ ଦୁଇଜଣ କୋଭିଡ୍ ରୋଗୀଙ୍କ ମୃତଦେହ ପୋଡ଼ାଯାଇଥିବା କେତେଜଣ ଗ୍ରାମବାସୀ କହିଛନ୍ତି। ସହରରେ ଏକାଧିକ ସରକାରୀ ଜାଗା ରହିଛି। ସେଠାରେ ଅସ୍ଥାୟୀ କୋଭିଡ୍ ଶ୍ମଶାନ ଲାଗି ସାଧାରଣରେ ଦାବି ହୋଇଛି।
