ଏଲୁରୁ,୬।୧୨: ଆନ୍ଧ୍ର ପ୍ରଦେଶର ପଶ୍ଚିମ ଗୋଦାବରି ଜିଲା ଇଲୁରୁ ଟାଉନର ଏକ ଭିନ୍ନ ଅଞ୍ଚଳର ବାସୀନ୍ଦାଙ୍କଠାରେ ଏକ ଅଜଣା ରୋଗର ଲକ୍ଷଣ ଦେଖାଯାଉଛି। ଏହା ଉପରେ ନଜର ରଖିଛନ୍ତି ସ୍ବାସ୍ଥ୍ୟ ଓ ମେଡିକାଲ ବିଶେଷଜ୍ଞମାନେ। ମିଳିଥିବା ସୂଚନା ମୁତାବକ, ଅଜଣା ରୋଗରେ ପୀଡ଼ିତ ହୋଇ ୨୨୮ ଜଣ ମେଡିକାଲରେ ଭର୍ତ୍ତି ହୋଇଛନ୍ତି। ସେମାନେ କୌଣସି ପ୍ରକାର ଜନ ସମାବେଶରେ ଏକତ୍ରିତ ହୋଇ ନ ଥିଲେ।
୭୦ ରୋଗୀଙ୍କୁ ଡିସ୍ଚାର୍ଜ କରାଯାଇଥିବାବେଳେ ୭୬ ମହିଳା ଓ ୪୬ ଶିଶୁଙ୍କ ଚିକିତ୍ସା ଚାଲିଛି। ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା, ଏହି ଅଜଣା ରୋଗରେ ମୁଖ୍ୟତଃ ବୟସ୍କ ନ ହେଲେ ଶିଶୁମାନେ ଆକ୍ରନ୍ତ ହୋଇଛନ୍ତି। ସ୍ବତନ୍ତ୍ର ମେଡିକାଲ ଦଳ ଇଲୁରୁ ଗସ୍ତ କରି ରୋଗୀଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିଛନ୍ତି। ସେମାନଙ୍କ ରକ୍ତ ନମୁନା ପରୀକ୍ଷା କରାଯାଇଥିଲା। ମାତ୍ର ସମସ୍ତ ରିପୋର୍ଟ ନେଗେଟିଭ ଆସିଛି। ଜଣେ ୬ ବର୍ଷୀୟା ଝିଅର ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ବିଜୟଓ୍ବାଡା ମେଡିକାଲକୁ ପଠାଯାଇଛି।
ସମସ୍ତ ରୋଗୀଙ୍କ କୋଭିଡ୍-୧୯ ଟେଷ୍ଟ କରାଯାଇଥିଲା। ଆଉ ରିପୋର୍ଟ ନେଗେଟିଭ ଆସିଛି। ଏଭଳି ଜରୁରୀକାଳୀନ ପରିସ୍ଥିତି ପାଇଁ ଏଲୁରୁଠାରେ ୧୫୦ ବେଡ୍ ଓ ବିଜୟଓ୍ବାଡାଠାରେ ୫୦ ବେଡ୍ ରଖାଯାଇଛି ବୋଲି କହିଛନ୍ତି ସ୍ବାସ୍ଥ୍ୟ ମନ୍ତ୍ରୀ ଆଲା।
