ବରଗଡ଼/ଭେଡ଼େନ,୮।୯(ପ୍ରେମାନନ୍ଦ ଖମାରୀ/ସୁଦନ ମହାକୁର): ବରଗଡ଼ ଜିଲା ଭେଡ଼େନ ବ୍ଲକ ଅଧୀନଖୁଣ୍ଟୁଲିପାଲିରେ ଅପେରା(ଯାତ୍ରାପାର୍ଟି) ପୋଷ୍ଟର ଚିରା ଏବଂ ପରବର୍ତ୍ତୀ ଘଟଣାକ୍ରମକୁ ନେଇ ଏବେ ମଧ୍ୟ ଉତ୍ତେଜନା ଲାଗି ରହିଛି । ପୋଷ୍ଟର ଚିରା ଘଟଣାରେ ଗିରଫ ହୋଇ କୋଶଲ ସେନାର ଦୁଇ କର୍ମୀ ବରଗଡ଼ ସବ୍ଜେଲ୍ରେ ବିଚାରାଧୀନ ବନ୍ଦୀ ଭାବେ ରହିଛନ୍ତି। ଅନ୍ୟପଟେ ମିଥ୍ୟା ଅଭିଯୋଗରେ ପୋଲିସ ସଙ୍ଗୀନ ଦଫା ଲଗାଇ ସେମାନଙ୍କୁ ଗିରଫ କରିଥିବା ଏବଂ କୋଶଲ ସଂଗ୍ରାମୀଙ୍କୁ ମରଣାନ୍ତକ ଆକ୍ରମଣ ହେବା ସତ୍ତ୍ବେ ପୋଲିସ ମାମଲା ରୁଜୁ ନ କରିବା ପ୍ରତିବାଦରେ କୋଶଲ ସେନା ଆହ୍ବାନରେ ବରଗଡ଼ ଏସ୍ପି ଅଫିସ ଆଗରେ ବିଭିନ୍ନ ସଂଗଠନ ପକ୍ଷରୁ ଧାରଣା ଦିଆଯାଇଥିଲା। ଏହାସତ୍ତ୍ବେ ଖୁଣ୍ଟୁଲିପାଲି ସରକାରୀ ଜମି ଉପରେ ଟେଣ୍ଟ ପକାଇ ଗତ ୫ତାରିଖରୁ ରାତିରେ ଟିକେଟ୍ ଅପେରା ପ୍ରଦର୍ଶନ ଏବଂ ସେଥିପ୍ରତି ପୋଲିସ, ପ୍ରଶାସନ ନୀରବ ଦର୍ଶକ ସାଜିବା ସାଧାରଣରେ ଚର୍ଚ୍ଚାର ବିଷୟ ହୋଇଛି।
କେବଳ ସେତିକି ନୁହେଁ, ଅପେରା ପ୍ରଦର୍ଶନ ପାଇ ଅନୁମତି ଦିଆଯାଇ ନାହିଁ ବୋଲି ପ୍ରଶାସନିକ ଅଧିକାରୀମାନେ କହୁଥିବା ବେଳେ ରାତିରେ ଅପେରାସ୍ଥଳୀରେ ପୋଲିସ ସୁରକ୍ଷାକୁ ନେଇ ଅପେରା ବିରୋଧରେ ଦୀର୍ଘ ଦିନରୁ କୁହୁଳୁ ଥିବା ଅସନ୍ତୋଷ ଆଉ ଏକ ଆନ୍ଦୋଳନ ମୁଣ୍ଡ ଟେକିଛି। ଏହି କ୍ରମରେ କୋଶଲ ସେନାର ବିରବଲ ମହାକୁଡ଼ଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଉପଜିଲାପାଳ ଲଲାଟ କୁମାର ଲୁହାଙ୍କୁ ଭେଟି ଘଟଣାର ଦୃଷ୍ଟି ଆକର୍ଷଣ କରିବା ସହିତ ବିହିତ କାର୍ଯାନୁଷ୍ଠାନ ନେବାକୁ ନିବେଦନ କରିଛନ୍ତି।
ସେହିପରି ବରଗଡ଼ ଜିଲା ଓକିଲ ସଂଘ, ବରଗଡ଼ ସାମ୍ବାଦିକ ସଂଘ ସମେତ ବିଭିନ୍ନ ସଂଗଠନକୁ ଭେଟି ପୋଲିସ, ପ୍ରଶାସନର ଜ୍ଞାତସାରରେ ଜିଲାରେ ହେଉଥିବା ଟିକେଟ୍ ଅପେରା ପ୍ରଦର୍ଶନ ବନ୍ଦ ଦାବିରେ ସହଯୋଗ କରିବାକୁ କୋଶଲ ସେନା ଅନୁରୋଧ କରିଛି। ଏହି ସମ୍ପର୍କରେ ଭେଡ଼େନ ତହସିଲଦାର ନେପାଳ ଚନ୍ଦ୍ର ମୁଣ୍ଡାଙ୍କୁ ପଚାରିବରୁ ଅପେରା ପ୍ରଦର୍ଶନ ଅନୁମତି ସମ୍ପର୍କୀତ କୌଣସି