କଣ୍ଟାପଡା,୧୨ା୩(ଡି.ଏନ୍.ଏ.): କଟକ ଜିଲା କଣ୍ଟାପଡା ବ୍ଲକ ଅନ୍ତର୍ଗତ ପାଟସୁନ୍ଦରପୁର ପଞ୍ଚାୟତର ନାଏବ ସରପଞ୍ଚ ନିର୍ବାଚନରେ ଏକ ନାକଚ ଭୋଟକୁ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି। ଏହାକୁ କେନ୍ଦ୍ରକରି ଗୋଟିଏ ଗୋଷ୍ଠୀ ଭୋଟ ପୁନଃଗଣତି ଦାବିକରି ପ୍ରିଜାଇଡିଂ ଅଫିସର ଓ କଣ୍ଟାପଡା ବିଡିଓଙ୍କୁ ଅଟକ ରଖିଥିବା ଜଣାପଡିଛି। ମିଳିଥିବା ସୂଚନା ଅନୁଯାୟୀ, ଉକ୍ତ ପଞ୍ଚାୟତର ନାଏବ ସରପଞ୍ଚ ପଦବୀ ପାଇଁ ମଞ୍ଜୁବାଳା ଭୋଇ ଓ କୃଷ୍ଣଚନ୍ଦ୍ର ଭୋଇ ପ୍ରାର୍ଥୀ ହୋଇଥିଲେ। ନିର୍ବାଚନ ପରେ କୃଷ୍ଣଙ୍କ ସପକ୍ଷରେ ୧୦ ଖଣ୍ଡ ଓ ମଞ୍ଜୁଙ୍କ ସପକ୍ଷରେ ୯ଖଣ୍ଡ ଭୋଟ ଯାଇଥିଲା। ତେବେ ଗୋଟିଏ ଭୋଟ ନାକଚ କରାଯିବା ଫଳରେ ଦ୍ୱନ୍ଦ୍ୱ ଉପୁଜିଥିଲା। ଉକ୍ତ ଭୋଟ୍ର ଅଧିକ ଭାଗ ମଞ୍ଜୁଙ୍କ ଆଡକୁ ଯାଇଥିବାରୁ ଏହାକୁ ନାକଚ ନ କରିବାକୁ ତାଙ୍କ ସମର୍ଥକମାନେ ଅଡି ବସିଥିଲେ। ଖବରପାଇ କଣ୍ଟାପଡା ବ୍ଲକ ନିର୍ବାଚନ ଅଧିକାରୀ ତଥା ବିଡିଓ ସନ୍ତୋଷ ପତି ଘଟଣାସ୍ଥଳରେ ପହଞ୍ଚି ଏହାର ଯାଞ୍ଚ କରିଥିଲେ ମଧ୍ୟ କୌଣସି ନିଷ୍ପତ୍ତି ନେଇ ପାରି ନ ଥିଲେ। ଫଳରେ ପ୍ରିଜାଡିଂ ଅଫିସର ଅଜିତ୍ ମହାପାତ୍ର କୃଷ୍ଣଙ୍କୁ ବିଜୟୀ ଘୋଷଣା କରି ଭୋଟବାକ୍ସକୁ ସିଲ୍ କରି ଦେଇଥିଲେ। ଏହାକୁ ନେଇ ସେଠାରେ ଉତ୍ତେଜନା ପ୍ରକାଶ ପାଇବା ସହ ଉତ୍ତ୍ୟକ୍ତ ଲୋକମାନେ ପ୍ରିଜାଡିଂ ଅଫିସର ଓ ବିଡିଓଙ୍କୁ ଅଟକ ରଖିଥିଲେ।
