ଭୁବନେଶ୍ୱର,୧୨।୩(ବ୍ୟୁରୋ): ସୋମବାରଠାରୁ ପାର୍ଲାମେଣ୍ଟରେ ବଜେଟ୍ ଅଧିବେଶନର ଦ୍ବିତୀୟ ପର୍ଯ୍ୟାୟ ଆରମ୍ଭ ହେବାକୁ ଯାଉଛି। ଏହି ଅବସରରେ ଜନଗଣନାରେ ପଛୁଆବର୍ଗଙ୍କୁ ସାମିଲ କରିବାକୁ ରାଜ୍ୟର ଏମ୍ପିମାନେ ଦୃଢଭାବେ ଦାବି ଉପସ୍ଥାପନ କରନ୍ତୁ। ଏନେଇ ସମାଜବାଦୀ ପାର୍ଟି ପକ୍ଷରୁ ରାଜ୍ୟ ସଭାପତି ରବି ବେହେରା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏକ ଚିଠି ଲେଖି ଦାବି ଜଣାଇଛନ୍ତି। ଉକ୍ତ ଚିଠିରେ ଉଲ୍ଲେଖ ରହିଛି ଯେ, ରାଜ୍ୟରେ ପଛୁଆବର୍ଗ ଜନଗଣନା ହୋଇ ନ ଥିବା ଯୋଗୁ ଚଳିତ ପଞ୍ଚାୟତ ଓ ପୌର ନିର୍ବାଚନରେ ୱାର୍ଡମେମ୍ବରଠାରୁ ମେୟର ପଦବୀ ପର୍ଯ୍ୟନ୍ତ କେଉଁଥିରେ ମଧ୍ୟ ରାଜ୍ୟର ୫୨ ଭାଗ ପଛୁଆବର୍ଗ ଜନସାଧାରଣ ସଂରକ୍ଷଣ ପାଇପାରିଲେ ନାହିଁ। ଫଳରେ ସେମାନେ ତାଙ୍କର ସାମ୍ବିଧାନିକ ଅଧିକାରରୁ ବଞ୍ଚତ୍ତ ହେଲେ। ସେହିଭଳି ଆଇ.ଆଇ.ଟି. ଓ ଆଇ.ଆଇ.ଏମ୍. ଭଳି ପ୍ରତିଷ୍ଠିତ କେନ୍ଦ୍ରୀୟ ଶିକ୍ଷାନୁଷ୍ଠାନଗୁଡ଼ିକରେ ପଛୁଆବର୍ଗ ଛାତ୍ରୀଛାତ୍ରଙ୍କ ପାଇଁ ନାମଲେଖା କ୍ଷେତ୍ରରେ ୨୭ ଭାଗ ସଂରକ୍ଷଣ ଥିଲାବେଳେ ରାଜ୍ୟର ଉଚ୍ଚ ଶିକ୍ଷାନୁଷ୍ଠାନ ଓ ମେଡିକାଲ, ଇଞ୍ଜିନିୟରିଂ ଆଦି ପ୍ରତିଷ୍ଠାନରେ ପଛୁଆବର୍ଗ ପିଲାଙ୍କ ପାଇଁ ଆଦୌ ସଂରକ୍ଷଣ ଦିଆଯାଉନାହିଁ। ଚାକିରି କ୍ଷେତ୍ରରେ ମଧ୍ୟ ଏହି ବର୍ଗର ବେକାର ଯୁବତୀ ଯୁବକମାନେ ୨୭ ଭାଗ ସଂରକ୍ଷଣ ପରିବର୍ତ୍ତେ ମାତ୍ର ୧୧.୨୫% ପ୍ରତିଶତ ସଂରକ୍ଷଣ ପାଉଛନ୍ତି। ଗତ ଅଗଷ୍ଟ ମୌସୁମୀ ଅଧିବେଶନ ସମୟରେ ପାର୍ଲାମେଣ୍ଟସ୍ଥିତ ସ୍ବରାଷ୍ଟ୍ର ବିଭାଗ କାର୍ଯ୍ୟାଳୟଠାରେ ମନ୍ତ୍ରୀ ଅମିତ ଶାହାଙ୍କୁ ଭେଟି ବିଜେଡି ଏମ୍ପିମାନେ ପଛୁଆବର୍ଗ ଜନଗଣନା ଦାବି କରି ଏକ ସ୍ମାରକପତ୍ର ପ୍ରଦାନ କରିଥିଲେ। ଏହା ସତ୍ତ୍ବେ କେନ୍ଦ୍ର ସରକାର ଏ ପର୍ଯ୍ୟନ୍ତ ପଛୁଆବର୍ଗ ଜନଗଣନା ନେଇ କୌଣସି ପଦକ୍ଷେପ ନେଉନାହାନ୍ତି। ତେଣୁ ଆବଶ୍ୟକ ପଡ଼ିଲେ ବିଜେଡି ଏମ୍ପିମାନେ ସମନ୍ବୟ ରକ୍ଷାକରି ଲୋକସଭା ଗୃହ ମଧ୍ୟରେ ଜାତିଗତ ଜନଗଣନା ସପକ୍ଷରେ କେନ୍ଦ୍ର ସରକାରଙ୍କୁ ଘେରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେବାକୁ ବେହେରା ଦାବି କରିଛନ୍ତି।
