ଭୁବନେଶ୍ୱର,୧୦।୬:ରାଜ୍ୟ ଓ କେନ୍ଦ୍ର ସରକାରଙ୍କ ସହଯୋଗରେ ବିକାଶ ଇକୋ ରିସର୍ଟସ୍ ଚିଲିକାର ବରକୁଳଠାରେ ରାଜ୍ୟର ପ୍ରଥମ ବିଳାସପୂର୍ଣ୍ଣ ହାଉସ୍ ବୋଟ୍ ‘ଗରୁଡ଼’ର ଶୁଭାରମ୍ଭ କରିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭର୍ଚୁଆଲ୍ ମୋଡ୍ରେ ଏହାର ଉଦ୍ଘାଟନ କରି କହିଥିଲେ, ଏଭଳି ମନଲୋଭା ସେବା ଜରିଆରେ ଓଡ଼ିଶା ପର୍ଯ୍ୟଟନ ମଧ୍ୟ ଭାରତରେ ଏକ ଇକୋ ଟୁରିଜମ୍ ଡେଷ୍ଟିନେଶନ ହେବ। ସେହିଭଳି ଆଗାମୀ ଦିନରେ ଓଡିଶାର ପର୍ଯ୍ୟଟନ କ୍ଷେତ୍ର ପର୍ଯ୍ୟଟକଙ୍କୁ ଆକୃଷ୍ଟ କରିବା ସହ ଏହାର ଅଭିବୃଦ୍ଧି ମଧ୍ୟ ଘଟିବ ବୋଲି ମୁଖ୍ୟମନ୍ତ୍ରୀ ମତବ୍ୟକ୍ତ କରିଛନ୍ତି। ଅପରପକ୍ଷରେ ରାଜ୍ୟ ସରକାରଙ୍କ ପର୍ଯ୍ୟଟନ ବିଭାଗ, ବନ୍ଦର ଓ ଆଭ୍ୟନ୍ତରୀଣ ଜଳ ପରିବହନ ନିର୍ଦ୍ଦେଶାଳୟ ଏବଂ ଚିଲିକା ଉନ୍ନୟନ କର୍ତ୍ତୃପକ୍ଷଙ୍କ ସହାୟତାରେ ବିକାଶ ତା’ର ହାଉସ୍ ବୋଟ୍ ସେବା ସବୁବର୍ଗର ପର୍ଯ୍ୟଟକଙ୍କୁ ଯୋଗାଇଦେବ ବୋଲି ସଂସ୍ଥା ପକ୍ଷରୁ କୁହାଯାଇଛି। ଉଦ୍ଘାଟନୀ ସମାରୋହରେ ରାଜ୍ୟ ପର୍ଯ୍ୟଟନ ମନ୍ତ୍ରୀ ଅଶ୍ୱିନୀ କୁମାର ପାତ୍ର, ପର୍ଯ୍ୟଟନ ବିଭାଗ ନିର୍ଦ୍ଦେଶକ ସଚିନ୍ ଆର୍. ଯାଦବ, ଖୋର୍ଦ୍ଧା ଜିଲାପାଳ ସଂଗ୍ରାମ କେଶରୀ ମହାପାତ୍ର, ଆରକ୍ଷୀ ଅଧୀକ୍ଷକ ସିଦ୍ଧାର୍ଥ କଟାରିଆଙ୍କ ସମେତ ବିକାଶ ଗ୍ରୁପ୍ର ବହୁ ବରିଷ୍ଠ ଅଧିକାରୀ ଓ ସ୍ଥାନୀୟ ନେତୃବୃନ୍ଦ ଉପସ୍ଥିତ ଥିଲେ।
ଅପରାହ୍ନରେ ସଂସ୍ଥା ପକ୍ଷରୁ ଭୁବନେଶ୍ୱରରେ ଆୟୋଜିତ ଏକ ଖବରଦାତା ସମ୍ମିଳନୀରେ ବିକାଶ ଗ୍ରୁପ୍ର ଚେୟାରମ୍ୟାନ୍ ଡି.ମୁରଲୀ କ୍ରିଷ୍ଣା ‘ଗରୁଡ଼’ ସମ୍ପର୍କରେ ବିସ୍ତୃତ ସୂଚନା ପ୍ରଦାନ କରିଥିଲେ। ଏପରିକି ‘ଗରୁଡ଼’ ସମସ୍ତ ସରକାରୀ ନିୟମ ପାଳନ ସହ ସବୁ ବର୍ଗର ପର୍ଯ୍ୟଟକଙ୍କୁ ଆବଶ୍ୟକ ସେବା ଯୋଗାଇଦେବ। ସେହିଭଳି ଖୁବ୍ଶୀଘ୍ର ଏହି ହାଉସ୍ ବୋଟ୍ ପ୍ରକଳ୍ପ ହୀରାକୁଦରେ ମଧ୍ୟ କାର୍ଯ୍ୟକାରୀ ହେବ ବୋଲି ମୁରଲୀ ସୂଚନା ଦେଇଛନ୍ତି।
ସୂଚନାଯୋଗ୍ୟ, ୧୦୫ ଫୁଟ୍ ଦୈର୍ଘ୍ୟ ଓ ୨୨ ଫୁଟ୍ ପ୍ରସ୍ଥ ବିଶିଷ୍ଟ ଏହି ବୋଟ୍ ୨ଟି ୮୮ଏଚ୍ପି ଦକ୍ଷତାଯୁକ୍ତ ଇଞ୍ଜିନ୍, ୩୫ କେଭି ଜେନ୍ସେଟ୍ରେ ପରିଚାଳିତ ହେଉଛି। ଏଥିରେ ୪ଟି ପ୍ରିମିୟମ୍ ଏବଂ ୨ଟି ସ୍ବିଟ୍ ରୁମ୍ ରହିଛି। ଉକ୍ତ ବୋଟ୍ରେ ଚେକ୍ ଇନ୍ ଟାଇମ୍ ଦିନ ୧୨ଟା ଓ ଚେକ୍ ଆଉଟ୍ ଟାଇମ୍ ସକାଳ ୯ଟା ୩୦ମିନିଟ୍ ରହିବ। ଏପରିକି ଅଗ୍ରିମ ବୁକିଂ ଜରିଆରେ ପର୍ଯ୍ୟଟକଙ୍କୁ ଗରୁଡ଼ର ସେବା ମିଳିପାରିବ ବୋଲି ବିକାଶ ଗ୍ରୁପ୍ ପକ୍ଷରୁ ସୂଚନା ଦିଆଯାଇଛି। ଅନ୍ୟମାନଙ୍କ ମଧ୍ୟରେ ବିକାଶ ଗ୍ରୁପ୍ର ବରିଷ୍ଠ ଅଧିକାରୀ ଭି.ଶ୍ରୀନିବାସ, ଜି.ଭାସ୍କର ରାଓ, ଡି. ନାଗେଶ୍ୱର ରାଓ, ଗୌତମ କୁମାର ଅଗ୍ରୱାଲ୍, ଏମ୍.ଏଲ୍. ଆନନ୍ଦ ପ୍ରମୁଖ ଉପସ୍ଥିତ ଥିଲେ।