ଚିଠି ସେ ଦେଇ ନ ଥିବା କିମ୍ବା ତାଙ୍କୁ ଚିଠି ମିଳି ନ ଥିବା କହିଛନ୍ତି। ସେହିପରି ଭେଡ଼େନ ଥାନା ଆଇଆଇସି ପ୍ରେମଜିତ୍ ଦାଶ କହିଛନ୍ତି, ଅପେରା ପ୍ରଦର୍ଶନ ପାଇଁ ତାଙ୍କ ପାଖରେ କିଛି ଅର୍ଡ଼ର ନାହିଁ । କିନ୍ତୁ ଶାନ୍ତି ଶୃଙ୍ଖଳା ରକ୍ଷା ପାଇଁ ସେଠାରେ ପୋଲିସ ମୁତୟନ ରହିଥିବା ସେ କହିଛନ୍ତି।
ଅପରପକ୍ଷେ କୋଶଲ ସେନା ସମେତ ଜିଲାର ବିଭିନ୍ନ ସଂଗଠନର ବିରୋଧ ସତ୍ତ୍ବେ ପୋଲିସ ଉପସ୍ଥିତିରେ ଜିଲାରେ ଟିକେଟ୍ ଅପେରା ପ୍ରଦର୍ଶନ ହେବା ଜିଲା ପୋଲିସ, ପ୍ରଶାସନର ଅପାରଗତାକୁ ପଦାରେ ପକାଇଛି ବୋଲି ସାଧାରଣରେ ଆଲୋଚିତ ହେଉଛି। ଟିକେଟ୍ ଅପେରା ଯୋଗୁ ଘୁଡ଼ୁଘୁଡ଼ୁ ପଟି, ଜୁଆଖେଳ, ଚୋରି, ଡକାୟତି ଭଳି ଅପରାଧ ବୃଦ୍ଧି ପାଇବା ଏବଂ ସେତେବେଳେ ଚାଷୀ ଆତ୍ମହତ୍ୟା ଘଟଣା ଘଟିବାରୁ ଗତ ୨୦୦୫ରୁ ବରଗଡ଼ ଜିଲାରେ ଟିକେଟ୍ ଅପେରା ପ୍ରଦର୍ଶନ ନେଇ ଜିଲା ପ୍ରଶାସନ କଟକଣା ଲାଗୁ କରିଥିଲା। ସେହିବର୍ଷରୁ ଜିଲାରେ ଟିକେଟ୍ ଅପେରା ବନ୍ଦ ରହିଥିବା ବେଳେ ବିଭିନ୍ନ ସମୟରେ ଜିଲାର କାଁ ଭାଁ କେଉଁଠି ଟିକେଟ୍ ଅପେରା ପ୍ରଦର୍ଶନ ହେବା ଜଣାପଡ଼ିବା ପରେ ସଚେତନ ନାଗରିକମାନେ ତାକୁ ବିରୋଧ କରି ଆସୁଛନ୍ତି।
ଏପରିକି ଜିଲା ଓକିଲ ସଂଘ ମଧ୍ୟ ଜିଲାରେ ଟିକେଟ୍ ଅପେରା ପ୍ରଦର୍ଶନ ପାଇଁ ଅନୁମତି ନ ଦେବାକୁ ଜିଲା ପ୍ରଶାସନର ଦୃଷ୍ଟି ଆକର୍ଷଣ କରି ଆସିଛି । ସେହିପରି ରାତି ୧୦ଟା ପରେ ଅପେରା ପ୍ରଦର୍ଶନ ନ କରିବା ତଥା ଏହାକୁ ଅବମାନନା କଲେ ସ୍ଥାନୀୟ ପ୍ରଶାସନିକ ଅଧିକାରୀଙ୍କ ବିରୋଧରେ କାର୍ଯାନୁଷ୍ଠାନ ପାଇଁ ଏକ ରାୟରେ ହାଇକୋର୍ଟ ଆଦେଶ କରିଛନ୍ତି। ତେବେ ହାଇକୋର୍ଟଙ୍କ ଏଭଳି ରାୟ ତଥା ଖୁଣ୍ଟୁଲିପାଲିରେ ଅପେରା ପ୍ରଦର୍ଶନ ନ ହେଉଣୁ ତାକୁ ନେଇ ତୁମୁଳକାଣ୍ଡ ଘଟିଥିବା ସତ୍ତ୍ବେ ସେଠାରେ ଖୋଲାଖୋଲି ଅପେରା ପ୍ରଦର୍ଶନ ହେବା ଏବେ ଜିଲାବ୍ୟାପୀ ଚର୍ଚ୍ଚାର ବିଷୟ ହୋଇଛି। ରାଜନୈତିକ ଚାପରେ ପୋଲିସ, ପ୍ରଶାସନ ନିଜେ ଆଇନ ଭାଙ୍ଗୁଛନ୍ତି ଏବଂ ଆଗାମୀ ଦିନରେ ଏହାର ଉଚିତ୍ ଜବାବ୍ ଦିଆଯିବ ବୋଲି କୋଶଲ ସେନାର କୋଶଲ ସଂଗ୍ରାମୀ ମହାକୁଡ଼ ଚେତାବନୀ ଦେଇଛନ୍ତି ।
