ବେଜିଂ,୧୩।୧୧: Nvidia (ଏନଭିଡିଆ) ର ସିଇଓ ଜେନସେନ ହୁଆଙ୍ଗ ପୁଣିଥରେ ନିଜ ବ୍ୟକ୍ତିଗତ ଜୀବନକୁ ନେଇ ଚର୍ଚ୍ଚାରେ ଅଛନ୍ତି। ଗୁରୁବାର ପ୍ରକାଶିତ ରଏଟର୍ସର ଏକ ରିପୋର୍ଟ ଅନୁଯାୟୀ, ହୁଆଙ୍ଗଙ୍କର କେବଳ ଦୁଇ ଜଣ ନୁହେଁ, ବରଂ ଆଉ ଜଣେ ତୃତୀୟ ମହିଳାଙ୍କ ସହ ମଧ୍ୟ ସମ୍ପର୍କ ଥିଲା, ଯିଏ କି Nvidia ର ଜଣେ କର୍ମଚାରୀ ମଧ୍ୟ ଥିଲେ। ଏହା ପୂର୍ବରୁ, ତାଙ୍କ ନାମ ଜଣେ ଚାଇନିଜ ଗୁପ୍ତଚର ବୋଲି ସନ୍ଦେହ କରାଯାଉଥିବା ଆଲିସ ହୁଆଙ୍ଗ ଏବଂ Nvidia ର ଅଧିକାରୀ କିମ୍ବର୍ଲି ପାୱେଲଙ୍କ ସହ ଯୋଡ଼ା ଯାଇଥିଲା। ଏହି ସମୟରେ, ଗୁରୁବାର ହୁଆଙ୍ଗ Nvidia ର ସିଇଓ ପଦରୁ ଇସ୍ତଫା ଦେଇଛନ୍ତି। ଏହି ତୃତୀୟ ସମ୍ପର୍କର ଖବର କମ୍ପାନୀ ଭିତରେ ତାଙ୍କର ବ୍ୟକ୍ତିଗତ ଏବଂ ବୃତ୍ତିଗତ ସମ୍ପର୍କକୁ ନେଇ ବିଭିନ୍ନ ପ୍ରଶ୍ନ ସୃଷ୍ଟି କରିଛି।
ତେବେ, ଏହି କଥିତ ନୂତନ ସମ୍ପର୍କ ବିଷୟରେ ବର୍ତ୍ତମାନ ସୁଦ୍ଧା ବିଶେଷ କିଛି ସୂଚନା ମିଳିନାହିଁ। ଉକ୍ତ ମହିଳା ଜଣକ କିଏ, ଏନଭିଡିଆ (Nvidia) ରେ ତାଙ୍କର ଭୂମିକା କ’ଣ, ହୁଆଙ୍ଗଙ୍କ ସହ ତାଙ୍କର ସମ୍ପର୍କ କେବେ ଆରମ୍ଭ ହେଲା, କିମ୍ବା ଏହି ସମ୍ପର୍କ ବର୍ତ୍ତମାନ ମଧ୍ୟ ଜାରି ରହିଛି ନା ଶେଷ ହୋଇଯାଇଛିଏ ସମ୍ପର୍କରେ କୌଣସି ସ୍ପଷ୍ଟ ତଥ୍ୟ ନାହିଁ କିମ୍ବା କିଛି ନିଶ୍ଚିତ ହୋଇନାହିଁ।
ଉଲ୍ଲେଖଯୋଗ୍ୟ ଯେ, ପୂର୍ବରୁ ‘ଦ ଟାଇମ୍ସ’ (The Times) ରେ ହୁଆଙ୍ଗ ଏବଂ କିମ୍ବର୍ଲି ପାୱେଲଙ୍କ ମଧ୍ୟରେ ଏକ କଥିତ ସମ୍ପର୍କକୁ ନେଇ ଏକ ରିପୋର୍ଟ ପ୍ରକାଶ ପାଇଥିଲା।
ଗତ କିଛି ଦିନ ଧରି ଜେନସେନ ହୁଆଙ୍ଗଙ୍କ ବ୍ୟକ୍ତିଗତ ଜୀବନକୁ ନେଇ କ୍ରମାଗତ ଭାବେ ବିଭିନ୍ନ ଖବର ସାମ୍ନାକୁ ଆସୁଛି। ଏହି ପରିପ୍ରେକ୍ଷୀରେ, ତାଙ୍କ ବିବାହକୁ ନେଇ ପ୍ରଶ୍ନ ଉଠୁଛି ଏବଂ ସେ ନିଜ ପତ୍ନୀ ଲୋରି ହୁଆଙ୍ଗଙ୍କଠାରୁ ଅଲଗା ହୋଇପାରନ୍ତି ବୋଲି ଅନୁମାନ କରାଯାଉଛି। ଏହି ଦମ୍ପତି ୧୯୮୦ ଦଶକର ମଧ୍ୟଭାଗରେ ବିବାହ କରିଥିଲେ। ବର୍ତ୍ତମାନ ସୁଦ୍ଧା, ଏହି କଥିତ ସମ୍ପର୍କଗୁଡ଼ିକ ବିଷୟରେ ଲୋରି କୌଣସି ସାର୍ବଜନୀନ ବୟାନ ଦେଇନାହାନ୍ତି।
