ସାରସକଣା/ ଗୋପବନ୍ଧୁ ନଗର,୨୯ା୧୧(ଡି.ଏନ.ଏ.):ମୟୂରଭଞ୍ଜ ଜିଲା ସାରସକଣା ବ୍ଲକ୍ର ବିଭିନ୍ନ ସ୍ଥାନରେ ବିଦ୍ୟୁତ୍ ଟ୍ରାନ୍ସଫର୍ମର ମୁକୁଳା ହୋଇପଡ଼ିଛି। ବିଷେତଃ ଏହା ସ୍କୁଲ୍ ପରିସର ଓ କଲେଜ ଆଗରେ ଥିବାରୁ ଛାତ୍ରୀଛାତ୍ର ବିପଦପୂର୍ଣ୍ଣ ଭାବେ ଯାତାୟାତ କରୁଛନ୍ତି। ଏଥିସହ ଖୁଣ୍ଟା ବ୍ଲକ୍ ପ୍ରବେଶ ପଥରେ ମୁକୁଳା ଟ୍ରାନ୍ସଫର୍ମର ବିପଦକୁ ନିମନ୍ତ୍ରଣ କରୁଛି। ଏଥିପ୍ରତି ବିଭାଗୀୟ କର୍ତ୍ତୃପକ୍ଷ ଧ୍ୟାନଦେବାକୁ ଅଞ୍ଚଳବାସୀ ଦାବି କରିଛନ୍ତି।
ଯେ, ସାରସକଣା ମୁରୁଣିଆ ପଞ୍ଚାୟତ ମହୁଲବରେଇ ଗ୍ରାମର ଶରତପାଳ ମହାବିଦ୍ୟାଳୟ ସମ୍ମୁଖ ରାସ୍ତାକଡ଼ରେ ମୁକୁଳା ଟ୍ରାନ୍ସଫର୍ମର ରହିଛି। ଉକ୍ତ ରାସ୍ତା ଦେଇ ଛାତ୍ରୀଛାତ୍ର ଯାତାୟାତ କରୁଛନ୍ତି। ଏହାକୁ ସ୍ଥାନାନ୍ତର କରାଯିବା ଆବଶ୍ୟକ ବୋଲି ଅଧ୍ୟକ୍ଷ ପୂର୍ଣ୍ଣଚନ୍ଦ୍ର ସାହୁ କହିଛନ୍ତି। ସେହିଭଳି ଉମାଦେଇପୁର ପଞ୍ଚାୟତର ଶଂଶାନଦୀ ଓ ଭଣ୍ଡାରିକୁଡ଼ା ଗ୍ରାମରେ ଥିବା ଶଂଶାନଦୀ ଉଚ୍ଚ ପ୍ରାଥମିକ ବିଦ୍ୟାଳୟର ଖେଳପଡ଼ିଆ କଡ଼ରେ ଏକ ଟ୍ରାନ୍ସଫର୍ମର ମୁକୁଳା ଅବସ୍ଥାରେ ପଡ଼ିରହିଛି। ବିଦ୍ୟାଳୟକୁ ଯାଉଥିବା ଶିଶୁମାନଙ୍କ ସୁରକ୍ଷା ଦୃଷ୍ଟିରୁ ଏହାକୁ ସ୍ଥାନାନ୍ତର କରାଯିବା ଆବଶ୍ୟକ। ଟାଟା ପାୱାର ଅଧିକାରୀମାନେ ଏହାକୁ ନଜର ଦେବାକୁ ଗ୍ରାମର ୱାର୍ଡ ସଭ୍ୟ ତାପସୀ ମୁଣ୍ଡା, ନାଏବ ସରପଞ୍ଚ ଭାସ୍କର ନାଏକ, ମହେନ୍ଦ୍ର ମହାନ୍ତ ଦାବି କରିଛନ୍ତି।
ଅନୁରୂପ ଖୁଣ୍ଟା ବ୍ଲକ୍ ମୁଖ୍ୟ ଫାଟକ ଆଗରେ ଥିବା ମୁକୁଳା ବିପଦସଙ୍କୁଳ ଟ୍ରାନ୍ସଫର୍ମରକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ବ୍ଲକ୍ କାର୍ଯ୍ୟାଳୟକୁ ହଜାର ହଜାର ଲୋକ ବିଭିନ୍ନ କାର୍ଯ୍ୟରେ ଆସୁଥିବା ବେଳେ ଟ୍ରାନ୍ସଫର୍ମରକୁ ଲାଗି ଦୋକାନ ମଧ୍ୟ ରହିଛି। ବ୍ଲକ୍ କାର୍ଯ୍ୟାଳୟ ଫାଟକ ନିକଟରୁ ମାତ୍ର ୩/୪ ହାତ ଦୂରରେ ରହିଥିଲେ ହେଁ କାହାର ନଜର ପଡ଼ୁନି। ଏଥିସହ ବ୍ଲକ୍ଠାରୁ ବିଦ୍ୟୁତ୍ ମୁଖ୍ୟ କାର୍ଯ୍ୟାଳୟ ଓ ସହକାରୀ ଯନ୍ତ୍ରୀଙ୍କ କାର୍ଯ୍ୟାଳୟ ୫ଶହ ମିଟର ଦୂର ହୋଇଥିଲେ ମଧ୍ୟ ଏଥି ପ୍ରତି ଦୃଷ୍ଟି ନ ପଡ଼ିବା ପରିତାପର ବିଷୟ। ଏଣୁ ଧନ ଜୀବନ ସୁରକ୍ଷା ପାଇଁ ବିଭାଗୀୟ କର୍ତ୍ତୃପକ୍ଷ ଯଥା ଶୀଘ୍ର ଏଥିପ୍ରତି ଦୃଷ୍ଟିଦେବାକୁ ଲୋକେ ଦାବି କରିଛନ୍ତି।
