ଭୁବନେଶ୍ୱର,୨୩।୧(ବ୍ୟୁରୋ):ହକି ବିଶ୍ୱକପ୍କୁ ନେଇ କଳିଙ୍ଗ ଷ୍ଟାଡିୟମ୍ ଓ ଆଖପାଖ ଅଞ୍ଚଳ ରଙ୍ଗିନ ଆଲୋକମାଳାରେ ଝଲସୁଛି। ସେପଟେ ଡଟ୍ଫେଷ୍ଟ ଆୟୋଜିତ ହେଉଥିବା ୟୁନିଟ୍-୩ ଅଞ୍ଚଳର ଆଲୋକୀକରଣ ଆଖି ଝଲସେଇ ଦେଉଛି। ତେବେ ଆଲୋକର ଆବଶ୍ୟକତା ରହିଥିବା ସହରର ଅନେକ ଅଞ୍ଚଳ ଏବେ ବି ଅନ୍ଧାର ଘେରରେ ରହିଛି। ସହରର ଅନେକ ଅଞ୍ଚଳରେ ଷ୍ଟ୍ରିଟ୍ ଲାଇଟ୍ ଦୀର୍ଘଦିନ ଧରି ଅଚଳ ରହିଛି। ଜୟଦେବ ବିହାର ଅଞ୍ଚଳକୁ ଚିକ୍ମିକ୍ ଆଲୋକରେ ସଜାଯାଇଥିବାବେଳେ ଜୟଦେବ ବାଟିକା ଅଞ୍ଚଳରେ ମାସ ମାସ ଷ୍ଟ୍ରିଟ୍ ଲାଇଟ୍ ମରାମତି କରାଯାଉ ନାହିଁ। ଖଣ୍ଡଗିରି ଜୟଦେବ ବାଟିକା ମୁଖ୍ୟ ଫାଟକ ନିକଟରୁ ଆମ୍ରି ହସ୍ପିଟାଲ ପର୍ଯ୍ୟନ୍ତ ଓ ଜଗମୋହନ ନଗର ଛକରୁ ଆଜାଦ ମାର୍ଗ ପର୍ଯ୍ୟନ୍ତ ହାତଗଣତି କେତୋଟି ଷ୍ଟ୍ରିଟ୍ ଲାଇଟ୍କୁ ବାଦ ଦେଲେ ଅଧିକାଂଶ ଅଚଳ ରହିଥିବାରୁ ଏସବୁ ଅଞ୍ଚଳ ଅନ୍ଧାର ରହୁଛି। ଲକ୍ଷ୍ମୀସାଗର ଅଞ୍ଚଳରୁ ମଧ୍ୟ ସମାନ ଅଭିଯୋଗ ଆସୁଛି। କେତେକ ଷ୍ଟ୍ରିଟ୍ ଲାଇଟ୍ ଦିନରାତି ଧପ୍ଧପ୍ ହୋଇ ଜଳୁଛି। ସେହିପରି ଜାତୀୟ ରାଜପଥ ଓଭର ବ୍ରିଜ୍ ଉପରେ ମଧ୍ୟ ଅନେକ ସ୍ଥାନରେ ସମାନ ପରିସ୍ଥତି ଦେଖିବାକୁ ମିଳୁଛି। କେତେକ ଇଲେକ୍ଟ୍ରି ଖୁଣ୍ଟରେ କୌଣସି ବିବରଣୀ ନ ଥିବାରୁ ଅଭିଯୋଗ କରିବାରେ ମଧ୍ୟ ସମସ୍ୟା ହେଉଥିବା ଅଞ୍ଚଳବାସୀ କହିଛନ୍ତି।
