ଖଜୁରିପଡ଼ା,୩ା୫ (ବିଦୁର ବେହେରା): ଖଜୁରିପଡ଼ା ବ୍ଲକ୍ କନ୍ଧମାଳ ଜିଲାର ପ୍ରବେଶ ଦ୍ୱାରରେ ଅବସ୍ଥିତ। ବନ ପାହାଡ଼ ଘେରରେ ରହିଛି ୧୪ ପଞ୍ଚାୟତ। ରାଜସ୍ବ ସମସ୍ୟା ସୁଧାରିବା ପାଇଁ ଖଜୁରିପଡ଼ାଠାରେ ତହସିଲଦାରଙ୍କ କାର୍ଯ୍ୟାଳୟ ରହିଛି। ଏହି ତହସିଲ ଅଧୀନରେ ୬ଟି ରାଜସ୍ବ ନୀରିକ୍ଷକଙ୍କ କାର୍ଯ୍ୟାଳୟ ରହିଛି। ପ୍ରତ୍ୟେକ ରାଜସ୍ବ ନୀରିକ୍ଷକଙ୍କ କାର୍ଯ୍ୟାଳୟରେ କର୍ମଚାରୀ ଅଭାବ ରହିଛି। ତେଣୁ ସାଧାରଣ ଜନତା କୌଣସି କାର୍ଯ୍ୟରେ ଆସିଲେ ହଇରାଣ ହୁଅନ୍ତି। ଅନ୍ୟପକ୍ଷେ ରାଜସ୍ବ ନୀରିକ୍ଷକ ଅଧିକାରୀଙ୍କ ଉପରେ ରାଜସ୍ବ ବିଭାଗର କାର୍ଯ୍ୟଭାର ରହିବା ସହିତ ଅନ୍ୟାନ୍ୟ କାର୍ଯ୍ୟଭାର ଦିଆଯାଉଛି। ଫଳରେ କର୍ମଚାରୀ ଅଭାବ ଯୋଗୁ ରାଜସ୍ବ ନୀରିକ୍ଷକ ଅଧିକାରୀମାନେ ସବୁ କାମ ସଠିକ ସମୟରେ ତୁଲାଇ ପାରୁ ନାହାନ୍ତି।
ରାଜସ୍ବ ନୀରିକ୍ଷକଙ୍କ କାର୍ଯ୍ୟାଳୟରେ ଜଣେ ରାଜସ୍ବ ନୀରିକ୍ଷକ ଅଧିକାରୀ, ଅତିରିକ୍ତ ରାଜସ୍ବ ନୀରିକ୍ଷକ ଅଧିକାରୀ, ଅମିନ ଏବଂ ଜଣେ ପିଅନ ରହିବା କଥା। କିନ୍ତୁ ଜଣେ ପିଅନ ଓ ରାଜସ୍ବ ନୀରିକ୍ଷକ ଅଧିକାରୀ କାର୍ଯ୍ୟାଳୟ ଚଳାଉଛନ୍ତି। ଆର୍.ନୂଆଁଗାଁ ଏବଂ ବଲସକୁମ୍ପା ରାଜସ୍ବ ନୀରିକ୍ଷକ କାର୍ଯ୍ୟାଳୟରେ ଜଣେ ରାଜସ୍ବ ନୀରିକ୍ଷକ ଅଧିକାରୀ ହିଁ କାର୍ଯ୍ୟାଳୟ ଚଳାଉଛନ୍ତି। ରାଜସ୍ବ ନୀରିକ୍ଷକ ଅଧିକାରୀମାନେ ଜାତି ଗତ ପ୍ରମାଣ ପତ୍ର, ବାସିନ୍ଦା ପ୍ରମାଣ ପତ୍ର, ଆୟ ପ୍ରଣାମ ପତ୍ର, ଲିଗାଲ ହେୟାର ସାର୍ଟିଫିକେଟ, ଖଜଣା ଆଦାୟ ଭଳି ବିଭିନ୍ନ ରାଜସ୍ବ ବିଭାଗର କାର୍ଯ୍ୟ କରିବା ସହିତ ଅତିରିକ୍ତ କାର୍ଯ୍ୟ, ସୁଭଦ୍ରା ଯୋଜନା ଯାଞ୍ଚ କରିବା, କୃଷକ ରେଜିଷ୍ଟ୍ରେଶନ କରିବା କରିବା ଭଳି କାର୍ଯ୍ୟଭାର ତୁଲାଉଛନ୍ତି। ପ୍ରତିଟି କାର୍ଯ୍ୟ ସଠିକ ସମୟରେ ନ ହେବାରୁ ସାଧାରଣ ଜନତା ହନ୍ତସନ୍ତ ହେଉଛନ୍ତି। ତେଣୁ ସରକାର ଏହି ସମସ୍ୟା ଉପରେ ଗୁରୁତ୍ୱ ଦେଇ କର୍ମଚାରୀ ପୂରଣ କରିବା ପାଇଁ ବ୍ଲକ୍ କଂଗ୍ରେସ ଦାବି କରିଛି।