ଏଭଳି ପରିସ୍ଥିତିରେ, ଯଦି ଏହି ଦମ୍ପତି ଛାଡ଼ପତ୍ର (divorce) ଆଡ଼କୁ ଗତି କରନ୍ତି, ତେବେ ସମ୍ପତ୍ତି ଭାଗବଣ୍ଟା ଏକ ଗୁରୁତ୍ୱପୂର୍ଣ୍ଣ ବିଷୟ ହୋଇପାରେ। କାଲିଫର୍ଣ୍ଣିଆରେ ‘କମ୍ୟୁନିଟି ପ୍ରପର୍ଟି’ (community property) ବା ଯୌଥ ସମ୍ପତ୍ତି ଆଇନ ଲାଗୁ ହୁଏ, ଯାହା ଅନୁଯାୟୀ ବିବାହ ଅବଧି ମଧ୍ୟରେ ଅର୍ଜିତ ସମ୍ପତ୍ତି ଉପରେ ଉଭୟ ସ୍ବାମୀ ଓ ସ୍ତ୍ରୀଙ୍କର ସମାନ ଅଧିକାର ରହିଥାଏ।
ଆର୍ଥିକ ଦସ୍ତାବିଜ ଅନୁଯାୟୀ, ଏନଭିଡିଆ (Nvidia) ରେ ହୁଆଙ୍ଗଙ୍କର ପ୍ରାୟ ୩.୫% ଅଂଶଧନ ଉପରେ ଉଭୟଙ୍କର ଯୌଥ ମାଲିକାନା ରହିଛି। ଫଳରେ, ଯଦି ଛାଡ଼ପତ୍ର ହୁଏ, ତେବେ ସେମାନଙ୍କ ସମ୍ପତ୍ତିର ଏକ ବଡ଼ ଅଂଶ ଭାଗବଣ୍ଟା ହେବାର ସମ୍ଭାବନା ରହିଛି। ତେବେ, ବିବାହ ପୂର୍ବରୁ କିମ୍ବା ପରେ, ସେମାନେ ନିଜ ସମ୍ପତ୍ତି ସମ୍ବନ୍ଧରେ କୌଣସି ସ୍ବତନ୍ତ୍ର ଆଇନଗତ ଚୁକ୍ତିନାମା କରିଛନ୍ତି କି ନାହିଁ, ତାହା ସାର୍ବଜନୀନ ଭାବେ ଜଣା ନାହିଁ।
ଏହି ସପ୍ତାହରେ ଜେନସେନ ହୁଆଙ୍ଗଙ୍କ ମୋଟ ସମ୍ପତ୍ତି ପରିମାଣ ମଧ୍ୟ ବ୍ୟାପକ ଆଲୋଚନାର ବିଷୟ ପାଲଟିଛି। ‘ଫୋର୍ବସ’ (Forbes) ର ତଥ୍ୟ ଅନୁଯାୟୀ, ଗୁରୁବାର ସୁଦ୍ଧା ତାଙ୍କର ଆନୁମାନିକ ମୋଟ ସମ୍ପତ୍ତି ୧୪୩ ବିଲିୟନ ଡଲାର ରହିଥିଲା। ରିପୋର୍ଟ ଅନୁଯାୟୀ, ସେ ବିଶ୍ୱର ୧୦ ଜଣ ସବୁଠାରୁ ଧନୀ ବ୍ୟକ୍ତିଙ୍କ ତାଲିକାରୁ ବାଦ ପଡ଼ି ୧୩ତମ ସ୍ଥାନକୁ ଖସି ଆସିଛନ୍ତି। ତାଙ୍କ ଇସ୍ତଫା ଖବର ପରେ, ଗୁରୁବାର ବଜାର ଖୋଲିବା ସମୟରେ ତାଙ୍କ ସମ୍ପତ୍ତି ମୂଲ୍ୟରେ ପ୍ରାୟ ୧୦% ହ୍ରାସ ଦେଖାଦେଇଥିଲା; ତେବେ କାରବାର ଆଗକୁ ବଢ଼ିବା ସହ ଏଥିରେ କିଛି ମାତ୍ରାରେ ସୁଧାର ଆସିଥିଲା। ବର୍ତ୍ତମାନ, ହୁଆଙ୍ଗଙ୍କ କଥିତ ବ୍ୟକ୍ତିଗତ ସମ୍ପର୍କ, ବୈବାହିକ ଜୀବନ ଏବଂ ସମ୍ପତ୍ତିକୁ ନେଇ ବିଭିନ୍ନ ପ୍ରଶ୍ନ ଉଠୁଛି। ଏହି ଦାବିଗୁଡ଼ିକ ଉପରେ ସେ କିମ୍ବା ତାଙ୍କ ପତ୍ନୀ କୌଣସି ପ୍ରତିକ୍ରିୟା ଦେଇନାହାନ୍ତି।
