କିଭ୍,୧୪।୬: ଋଷର ରାତିସାରା ମିଶାଇଲ ମାଡରେ ଥରିଉଠିଛି ୟୁକ୍ରେନର ବ୍ଲାକ୍ ସି ବନ୍ଦର। ଋଷ ବ୍ଲାକ୍ ସି ବନ୍ଦରର ଓଡେଶାରେ କିଛି ଅଟ୍ଟାଳିକାକୁ ଟାର୍ଗେଟ କରି ମିଶାଇଲ୍ ମାଡ କରିଛି। ଯେଉଁଥିରେ ୩ଜଣଙ୍କର ମୃତ୍ୟୁ ଘଟିଥିବା ବେଳେ ୧୩ଜଣ ଆହତ ହୋଇଛନ୍ତି। ୟୁକ୍ରେନର ସେନା ବୁଧବାର ଏନେଇ ସୂଚନା ଦେଇଛନ୍ତି।
ସେନା କହିଛି ଯେ ମୃତ ତିନିଜଣ ବ୍ୟକ୍ତି ଖୁଚୁରା ଚେନର ଗୋଦାମରେ କାମ କରନ୍ତି। ମିଶାଇଲ ମାଡବେଳେ ସେମାନେ ଗୋଦାମରେ କାମ କରୁଥିଲେ। ଏଥିସହ ୭ଜଣ ଗୁରୁତର ଆହତ ହୋଇଛନ୍ତି। ମିଶାଇଲ ମାଡରେ ବହୁ ଅଟ୍ଟାଳିକା ଧ୍ୱସଂ ହୋଇଛି। ଏଥିରେ ଅନେକ ଲୋକ ତଳେ ଫସି ରହିପାରନ୍ତି ବୋଲି ଆଶଙ୍କା କରାଯାଉଛି।
ୟୁକ୍ରେନର ସଶସ୍ତ୍ର ବାହିନୀର ସାଉଥ କମାଣ୍ଡ କହିଛନ୍ତି, ଋଷ ସହରରେ କ୍ରୁଜ କ୍ଷେପଣାସ୍ତ୍ର ନିକ୍ଷେପ କରିଛି। କିନ୍ତୁ ଦୁଇଟି ମିଶାଇଲକୁ ସେନା ନଷ୍ଟ କରିଦେଇଛି। ମିଶାଇଲ ମାଡ ଯୋଗୁ ବ୍ୟବସାୟ କେନ୍ଦ୍ର, ଶିକ୍ଷାନୁଷ୍ଠାନ, ଆବାସିକ ପରିସର, ବିଭିନ୍ନ ଖାଦ୍ୟ ପ୍ରତିଷ୍ଠାନ ଏବଂ ସହରର ଅନେକ ଦୋକାନ କ୍ଷତିଗ୍ରସ୍ତ ହୋଇଛି।
