ବ୍ରହ୍ମପୁର,୧୧।୧୦(ନରସିଂହ ସାହୁ): ଭାରତ ସ୍ବାଧୀନତା ପରେ ୧୯୫୧-୧୯୫୨ରୁ ୨୦୧୯ ମଧ୍ୟରେ ରାଜ୍ୟରେ ୧୬ ବିଧାନସଭା ନିର୍ବାଚନ ହୋଇଛି। ବ୍ରହ୍ମପୁର ନିର୍ବାଚନ ମଣ୍ଡଳୀରୁ ଜଣେ ମାତ୍ର ବିଧାୟିକା ନିର୍ବାଚିତ ହୋଇଛନ୍ତି। ସେ ହେଉଛନ୍ତି ମହୁରୀ ରାଣୀ ରତ୍ନ ମଞ୍ଜରୀ ଦେବୀ। ୧୯୭୭ ନିର୍ବାଚନରେ ସେ ସ୍ବାଧୀନ ପ୍ରାର୍ଥିନୀ ଭାବେ ଲଢ଼େଇ କରିଥିଲେ। କଂଗ୍ରେସ ପ୍ରାର୍ଥୀ ପୂର୍ବତନ ମୁଖ୍ୟମନ୍ତ୍ରୀ ବିନାୟକ ଆଚାର୍ଯ୍ୟଙ୍କୁ ବିପୁଳ ଭୋଟରେ ପରାସ୍ତ କରିଥିଲେ। ନିର୍ବାଚନ ବେଳେ ଆଚାର୍ଯ୍ୟ କ୍ଷମତାରେ ଥିଲେ। ସେ ସମୟରେ ବ୍ରହ୍ମପୁର ସହରର ୨୭ ୱାର୍ଡ ଏବଂ କୁକୁଡ଼ାଖଣ୍ଡି ବ୍ଲକର ୧୦ ପଞ୍ଚାୟତକୁ ନେଇ ବ୍ରହ୍ମପୁର ବିଧାନସଭା କ୍ଷେତ୍ର ହୋଇଥିଲା।
ବର୍ତ୍ତମାନ ବିଜେଡି ସରକାର ବିଭିନ୍ନ କ୍ଷେତ୍ରରେ ମହିଳାଙ୍କୁ ଅଗ୍ରାଧିକାର ଦେଉଛନ୍ତି। ପଞ୍ଚାୟତ ଓ ପୌର ନିର୍ବାଚନରେ ୫୦% ଆସନ ମହିଳାଙ୍କ ପାଇଁ ସଂରକ୍ଷିତ ରଖାଯାଇଛି। ତେଣୁ ଆଗାମୀ ୨୦୨୪ ନିର୍ବାଚନରେ ବିଜେଡି ପ୍ରାର୍ଥୀ ହେବାକୁ ଏକାଧିକ ମହିଳା ଆଗ୍ରହ ପ୍ରକାଶ କରିଛନ୍ତି। ବ୍ରହ୍ମପୁର ଆସନ ପାଇଁ ସେମାନେ ଆବେଦନ କରିବାରେ ଲାଗିଛନ୍ତି। ଦରଖାସ୍ତକାରୀଙ୍କ ମଧ୍ୟରେ ଜଣେ ମହାନଗର ନିଗମର ପୂର୍ବତନ ମହିଳା ମେୟର ଅଛନ୍ତି। ଦଳୀୟ ସଂଗଠନର ପଦପଦବୀରେ ଥିବା ଆଉ କେତେ ଜଣ ଆଶାୟୀ ଅଛନ୍ତି। ଅନ୍ୟପକ୍ଷରେ ଲୋକସଭା ଓ ବିଧାନସଭା ନିର୍ବାଚନରେ ୩୩% ସ୍ଥାନ ମହିଳାଙ୍କ ପାଇଁ ସଂରକ୍ଷିତ ହେବାର ବିଧେୟକ ପାର୍ଲାମେଣ୍ଟରେ ପାରିତ ହୋଇ ଆଇନରେ ପରିଣତ ହୋଇଛି। ତେବେ ସେହି ଆଇନ ୨୦୨୯ ନିର୍ବାଚନଠାରୁ ଲାଗୁ ହେବା ଆଶା କରାଯାଉଛି।
ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୦୧୯ ନିର୍ବାଚନରେ ଗଞ୍ଜାମର ୧୩ ବିଧାନସଭା ନିର୍ବାଚନ ମଣ୍ଡଳୀ ମଧ୍ୟରୁ ୫ ଆସନରେ ମହିଳାଙ୍କୁ ପ୍ରାର୍ଥୀ କରିଥିଲେ। ଖଲ୍ଲିକୋଟ, କବିସୂର୍ଯ୍ୟନଗର, ଆସିକା, ସାନଖେମୁଣ୍ଡି ଓ ଚିକିଟି ନିର୍ବାଚନ ମଣ୍ଡଳୀରେ ପ୍ରତିଦ୍ୱନ୍ଦ୍ୱିତା କରୁଥିବା ମହିଳାଙ୍କ ମଧ୍ୟରୁ ୪ଜଣ ନିର୍ବାଚିତ ହୋଇଥିଲେ। ସାନଖେମୁଣ୍ଡି ଆସନରେ ବିଜେଡି ମହିଳା ପ୍ରାର୍ଥୀ ପରାସ୍ତ ହୋଇଥିଲେ। ଆଗାମୀ ନିର୍ବାଚନରେ ୧୩ ନିର୍ବାଚନ ମଣ୍ଡଳୀରୁ ଅର୍ଦ୍ଧାଧିକ ଆସନରେ ବିଜେଡି ମହିଳାଙ୍କୁ ପ୍ରାର୍ଥୀ କରିପାରେ ବୋଲି କର୍ମୀ ମହଲରେ ଚର୍ଚ୍ଚା ହେଉଛି। ତେଣୁ ଏବେଠୁ ମହିଳା କର୍ମୀ ଓ ନେତ୍ରୀଙ୍କ ଆଗ୍ରହ ବଢ଼ି ଯାଇଥିବା ଲକ୍ଷ୍ୟ କରାଯାଇଛି। ବିଜେଡି ସୁପ୍ରିମୋଙ୍କ ପଦକ୍ଷେପକୁ ଅପେକ୍ଷା କରାଯାଇଛି।
ସୂଚନାଯୋଗ୍ୟ, ସ୍ବତନ୍ତ୍ର ଓଡ଼ିଶା ପ୍ରଦେଶ ଗଠନ ପରେ ୧୯୩୭ରେ ହୋଇଥିବା ନିର୍ବାଚନରେ ବ୍ରହ୍ମପୁର ଆସନ ମହିଳାଙ୍କ ପାଇଁ ସଂରକ୍ଷିତ ଥିଲା। ସ୍ବର୍ଗତ ରାଷ୍ଟ୍ରପତି ଭିଭି ଗିରିଙ୍କ ସାନ ଭଉଣୀ ଡି. ଲକ୍ଷ୍ମୀବାଇ କଂଗ୍ରେସର ବିଧାୟିକା ହୋଇଥିଲେ। ପରବର୍ତ୍ତୀ ଦ୍ୱିତୀୟ ନିର୍ବାଚନରେ ମଧ୍ୟ ଲକ୍ଷ୍ମୀବାଇ ଏହି ଆସନରୁ କଂଗ୍ରେସରୁ ଜିତିବା ପରେ ବିଧାନସଭାର ପ୍ରଥମ ମହିଳା ଉପବାଚସ୍ପତି ହୋଇଥିଲେ। ଏବେ ବ୍ରହ୍ମପୁର ବିଧାନସଭା କ୍ଷେତ୍ର ଅତି ସୁବିଧା ହୋଇଛି। ମହାନଗରର ୪୨ ୱାର୍ଡରୁ ୩୬ଟିକୁ ନେଇ ନିର୍ବାଚନ ମଣ୍ଡଳୀ ହୋଇଛି। ଅବଶିଷ୍ଟ ୱାର୍ଡ ଗୋପାଳପୁର କ୍ଷେତ୍ରରେ ଅଛି। ତେଣୁ ଏହି ଆସନ ଉପରେ ମହିଳାଙ୍କ ନଜର ପଡ଼ିଛି।
