ନୂଆଦିଲ୍ଲୀ: କରୋନା ପରେ ରାଜସ୍ବ ସଂଗ୍ରହ କ୍ଷତିଗ୍ରସ୍ତ ହୋଇଛି। କେନ୍ଦ୍ର ପକ୍ଷରୁ ମିଳୁଥିବା ଜିଏସ୍ଟି କ୍ଷତିପୂରଣ ପାଣ୍ଠି ମଧ୍ୟ ପ୍ରଭାବିତ ସ୍ଥିତିରେ ରହିଛି। ଏହାକୁ ବିଚାର କରି କେନ୍ଦ୍ର ସରକାର ରାଜ୍ୟଗୁଡ଼ିକୁ ବଜାରରୁ ଋଣ ଉଠାଇବା ଲାଗି ଅନୁମତି ଦେଇଛନ୍ତି। କେନ୍ଦ୍ର ସରକାରଙ୍କ ଅନୁମତି ପରେ ଓଡ଼ିଶା ଖୋଲା ବଜାରରୁ ୨୮୫୮କୋଟି ଟଙ୍କା ଅତିରିକ୍ତ ଋଣ କରିପାରିବ। ସେହିଭଳି ରାଜ୍ୟ ୧୫୩୮ କୋଟି ଟଙ୍କା ସ୍ପେଶାଲ ଓ୍ବିଣ୍ଡୋରୁ ଉଠାଇଥିବା ଅର୍ଥ ମନ୍ତ୍ରଣାଳୟ ରିପୋର୍ଟରୁ ଜଣାପଡିଛି।
ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳଗୁଡ଼ିକ ଲାଗି ଏହି ଅର୍ଥ ରାଶିକୁ କେନ୍ଦ୍ର ସରକାର ସ୍ପେଶାଲ ଓ୍ବିଣ୍ଡୋରୁ ଋଣ କରୁଛନ୍ତି। ଜିଏସ୍ଟି ନିଅଣ୍ଟ ଭରଣା କରିବା ଲାଗି ୧.୧୦ ଲକ୍ଷ କୋଟି ଟଙ୍କାର ଅର୍ଥ ରାଶି ଏହି ବାବଦକୁ ଋଣ କରାଯିବ। ଏହି ରାଶି ବାଦ୍ ରାଜ୍ୟଗୁଡ଼ିକୁ ଅତିରିକ୍ତ ଅର୍ଥ ମଧ୍ୟ ଋଣ କରିବା ଲାଗି ଅନୁମତି ମିଳିଛି। ରାଜ୍ୟ ସେମାନଙ୍କ ମୋଟ ରାଜ୍ୟ ଜିଡିପିର ୦.୫% ଅର୍ଥ ଋଣ କରିପାରିବେ। ବିକଳ୍ପ ୧ ଚୟନ କରିଥିଲେ ଏହି ରାଶି ଋଣ କରିବାକୁ ଅନୁମତି ମିଳିବ। ଏହାଦ୍ୱାରା ରାଜ୍ୟ ଅତିରିକ୍ତ ପୁଞ୍ଜି ସଂଗ୍ରହ କରିବାକୁ ସକ୍ଷମ ହେବେ ବୋଲି ମନ୍ତ୍ରଣାଳୟ କହିଛି। ବର୍ତ୍ତମାନ ସୁଦ୍ଧା ୨୮ ରାଜ୍ୟ ୧.୦୬ ଲକ୍ଷ କୋଟି ଟଙ୍କା ଋଣ କରିବା ଲାଗି ଅନୁମତି ପ୍ରଦାନ କରାଯାଇଛି।
କେନ୍ଦ୍ର ସରକାର ଜିଏସ୍ଟି କ୍ଷତିପୂରଣ ରାଶିର ଷଷ୍ଠ କିସ୍ତି ଭାବେ ରାଜ୍ୟଗୁଡିକୁ ୬ ହଜାର କୋଟି ଟଙ୍କା ପ୍ରଦାନ କରିଛନ୍ତି। ଜିଏସ୍ଟି କ୍ଷତିପୂରଣ ନିଅଣ୍ଟିଆ ସ୍ଥିତିକୁ ଭରଣା କରିବା ଲାଗି କେନ୍ଦ୍ର ସରକାର ଏଭଳି ବ୍ୟବସ୍ଥା କରିଛନ୍ତି। ବର୍ତ୍ତମାନ ସୁଦ୍ଧା ଏଭଳି ଭାବେ ରାଜ୍ୟଗୁଡିକୁ ମୋଟ ୩୬ ହଜାର କୋଟି ଟଙ୍କା ପ୍ରଦାନ କରାଯାଇଛି ବୋଲି ଅର୍ଥ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ଚଳିତ ଥର ପ୍ରଦାନ କରାଯାଇଥିବା ମୋଟ ୬ ହଜାର କୋଟି ଟଙ୍କା ମଧ୍ୟରୁ ୨୩ ରାଜ୍ୟକୁ ୫୫୧୬ କୋଟି ଟଙ୍କା ପ୍ରଦାନ କରାଯାଇଛି। ଦିଲ୍ଲୀ, ଜମ୍ମୁ ଏବଂ କଶ୍ମୀର ଓ ପୁଡୁଚେରୀ ଭଳି ୩ କେନ୍ଦ୍ର ଶାସିତ ଅଞ୍ଚଳକୁ ୪୮୩.୪୦ କୋଟି ଟଙ୍କା ଦିଆଯାଇଛି। ଅରୁଣାଚଳ ପ୍ରଦେଶ, ମଣିପୁର, ମିଜୋରାମ, ନାଗାଲାଣ୍ଡ ଏବଂ ସିକିମ୍ ରାଜସ୍ବରେ ବେଶି ଅନ୍ତର ନ ଥିବାରୁ କ୍ଷତିପୂରଣ ପାଇନାହାନ୍ତି।
