ଥୁଆମୂଳ ରାମପୁର,୨୦।୯(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ୍ କର୍ଲାପାଟ୍ ଅଞ୍ଚଳର ଖଣ୍ଡୁଆଳମାଳିରୁ ବକ୍ସାଇଟ୍ ଖନନକୁ ନେଇ ସ୍ଥାନୀୟ ଅଞ୍ଚଳବାସୀଙ୍କ ବିରୋଧ ତୀବ୍ର ହେବାରେ ଲାଗିଛି । ନିଜ ମା’ ମାଟି ଓ ମାଳିର ସୁରକ୍ଷା ପାଇଁ ସମସ୍ତେ ସଜାଗ ହୋଇ ଅଣ୍ଟା ଭିଡୁଥିବା ବେଳେ ଧୀରେ ଧୀରେ ଏହି ସଂଘଟନରେ ଅନେକ ଲୋକ ସାମିଲ ହେବାରେ ଲାଗିଛନ୍ତି । ଏହି କ୍ରମରେ ରବିବାର କର୍ଲାପାଟ୍ ଗ୍ରାମ ପଞ୍ଚାୟତ ଅନ୍ତର୍ଗତ ଅମଠାଗୁଡ଼ା ଠାରେ ‘ଖଣ୍ଡୁଆଳମାଳି ସ୍ଥାୟୀ ସୁରକ୍ଷା ସମିତି, କଳାହାଣ୍ଡି’ ଏବଂ ‘ମା’ ମାଟି ମାଳି ସୁରକ୍ଷା ସମିତି, ରାୟଗଡ଼ା-କଳାହାଣ୍ଡି’ ପକ୍ଷରୁ ଦ୍ୱିତୀୟ ପର୍ଯ୍ୟାୟ ରାଲି ଓ ପ୍ରତିବାଦ ବୈଠକ ଆୟୋଜିତ ହୋଇଯାଇଛି।
ପୂର୍ବରୁ ମଧ୍ୟ ଏହାକୁ ନେଇ ବୈଠକ ହୋଇଥିବା ବେଳେ ବେଦାନ୍ତ, ବାଲ୍କୋ ଓ ମୈତ୍ରୀ କମ୍ପାନୀ ବିରୁଦ୍ଧରେ ଆୟୋଜିତ ଏହି ଦ୍ୱିତୀୟ ସମାବେଶରେ ଖଣ୍ଡୁଆଳମାଳି ପାଇଁ ଦିଆଯାଇଥିବା ଖଣି ଲିଜ୍ ତୁରନ୍ତ ବାତିଲ କରିବାକୁ ଦୃଢ଼ ଦାବି କରାଯାଇଛି । ଦାବି ପୂରଣ ନହେଲେ ଆଗାମୀ ଦିନରେ ଆନ୍ଦୋଳନକୁ ଆହୁରି ଜୋରଦାର କରାଯିବ ବୋଲି ବୈଠକରେ ଉପସ୍ଥିତ ଆନ୍ଦୋଳନକାରୀମାନେ ଚେତାବନୀ ଦେଇଛନ୍ତି।
ଏହି ବୈଠକରେ କର୍ଲାପାଟ୍ ସରପଞ୍ଚ ବିଶ୍ୱନାଥ ମାଝୀ, ପୂର୍ବତନ ସରପଞ୍ଚ ରାମ ମାଝୀ, ଖଣ୍ଡୁଆଳମାଳି ସ୍ଥାୟୀ ସୁରକ୍ଷା ସମିତିର ସଭାପତି କାର୍ତ୍ତିକ ମାଝୀ, ନାକୁରୁଣ୍ଡିର ପୂର୍ବତନ ସମିତି ସଭ୍ୟ ସାନୁ ମାଝୀ, ତଲାମ୍ପଦର ‘ମା’ ମାଟି ସୁରକ୍ଷା ମଞ୍ଚ’ର ସଭାପତି ଲାଇ ମାଝୀ, ଲକ୍ଷ୍ମଣ ନାଏକ, ହୃଷିକେଶ ମାଝୀ, ପୋଳିଂପଦରର ରାମକୃଷ୍ଣ ମାଝୀ, ସାମାଜିକ କର୍ମୀ ଧୋବା ସାହୁ, କାଣୀଗୁମା ପୂର୍ବତନ ସମିତି ଉପେନ୍ଦ୍ର ନାଏକଙ୍କ ସମେତ ସତ୍ୟନାରାୟଣ ମାଝୀ, କରୁଣା ମାଝୀ, ବିଜୟ ମାଝୀ, ରଞ୍ଜିତ ମାଝୀ, ରାଜାରାମ ମାଝୀ, ଅଶୋକ ମାଝୀ, ଇନ୍ଦ୍ର ମାଝୀ, ସୁରେନ୍ଦ୍ର ମାଝୀ, ଚନ୍ଦ୍ର ନାଏକ, ଶିବ ନାଏକ, ରାଜୀବ ନାଏକ, ଚିକ୍ନୁ ମାଝୀ, ବେଡାଙ୍ଗ ମାଝୀ, ବିଜୁ ମାଝୀ, ଜୟନ୍ତୀ ମାଝୀ, ଅର୍ଜୁନ ମାଝୀ, ଗୁଣି ମାଝୀ, ସାଯେଙ୍ଗ ମାଝୀ, ପରମା ମାଝୀଙ୍କ ପରି ଅନେକ ନେତୃସ୍ଥାନୀୟ ଯୁବ ସଂଗ୍ରାମୀ ଓ ଅଞ୍ଚଳବାସୀ ଉପସ୍ଥିତ ଥିଲେ ।
ଏହି କାର୍ଯ୍ୟକ୍ରମରେ କର୍ଲାପାଟ୍, ବଡ଼ଟିକ୍ରାଗୁଡ଼ା, ଭେଜିଗୁଡ଼ା, ଅମଠାଗୁଡ଼ା, କୁଆଙ୍ଗ, ଜିଲ୍ଲାଗାଁ, ପୁରୁଣାଗୁମା, କୁକୁରଭୂର୍ଷି, କରଡାପଦର, ବାରିଗୁଡ଼ା, ପେରମଞ୍ଜି, ପୋଳିଂପଦର, ସାଇସୁରୁଣୀ, ତଲାମ୍ପଦର, ରଣପୁର, ଅମଝୋଲ ଆଦି ପ୍ରାୟ ୨୦ଟି ଗାଁରୁ ୩୦୦ରୁ ଉର୍ଦ୍ଧ୍ୱ ଲୋକ ଯୋଗଦେଇଥିଲେ। ଖଣି ଲିଜ୍ ବାତିଲ ଦାବିକୁ ନେଇ ଆୟୋଜିତ ଏହି ସମାବେଶ ପରେ ଖଣ୍ଡୁଆଳମାଳି ବକ୍ସାଇଟ୍ ଖନନ ପ୍ରସଙ୍ଗରେ ଅଞ୍ଚଳବାସୀଙ୍କ ଆନ୍ଦୋଳନ ଆଗକୁ କେଉଁ ରୂପ ନେଉଛି, ତାହା ଉପରେ ଏବେ ସମସ୍ତଙ୍କ ନଜର ରହିଛି ।
