ବିଶୋଇ, ୨୪।୦୪(ଡି.ଏନ.ଏ): ମୟୂରଭଞ୍ଜ ଜିଲାର ରାଇରଙ୍ଗପୁର ବନଖଣ୍ଡ ଅନ୍ତର୍ଗତ ବିଶୋଇ ବନ୍ୟପ୍ରାଣୀ ବନାଞ୍ଚଳର ସରଗଡା ବନାଞ୍ଚଳ ଅଧିନ କଁଳାପାଟ ସଂରକ୍ଷିତ ଜଙ୍ଗଲ ନିକଟରେ ଦନ୍ତା ହାତୀ ଆକ୍ରମଣରେ ଜଣେ ମହିଳା ଗୁରୁତର ହୋଇଥିବା ସୂଚନା ମିଳିଛି। ଗୁରୁତର ମହିଳା ଜଣଙ୍କ ହେଲେ ସରଗଡ଼ା ପଞ୍ଚାୟତର ଦଳେଇଡ଼ିହି ଗ୍ରାମର ପାନ ସର୍ଦ୍ଧାର (୪୮)।
ପାନ ଆଜି ସକାଳ ୧୦ ଘଟିକା ସମୟରେ ନିଜ ଘରପାଖ ୨ଶହ ମିଟର ଦୂରରେ ଥିବା କଁଳାପାଟ ଜଙ୍ଗଲକୁ ପତର ଗଟାଇବା ପାଇଁ ଯାଇଥିଲେ। ପତ୍ର ଗୋଟାଉଥିବା ସମୟରେ ପାନ ଏକ ଦନ୍ତା ହାବୁଳରେ ପଡିଯାଇଥିଲେ। ହାତୀଟି ପ୍ରଥମେ ପାନଙ୍କୁ ଶୁଣ୍ଢରେ ଧରି ଘୋଷାରିଥିଲା ତେବେ ଏହି ସମୟରେ ଶାଢ଼ିଟି ହାତୀର ଷୁଣ୍ଡରେ ଗୁଡ଼ାଇ ହୋଇଥିଲା ଫଳରେ ପାନ ତଳେ ପଡିଯାଇଥିଲେ। ମାତ୍ର,ଶାଢିଟିକୁ ଛାଡି ପାନ ହାତୀ କବଳରୁ କୌଶଳ କ୍ରମେ ଖସି ଦୌଡ଼ି ପଳାଇଥିଲେ। ଏହି ସମୟରେ ଜଙ୍ଗଲ ନିକଟରେ ଥିବା ଗୋରୁ ଚରାଳିମାନେ ପାନଙ୍କ ଚିତ୍କାର ଶୁଣି ଘଟଣାସ୍ଥଳକୁ ପହଞ୍ଚିଥିଲେ। ଫଳରେ ହାତୀଟି ଜଙ୍ଗଲ ଭିତରକୁ ପଳାଇଥିଲା। ପରେ ଗାଁ ଲୋକେ ବନ ବିଭାଗକୁ ଖବର ଦେଇଥିଲେ। ସରଗଡା ବନପାଳ ଜୀବନ ବଲ୍ଲଭ ପାତ୍ରଙ୍କ ନେତୃତ୍ୱରେ ଫାୟାର ସ୍କ୍ବାର୍ଡ ଓ ସବୁଜ ବାହିନି ଟିମ ଘଟଣାସ୍ଥଳକୁ ପହଞ୍ଚି ପାନକୁ ଗୁରୁତର ଅବସ୍ଥାରେ ଉଦ୍ଧାର କରି ବନ ବିଭାଗ ଗାଡ଼ିରେ ଗୁରୁତର ପାନଙ୍କୁ ରାଇରଙ୍ଗପୁର ହସ୍ପିଟାଲରେ ଭର୍ତ୍ତି କରାଇଥିଲେ। ପାନଙ୍କ ଚିକିତ୍ସା ନିମନ୍ତେ ବନ ବିଭାଗ ପକ୍ଷରୁ ଚିକିତ୍ସା ପାଇଁ ସମସ୍ତ ବ୍ୟବସ୍ଥା କରାଯାଇଛି। ତେବେ ପାନଙ୍କ ଆଖି ଓ କାନରେ ଆଘାତ ଲାଗିଥିବା ବେଳେ ପାନଙ୍କୁ ବାରିପଦା ପିଆରଏମକୁ ହସ୍ତାନ୍ତର କରାଯାଇଛି।
ସୂଚନାଥାଉକି, ଗତ କିଛିଦିନ ଧରି ସରଗଡା ବନାଞ୍ଚଳର କଁଳାପାଟ ଓ ସରାଳି ସଂରକ୍ଷିତ ଜଙ୍ଗଲରେ ୨ ଗୋଟି ଦନ୍ତା, ୨ ମାଈ ହାତୀ ଓ ଗୋଟିଏ ହାତୀ ଛୁଆ ବୁଲୁଥିବା ବେଳେ ଏହି ହାତୀ ମାନଙ୍କୁ ବନବିଭାଗ ପକ୍ଷରୁ ଟ୍ରେସ କରାଯାଇ ଘଉଡାଇବା ନିମନ୍ତେ ବନ ବିଭାଗ ପକ୍ଷରୁ ପ୍ରୟାସ ଜାରି ରହିଛି।
