ନାଉଗାଁ,୧୧ା୫(ସ୍ବ.ପ୍ର.): ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ର ସଫଳ ରୂପାୟନ ସହ କାର୍ଯ୍ୟରେ ସ୍ବଚ୍ଛତା ପାଇଁ କେନ୍ଦ୍ର ସରକାରଙ୍କ ପକ୍ଷରୁ ପ୍ରତ୍ୟେକ ରାଜ୍ୟର କମିଶନରଙ୍କ ନିକଟକୁ ନ୍ୟାଶନାଲ ମୋବାଇଲ ମନିଟରିଂ ସିଷ୍ଟମ (ଏନ୍ଏମ୍ଏମ୍ଏସ୍) ଆପ୍କୁ ବାଧ୍ୟତାମୂଳକ କରାଯାଇଛି। ଉକ୍ତ ଆପ୍ ମାଧ୍ୟମରେ ଏମ୍ଜିଏନ୍ଆର୍ଇଜିଏସ୍ର ସଫଳ ରୂପାୟନ ହେବା ସହ ଗ୍ରାମାଞ୍ଚଳର ଲୋକେ ଠିକ୍ ଭାବେ ଶ୍ରମ ପାଇପାରିବେ। କିନ୍ତୁ ଜଗତ୍ସିଂହପୁର ଜିଲା ନାଉଗାଁ ବ୍ଲକରେ ଉକ୍ତ ଆପ୍କୁ ଠିକ୍ ଭାବେ ପରିଚାଳନା କରାଯାଉ ନ ଥିବା ଜଣାଯାଇଛି। ୨ଟି ପଞ୍ଚାୟତର ୨ଟି ପ୍ରକଳ୍ପରେ ଗୋଟିଏ ଫଟୋକୁ ଏନ୍ଏମ୍ଏମ୍ଏସ୍ ଆପ୍ରେ ଅପ୍ଲୋଡ୍ କରାଯାଇଛି। ଯାହାକି ସାମାଜିକ କର୍ମୀ କ୍ରାନ୍ତିଶିଖା ପରିଡ଼ା ସୋସିଆଲ ମିଡିଆରେ ଭାଇରାଲ କରିଛନ୍ତି।
ବ୍ଲକର ଗଜରାଜପୁର ପଞ୍ଚାୟତର ଖଇରାହୋଲିସ୍ଥିତ ଅମୃତ ସରୋବର ପୋଖରୀର ପୁନରୁଦ୍ଧାର ଓ ଓଷକଣା ପଞ୍ଚାୟତ ଅମୃତ ସରୋବର ନୂଆ ପୋଖରୀ ଖନନରେ କାର୍ଯ୍ୟ ଚାଲିଛି। ହେଲେ ଏହି କାର୍ଯ୍ୟ କରୁଥିବା ଜବ୍କାର୍ଡଧାରୀ ଶ୍ରମିକଙ୍କ ଗୋଟିଏ ଫଟୋକୁ ୨ଟି ପୋଖରୀ ଖନନ କାର୍ଯ୍ୟ କରାଯାଉଥିବା ନେଇ ଏନ୍ଏମ୍ଏମ୍ଏସ୍ ଆପ୍ ମାଧ୍ୟମରେ ଅପ୍ଲୋଡ୍ କରାଯାଇଥିବା ଏମ୍ଜିଏନ୍ଆର୍ଇଜିଏସ୍ ପୋର୍ଟାଲରୁ ଜଣାଯାଇଛି। ପୋର୍ଟାଲ ତଥ୍ୟ ଅନୁସାରେ, ୧୮ ଏପ୍ରିଲ ୨୦୨୩ରେ ଗଜରାଜପୁର ପଞ୍ଚାୟତର ମଷ୍ଟରରୋଲ ନଂ.୧୯୯ରେ ଏହି ଫଟୋ ଅପ୍ଲୋଡ୍ କରାଯାଇଥିବା ବେଳେ ଓଷକଣା ପଞ୍ଚାୟତର ମଷ୍ଟରରୋଲ ନଂ.୨୨୨ରେ ସମାନ ଜବ୍କାର୍ଡଧାରୀ ଶ୍ରମିକମାନେ କାର୍ଯ୍ୟ କରୁଥିବା ସ୍ଥାନର ଫଟୋ ଅପ୍ଲୋଡ୍ ହୋଇଛି। ଗୋଟିଏ ଫଟୋ କିପରି ୨ଟି ପଞ୍ଚାୟତର ୨ଟି ପ୍ରକଳ୍ପରେ ଏନ୍ଏମ୍ଏମ୍ଏସ୍ ଆପ୍ରେ ଅପ୍ଲୋଡ୍ କରାଗଲା ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। କେବଳ ଏହି ୨ ପ୍ରକଳ୍ପ ନୁହେଁ, ପ୍ରତ୍ୟହ ପୁରୁଣା ଫଟୋକୁ ଆପ୍ ମାଧ୍ୟମରେ ଅପ୍ଲୋଡ୍ କରି ଜବ୍କାର୍ଡଧାରୀ ଶ୍ରମିକମାନଙ୍କ ଉପସ୍ଥାନ ପକାଇ ଟଙ୍କା ଉଠାଣ କରାଯାଉଥିବା ଅଭିଯୋଗ ହେଉଛି। ଏତାଦୃଶ କାର୍ଯ୍ୟକୁ ଦେଖିଲେ ଉକ୍ତ ବ୍ଲକରେ କାର୍ଯ୍ୟକାରୀ କରାଯାଉଥିବା ଏମ୍ଜିଏନ୍ଆର୍ଇଜିଏସ୍ର କାର୍ଯ୍ୟର ସ୍ବଚ୍ଛତା ଉପରେ ଅଙ୍ଗୁଳି ନିର୍ଦ୍ଦେଶ କରୁଛି। ଏହାର ଉଚ୍ଚସ୍ତରୀୟ ତଦନ୍ତ କରାଗଲେ ବହୁ ତଥ୍ୟ ପଦାକୁ ଆସିପାରିବ ବୋଲି କ୍ରାନ୍ତିଶିଖା ମତବ୍ୟକ୍ତ କରିଛନ୍ତି। ଏ ସମ୍ପର୍କରେ ଭାରାପ୍ରାପ୍ତ ସହକାରୀ କାର୍ଯ୍ୟକ୍ରମ ଅଧିକାରୀ ଗୌରବ ନନ୍ଦଙ୍କୁ ପଚାରିବାରେ ଏହା ତଦନ୍ତ କରାଯାଇ ପଦକ୍ଷେପ ନିଆଯିବ ବୋଲି ସେ କହିଛନ୍ତି।
