ଭୁବନେଶ୍ୱର,୨୩ା୮(ବନ୍ଦନା ସେଠୀ): ବଙ୍ଗୋପସାଗରରେ ପୁଣି ଲଘୁଚାପ ସୃଷ୍ଟି ହେବ। ଶୁକ୍ରବାର ମ୍ୟାନ୍ମାର ଓ ଏହାର ପାର୍ଶ୍ୱବର୍ତ୍ତୀ ଅଞ୍ଚଳରେ ଥିବା ଘୂର୍ଣ୍ଣିବଳୟ ଶନିବାର ଉତ୍ତର ବଙ୍ଗୋପସାଗର ପାର୍ଶ୍ୱବର୍ତ୍ତୀ ପଶ୍ଚିମବଙ୍ଗ ସଂଲଗ୍ନ ବାଂଲାଦେଶ ଉପକୂଳ ଅଞ୍ଚଳରେ ସକ୍ରିୟ ରହିଛି। ରବିବାର ସୁଦ୍ଧା ଏହା ଲଘୁଚାପରେ ପରିଣତ ହେବାର ସମ୍ଭାବନା ରହିଛି। ଏହା ପ୍ରଭାବରେ ଓଡ଼ିଶାରେ ୨୮ ତାରିଖ ପର୍ଯ୍ୟନ୍ତ ପ୍ରବଳ ବର୍ଷା ହେବ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ପୂର୍ୱନୁମାନ କରାଯାଇଛି। ରବିବାର ୫ଟି ଜିଲା ଯଥା କେନ୍ଦୁଝର, ମୟୂରଭଞ୍ଜ, କଳାହାଣ୍ଡି, ରାୟଗଡ଼ା ଏବଂ କୋରାପୁଟରେ ପ୍ରବଳରୁ ଅତି ପ୍ରବଳ ବର୍ଷା ନେଇ ଅରେଞ୍ଜ ଓ୍ୱାର୍ନିଂ ଜାରି କରାଯାଇଛି। ସେହିପରି ବାଲେଶ୍ୱର, ଭଦ୍ରକ, ସୁନ୍ଦରଗଡ଼, ଝାରସୁଗୁଡା, ବରଗଡ଼, ସମ୍ୱଲପୁର, ସୁବର୍ଣ୍ଣପୁର, ବଲାଙ୍ଗୀର, କନ୍ଧମାଳ, ନବରଙ୍ଗପୁର, ମାଲକାନଗିରି, ଗଜପତି ଓ ଗଞ୍ଜାମ ଜିଲାରେ ପ୍ରବଳ ବର୍ଷା ନେଇ ୟେଲୋ ଓ୍ୱାର୍ନିଂ ଦିଆଯାଇଛି। ଏଥିସହ ସମସ୍ତ ଜିଲାର କିଛି ସ୍ଥାନରେ ଘଡ଼ଘଡ଼ି ସହିତ ଝଡ଼ବର୍ଷା ନେଇ ସତର୍କ କରାଯାଇଛି। ଆସନ୍ତା ୨୪ ତାରିଖ ପର୍ଯ୍ୟନ୍ତ ମତ୍ସ୍ୟଜୀବୀମାନଙ୍କୁ ସମୁଦ୍ର ମଧ୍ୟକୁ ଯିବାକୁ ବାରଣ କରାଯାଇଛି। ଅନ୍ୟପକ୍ଷରେ ଶନିବାରଠାରୁ ଆକାଶ ମେଘାଚ୍ଛନ୍ନ ହେବା ସହ ବର୍ଷା ଆରମ୍ଭ ହୋଇଛି।
ଖୋର୍ଦ୍ଧା ଜିଲା ଚିଲିକାଠାରେ ସର୍ୱାଧିକ ୯୩ ମି.ମି ବର୍ଷା ହୋଇଥିବାବେଳେ ନବରଙ୍ଗପୁର ୮୩ ମି.ମି., ନଣ୍ଡାହାଣ୍ଡି ୭୬ ମି.ମି., ତେନ୍ତୁଳିଖୁଣ୍ଟି ୬୭ ମି.ମି., ରାୟଗଡା ଜିଲା ଗୁଣପୁର ୫୯.୨ ମିମି., ପୁରୀ ଜିଲା କାକଟପୁର ୫୭ ମି.ମି., ଜଗତ୍ସିଂହପୁର ଜିଲା ବାଲିକୁଦା ୫୬ ମି.ମି., ଖୋର୍ଦ୍ଧା ୫୫ ମି.ମି., ରାୟଗଡ଼ା ଜିଲା ଆର୍ ଗୁଡାରେ ୫୪.୮ ମି.ମି. ବର୍ଷା ରେକର୍ଡ ହୋଇଛି। ଅପରପକ୍ଷେ ବର୍ଷା ସତ୍ତ୍ୱେ ବିଭିନ୍ନ ସ୍ଥାନରେ ଗରମ ଓ ଗୁଳୁଗୁଳି ଅନୁଭୂତ ହେବା ସହିତ ୧୩ ସ୍ଥାନର ତାପମାତ୍ରା ୩୦ ଡିଗ୍ରୀ ଉପରେ ରହିଥିଲା। ଜଗତ୍ସିଂହପୁର ଜିଲାରେ ସର୍ୱାଧିକ ତାପମାତ୍ରା ୩୪.୮ ଡିଗ୍ରୀ ରହିଥିବାବେଳେ ବାରିପଦାରେ ୩୪ ଡିଗ୍ରୀ, ଛତ୍ରପୁରରେ ୩୩.୭ ଡିିଗ୍ରୀ, ରାଉରକେଲାରେ ୩୩.୨ ଡିଗ୍ରୀ, ଚାନ୍ଦବାଲିରେ ୩୩.୧ ଡିଗ୍ରୀ, ତାଳଚେରରେ ୩୨.୮ ଡିଗ୍ରୀ, ସୋନପୁର ଓ ଭଦ୍ରକରେ ୩୨.୫ ଡିଗ୍ରୀ, ବାଲେଶ୍ୱର ଓ ଯାଜପୁରରେ ୩୨ ଡିଗ୍ରୀ ତାପମାତ୍ରା ରେକର୍ଡ ହୋଇଛି।
