ନୂଆଦିଲ୍ଲୀ, ୩୧ା୧୦: ଭାରତରେ ଶିଶୁ ବିରୋଧୀ ଅପରାଧ ଉଦ୍ବେଗଜନକ ଭାବେ ବଢ଼ିଚାଲିଛି। ୨୦୨୧ରେ କେବଳ ଶିଶୁଙ୍କୁ ଯୌନ ଅପରାଧରୁ ସୁରକ୍ଷା ଦେବା ପାଇଁ ଉଦ୍ଦିଷ୍ଟ ପୋକ୍ସୋ ଆଇନ ବଳରେ ୫୩,୮୭୪ ମାମଲା ରୁଜୁ ହୋଇଥିବା ଜାତୀୟ ଅପରାଧ ରେକଡର୍ସ ବ୍ୟୁରୋ(ଏନ୍ସିଆର୍ବି) ତଥ୍ୟ କହୁଛି। ଚିନ୍ତାର ବିଷୟ ହେଉଛି ଶିଶୁଙ୍କ ବିରୋଧରେ ଘଟୁଥିବା ଅପରାଧ ମଧ୍ୟରେ ପ୍ରତି ୩ରୁ ଗୋଟିଏ ହେଉଛି ଯୌନ ସମ୍ପର୍କିତ। ଅର୍ଥାତ ଅପରାଧର ଶିକାର ହେଉଥିବା ପିଲାଙ୍କ ମଧ୍ୟରୁ ପ୍ରତି ୩ ଜଣରେ ଜଣେ ଯୌନ ନିର୍ଯାତନା ଭୋଗୁଛନ୍ତି ବୋଲି ଏନ୍ସିଆର୍ବି ଡାଟାରୁ ଜଣାପଡ଼ିଛି।
ଅନୁସାରେ, ୨୦୨୧ରେ ମୋଟ ୧,୪୯,୪୦୪ ଶିଶୁ ବିରୋଧୀ ଅପରାଧ ମାମଲା ରୁଜୁ ହୋଇଛି। ୨୦୨୦ରେ ଏହି ସଂଖ୍ୟା ୧,୨୮,୫୩୧ ରହିଥିଲା। ଅର୍ଥାତ ବର୍ଷକରେ ଏହି ମାମଲା ୧୬.୨% ବଢ଼ିଛି। ଏହାକୁ ଦେଖିଲେ ପିଲାଙ୍କ ବିରୋଧରେ ପ୍ରତି ତୃତୀୟ ଅପରାଧ ସମ୍ପର୍କିତ ମାମଲା ପୋକ୍ସୋ ଆଇନ ବଳରେ ରୁଜୁ ହୋଇଛି। ଗତବର୍ଷ ପୋକ୍ସୋ ଆଇନର ଧାରା ୪ ଏବଂ ୬ ଅଧୀନରେ ୩୩,୩୪୮ ମାମଲା ରହିଛି। ସେଥିମଧ୍ୟରେ ୩୩,୦୩୬ ଅପରାଧ ଝିଅଙ୍କ ବିରୋଧରେ ହୋଇଥିବାବେଳେ ୩୧୨ ପୁଅ ଯୌନ ନିର୍ଯାତନାର ଶିକାର ହୋଇଛନ୍ତି। ସେହିପରି ୬୭,୨୪୫ ଅପହରଣ ମାମଲା ଦେଶରେ ପୋଲିସ ସକ୍ରିୟତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ୨୦୨୧ରେ ରୁଜୁ ହୋଇଥିବା ଶିଶୁ ବିରୋଧୀ ମାମଲାରେ ଦିଲ୍ଲୀ ସର୍ବାଗ୍ରେ ରହିଛି। କେନ୍ଦ୍ରଶାସିତ ଅଞ୍ଚଳରେ ଏପରି କେସ୍ ସର୍ବନିମ୍ନ ରହିଛି। ନାଗାଲାଣ୍ଡରେ ସବୁଠାରୁ କମ୍ ଶିଶୁ ବିରୋଧୀ ଅପରାଧ ମାମଲା ରୁଜୁ ହୋଇଥିବା ଏନ୍ସିଆର୍ବି ଡାଟା କହୁଛି। ୨୦୨୦ରେ ଏପରି ଅପରାଧ ହାର ୨୮.୯% ଥିବାବେଳେ ୨୦୨୧ରେ ତାହା ୩୩.୬କୁ ବୃଦ୍ଧି ପାଇଛି।
ଆହୁରି ଜଣାପଡ଼ିଛି, ଗତ ବର୍ଷ ୧୪୦ ଶିଶୁଙ୍କୁ ବଳାତ୍କାର ପରେ ହତ୍ୟା କରାଯାଇଛି।
ସେହିପରି ଆଉ ୧,୪୦୨ ଶିଶୁ ହତ୍ୟାର ଶିକାର ହୋଇଛନ୍ତି। ଏପରି ମାମଲା ଉତ୍ତରପ୍ରଦେଶରେ ସବୁଠାରୁ ଅଧିକ ରହିଛି। ଶିଶୁ ଅପହରଣ ମାମଲାରେ ମହାରାଷ୍ଟ୍ର (୯,୪୧୫) ଶୀର୍ଷରେ ରହିଛି। ଏହା ତଳକୁ ମଧ୍ୟପ୍ରଦେଶ (୮,୨୨୪), ଦିଲ୍ଲୀ (୫,୩୪୫), ଓଡ଼ିଶା (୫,୧୩୫) ଏବଂ ପଶ୍ଚିମବଙ୍ଗ (୪,୦୨୬) ରହିଛି। ୨୯,୩୬୪ ଶିଶୁଙ୍କୁ ନିଖୋଜ ଘୋଷଣା କରାଯାଇଛି। ସେହିପରି ଗତବର୍ଷ ୧,୦୪୬ ଶିଶୁଙ୍କୁ ଚାଲାଣ କରାଯାଇଛି। ଶିଶୁ ଶ୍ରମ ଆଇନରେ ୨୦୨୧ରେ ୯୮୨ ମାମଲା ରହିଛି। ଏହି ମାମଲାରେ ତେଲଙ୍ଗାନାରେ ସର୍ବାଧିକ ରୁଜୁ ହୋଇଛି।
ଗତବର୍ଷ ବାଲ୍ୟବିବାହ ୧,୦୬୨ ମାମଲା ରହିଥିବାବେଳେ ଏହି ତାଲିକାର ଶୀର୍ଷରେ କର୍ନାଟକ, ତାମିଲନାଡ଼ୁ ଏବଂ ଆସାମ ରହିଛି। ଅନ୍ୟପକ୍ଷରେ ଗତ ୫ବର୍ଷରେ ଶିଶୁ ଅଧିକାର ସୁରକ୍ଷା ନିମନ୍ତେ ଉଦ୍ଦିଷ୍ଟ ଜାତୀୟ ଆୟୋଗ (ଏନ୍ସିପିସିଆର୍) ନିକଟରେ ପ୍ରାୟ ୫୧,୦୦୦ ଶିଶୁ ନିର୍ଯାତନା ଅଭିଯୋଗ ଆସିଥିବା ସରକାରୀ ତଥ୍ୟରୁ ଜଣାପଡ଼ିଛି।
