ଅନୁଗୋଳ ଅଫିସ, ୩୦ା୯ – ଅନୁଗୋଳ ସହରରେ ପ୍ରତିଷ୍ଠା କରାଯାଇଥିବା ୩ଟି ମାଇକ୍ରୋ କମ୍ପୋଷ୍ଟିଂ ସେଣ୍ଟର(ଏମ୍ସିସି) ମଧ୍ୟରୁ ଗୋଟିଏରୁ ଉତ୍ପାଦନ ଆରମ୍ଭ ହୋଇଛି। ସହରରୁ ସଂଗୃହୀତ ଓଦା ଆବର୍ଜନାରୁ ମଙ୍ଗଳବାର ପ୍ରଥମ କରି ଜୈବିକ ଖତ ପ୍ରସ୍ତୁତ କରିଛି ହୁଲୁରିସିଂହା ଏମ୍ସିସି। ଏଠାରୁ ଉତ୍ପାଦିତ ୩୦ କିଲୋଗ୍ରାମ ଜୈବିକ ଖତକୁ ୨୦ ଟଙ୍କା ହିସାବରେ ବିକ୍ରି କରାଯାଇଛି। ୧୦ କେଜି ପରୀକ୍ଷାମୂଳକ ଭାବେ ଗୋଟିଏ ନର୍ସରିକୁ ଦିଆଯାଇଥିବା ବେଳେ ଅବଶିଷ୍ଟକୁ ସ୍ଥାନୀୟ ଅଞ୍ଚଳରେ ବିକ୍ରି କରାଯାଇଛି। ଆସନ୍ତା ମାସରେ ହେମସୁରପଡ଼ା ଓ ମିଶ୍ରପଡ଼ା ଏମ୍ସିସିରୁ ଉତ୍ପାଦନ ଆରମ୍ଭ ହେବ ବୋଲି ପୌରପାଳିକା ପକ୍ଷରୁ କୁହାଯାଇଛି।
ଗତ ଅଗଷ୍ଟ ୩୧ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁଗୋଳର ଏହି ୩ ଏମ୍ସିସିକୁ ଭିଡିଓ କନ୍ଫରେନ୍ସ ମାଧ୍ୟମରେ ଉଦ୍ଘାଟନ କରିଥିଲେ। ଏହାର ଦୁଇମାସ ପୂର୍ବରୁ ପୌରପାଳିକା ପକ୍ଷରୁ ସହରରୁ ଓଦା ଓ ଶୁଖିଲା ଆବର୍ଜନା ସଂଗ୍ରହ କରାଯାଇ ହୁଲୁରିସିଂହା ଏମ୍ସିସିରେ ପକାଯାଉଥିଲା। ଓଦା ଅଳିଆ ସହ ଗୁଡ଼, ଦହି, ପାଣି ଓ କୁଣ୍ଡାରୁ ପ୍ରସ୍ତୁତ ରସାୟନିକ ମିଶ୍ରଣ କରାଯାଉଥିଲା। ୪୨ ଦିନ ଧରି ଏହି ପ୍ରକ୍ରିୟା ଜାରି ରହିବା ପରେ ମଙ୍ଗଳବାର ପ୍ରଥମ କରି ଜୈବିକ ଖତ ପ୍ରସ୍ତୁତ ହୋଇଥିବା ପୌରପାଳିକାର ସାନିଟାଇଜ୍ ବିଶେଷଜ୍ଞ ଜିତେନ୍ଦ୍ର କୁମାର ସେଠୀ କହିଛନ୍ତି। ବର୍ତ୍ତମାନ ବିନା ମେଶିନରେ ଖତ ଉତ୍ପାଦନ କରାଯାଉଥିବାବେଳେ ଆଗକୁ ମେଶିନ୍ ଲଗାଯାଇ କାର୍ଯ୍ୟ କରାଯିବ। ଏ ନେଇ ଜିଇଡି ସହ ଆଲୋଚନା ହୋଇଛି। ଜିଇଡି ଓ ଟିପିସିଏଲ୍ ନିକଟରୁ କେତେ ଟଙ୍କା ଖର୍ଚ୍ଚରେ ବିଜୁଳି ସଂଯୋଗ ଅଣାଯାଇପାରିବ ସେ ନେଇ ଆକଳନ ସରିଛି। ବିଜୁଳି ସଂଯୋଗ ହେବା ପରେ ଏମ୍ସିସି ଗୁଡ଼ିକରେ ମେଶିନ୍ ଲଗାଯିବ। ସୂଚନାଯୋଗ୍ୟ ଯେ, ଅନୁଗୋଳ ସହରରେ ୩ଟି ଏମ୍ସିସି ସହ ଗୋଟିଏ ମ୍ୟାଟେ୍ରିଆଲ ରିକଭରି ଫ୍ୟାସିଲିଟି(ଏମ୍ଆର୍ଏଫ୍) ମଧ୍ୟ ପ୍ରସ୍ତୁତ ହୋଇସାରିଛି। ଓଦା ଅଳିଆରୁ ଜୈବିକ ଖତ ପ୍ରସ୍ତୁତ ହେଉଥିବାବେଳେ ଏମ୍ଆର୍ଏଫ୍ରେ ଶୁଖିଲା ଅଳିଆ ପକାଯାଇ ପାଉଡର ବାହାର କରାଯିବ। ଏହାକୁ ଏକ ସିମେଣ୍ଟ ପ୍ରସ୍ତୁତ କାରଖାନାକୁ ଦିଆଯିବ। ହୁଲୁରିସିଂହା ଏମ୍ସିସିରୁ ଉତ୍ପାଦନ ଆରମ୍ଭ ହୋଇଥିବାରୁ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ଉକ୍ତ ଏମ୍ସିସି ଦାୟିତ୍ୱରେ ଥିବା ଧରିତ୍ରୀ ସ୍ବୟଂ ସହାୟକ ଗୋଷ୍ଠୀର କାର୍ଯ୍ୟକୁ ପ୍ରଶଂସା କରିଛନ୍ତି। ଏଣିକି ପ୍ରତ୍ୟେକ ଦିନ ଓଦା ଅଳିଆରୁ ଖତ ପ୍ରସ୍ତୁତ ହୋଇ ବିକ୍ରି କରାଯିବ। ଏ ନେଇ କେତେଜଣ ନର୍ସରିମାଲିକଙ୍କ ସହ ଆଲୋଚନା ହୋଇଛି। ସହରର ଯେଉଁମାନେ ଜୈବିକ ଖତ ନେବାକୁ ଚାହିଁବେ ସେମାନଙ୍କୁ ମଧ୍ୟ ବିକ୍ରି କରାଯିବ ବୋଲି ନିର୍ବାହୀ ଅଧିକାରୀ ପଣ୍ଡା ପ୍ରକାଶ କରିଛନ୍ତି।
