ଡେରାଡୁନ,୨୩।୫: ଉତ୍ତରାଖଣ୍ଡରେ ହଠାତ୍ ବଦଳୁଥିବା ପାଣିପାଗ ଯୋଗୁ ବର୍ତ୍ତମାନ ଚାରିଧାମ ଯାତ୍ରା ଉପରେ ବ୍ରେକ ଲାଗିଛି। ପାଣିପାଗ ବିଭାଗ ପକ୍ଷରୁ ରାଜ୍ୟରେ ଅରେଞ୍ଜ ଆଲର୍ଟ ଜାରି କରାଯିବା ପରେ ଏବେ କେଦାରନାଥ ଯାତ୍ରାକୁ ପ୍ରଶାସନ ବନ୍ଦ କରିଦେଇଛି। ଏଥିସହ ଭକ୍ତମାନଙ୍କୁ ନିରାପଦ ସ୍ଥାନରେ ରହିବାକୁ ନିବେଦନ କରିଛି। ଏହି ସମୟରେ ହେଲିକପ୍ଟର ସେବାକୁ ମଧ୍ୟ କିଛି ସମୟ ପାଇଁ ବନ୍ଦ ରଖାଯାଇଛି। କାରଣ ବର୍ଷା ଯୋଗୁ କୁହୁଡି ଓ ମେଘ ବହୁତ ତଳେ ଭାସମାନ ହେଉଥିବାରୁୁ ଦୃଶ୍ୟମାନ ହେବା କମ୍ ରହିଛି। ଯାହାଦ୍ୱାରା ହେଲିକପ୍ଟର ଉଡ଼ାଣ ବିପଜ୍ଜନକ ହୋଇପାରେ। ତେଣୁ ପାଣିପାଗର ହଠାତ୍ ପରିବର୍ତ୍ତନକୁ ଦୃଷ୍ଟିରେ ରଖି ଏଭଳି ପଦକ୍ଷେପ ନିଆଯାଇଛି ବୋଲି ରୁଦ୍ରପ୍ରୟାଗର ସର୍କଲ ଅଧିକାରୀ ପ୍ରମୋଦ କୁମାର ସୂଚନା ଦେଇଛନ୍ତି। ଭକ୍ତଙ୍କ ସୁରକ୍ଷା ସର୍ବାଧିକ ଗୁରୁତ୍ୱପୂର୍ଣ୍ଣ ଏବଂ ଏହି କାରଣରୁ କେଦାରନାଥ ଯାତ୍ରା ବନ୍ଦ କରାଯାଇଛି। ଅରେଞ୍ଜ ଆଲର୍ଟ ପାଇବା ପରେ ପ୍ରଶାସନ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଗୁପ୍ତକାଶୀରେ ୫ହଜାର ତୀର୍ଥଯାତ୍ରୀଙ୍କୁ ଅଟକାଇଦେଇଛି। ଏଥିସହ ସମସ୍ତ ଶ୍ରଦ୍ଧାଳୁଙ୍କୁ ବର୍ତ୍ତମାନ ନିରାପଦ ସ୍ଥାନରେ ରହିବାକୁ ନିବେଦନ କରିବା ସହ ସୁରକ୍ଷା ବ୍ୟବସ୍ଥା କରାଯାଉଛି ବୋଲି ପ୍ରମୋଦ କୁମାର କହିଛନ୍ତି। ସୂଚନା ମୁତାବକ, ସୋମବାର ସକାଳେ ବର୍ଷା ଯୋଗୁ ପରିସ୍ଥିତିକୁ ଆହୁରି ଖରାପ ହେବା ସହ ରାସ୍ତାରେ ଯାତାୟତ କରିବା ବିପଦଜ୍ଜନକ ହୋଇଛି। ଲୋକମାନଙ୍କୁ ନିଜ ନିଜ ହୋଟେଲକୁ ଫେରିଯିବାକୁ କହିବା ସହ ଯାତ୍ରା ନ କରିବାକୁ ଅପିଲ କରାଯାଇଛି। ଏହି ସମୟରେ ପାଗ ଖରାପ ହେବାର ସମ୍ଭାବନା ଅଧିକ ରହିଛି। ଯେଉଁଥିପାଇଁ ରାସ୍ତା ଅଧିକ ବିପଜ୍ଜନକ ହୋଇପାରେ। ଏଥିସହ ଭୂସ୍ଖଳନ ହେବାର ଆଶଙ୍କା ମଧ୍ୟ ବୃଦ୍ଧି ପାଇଛି ବୋଲି ପ୍ରମୋଦ କୁମାର କହିଛନ୍ତି।
