ଭୁବନେଶ୍ୱର,୧୮ା୩(ବ୍ୟୁରୋ): ମୁଖ୍ୟମନ୍ତ୍ରୀଙ୍କ ଦପ୍ତରରେ ଅବସର ଗ୍ରହଣ କରିଥିବା ଲୋକଙ୍କୁ ନିଯୁକ୍ତି ଦେବା ନେଇ ଭାଜପା ସରକାରଙ୍କୁ ଘେରିଛି। ଏହି ପ୍ରସଙ୍ଗରେ ଉଭୟ ବିରୋଧୀ ଓ ଶାସକ ଦଳ ସଭ୍ୟମାନେ ମୁହଁାମୁହିଁ ହୋଇଛନ୍ତି। ଶୁକ୍ରବାର ଶୂନ୍ୟକାଳରେ ଏହି ପ୍ରସଙ୍ଗ ଉଠାଇ ବିରୋଧୀ ଦଳ ନେତା ଜୟ ନାରାୟଣ ମିଶ୍ର କହିଛନ୍ତି, ସିଏମ୍ଓ ରିଟାୟାର୍ଡ ଅଫିସରଙ୍କ କ୍ଲବ ପାଲଟିଛି। ପୂର୍ବତନ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ, ଆର୍. ବାଲକ୍ରିଷ୍ଣନ, ଉପେନ୍ଦ୍ର ତ୍ରିପାଠୀ, ପି.କେ. ମହାପାତ୍ର, ଗୋପବନ୍ଧୁ ଦାସ ପ୍ରମୁଖ ସିଏମ୍ଙ୍କ ଅଫିସରେ କାର୍ଯ୍ୟ କରୁଛନ୍ତି। ମୁଖ୍ୟମନ୍ତ୍ରୀଙ୍କ ଅଫିସ କ’ଣ ରିଟାୟାର୍ଡ ଲୋକଙ୍କୁ ଥଇଥାନ କରିବାକୁ ହୋଇଛି। ଏଇଟା କ’ଣ ମୋ ସରକାର। ଏଇଟା କ’ଣ ୫-ଟି। ସାଧାରଣ ପ୍ରଶାସନ ବିଭାଗ ଦାୟିତ୍ୱରେ ଥିବା ବ୍ୟକ୍ତିଙ୍କୁ ଏହା ଉପରେ ଗୃହରେ ଏକ ଷ୍ଟେଟ୍ମେଣ୍ଟ ଦେବାଲାଗି ନିର୍ଦ୍ଦେଶ ଦିଅନ୍ତୁ। ଏହା କହିବା ପରେ ବାଚସ୍ପତି ବିଜେଡି ସଭ୍ୟ ଅରୁଣ ସାହୁଙ୍କୁ କହିବାକୁ ଡାକିଲେ। ସେ କହିଲେ, ମୁଁ ଯଦି ଅନ୍ୟକୁ ଅଙ୍ଗୁଳି ଦେଖାଇବି ତେବେ ମୋ ଆଡ଼କୁ ୪ଟା ଅଙ୍ଗୁଳି ରହିବ। ଶୂନ୍ୟକାଳକୁ କ’ଣ ଏଭଳି ଅପ୍ରସଙ୍ଗରେ ନଷ୍ଟ କରିବାକୁ ହୋଇଛି। ଭାରତବର୍ଷର ସର୍ବୋଚ୍ଚ ସଂସ୍ଥାରେ ଅବସରପ୍ରାପ୍ତ ଲୋକ ଅଛନ୍ତି। ଭାରତବର୍ଷର ସାଉଥ୍ ବ୍ଲକରେ ଥିବା ପ୍ରଧାନମନ୍ତ୍ରୀଙ୍କ ଅଫିସରେ ବହୁ ରିଟାୟାର୍ଡ ଲୋକ ଅଛନ୍ତି। ସମ୍ବିଧାନର କେଉଁ ଭାଗରେ ଲେଖାହୋଇଛି ରିଟାୟାର୍ଡ ଲୋକ ରହିପାରିବେ ନାହିଁ। ହରିୟାଣା, ଗୁଜରାଟ, ମଧ୍ୟପ୍ରଦେଶ, ମହାରାଷ୍ଟ୍ରରେ ବହୁ ରିଟାୟାର୍ଡ ଲୋକ ମୁଖ୍ୟମନ୍ତ୍ରୀଙ୍କ ଅଫିସର ରହିଛନ୍ତି। ଯେଉଁମାନେ ବିଧାନସଭାର ସଦସ୍ୟ ନୁହନ୍ତି ସେମାନଙ୍କ କଥା ଏଠାରେ କାହିଁକି ଆଲୋଚନା କରାଯାଉଛି। ଏ ରୋଗର ନିଦାନ କ’ଣ। ମାନସିକ ରୋଗ ବିଶେଷଜ୍ଞଙ୍କୁ ଦେଖାଇବା କଥା। ଏହା ଶୁଣିବା ପରେ ଭାଜପା ସଭ୍ୟମାନେ ଚିହିଁକି ଉଠିଲେ। ଗୃହର ମଧ୍ୟଭାଗକୁ ଆସି କଡ଼ା ବିରୋଧ କଲେ। ମୁଖ୍ୟମନ୍ତ୍ରୀଙ୍କ ବିରୋଧରେ ସ୍ଲୋଗାନ ଦେଲେ। ହଟ୍ଟଗୋଳକୁ ଦୃଷ୍ଟିରେ ରଖି ବାଚସ୍ପତି ଗୃହକୁ ୧୧ଟା ୪୫ରୁ ୧୨ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ।
