ନୂଆପଡ଼ା,୮ା୧୧(ପୀତାମ୍ବର ସାହୁ):ଉପନିର୍ବାଚନ ପାଇଁ ନୂଆପଡ଼ା ଉଠୁଛିପଡୁଛି। ପ୍ରଚାରରେ କମ୍ପୁଛି ଗାଁଠୁ ସହର। ତିନି ପ୍ରମୁଖ ଦଳ ଭାଜପା, ବିଜେଡି ଓ କଂଗ୍ରେସ ସମେତ ଅନ୍ୟ ୧୧ ପ୍ରାର୍ଥୀ ପ୍ରଚାରକୁ ଜୋରଦାର କରିଛନ୍ତି। ଏହା ଭିତରେ ଭାଜପା, ବିଜେଡି ଓ କଂଗ୍ରେସ ଦଳର କର୍ମୀମାନେ ଡୋର ଟୁ ଡୋର କ୍ୟାମ୍ପେନିଂ କରି ନିଜ ଦଳର ପୁସିଂ କାର୍ଡ ଦେଇ ପ୍ରାର୍ଥୀଙ୍କୁ ଭୋଟ ଦେବାକୁ ନିବେଦନ କରୁଛନ୍ତି। ବିଭିନ୍ନ ଦଳର ଷ୍ଟାର ପ୍ରଚାରକ ଆସି ପ୍ରଚାରକୁ ଶାଣିତ କରିଛନ୍ତି। ଗୁରୁବାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁଦେବ ସାଏ ଆସି ଭାଜପା ପ୍ରାର୍ଥୀଙ୍କ ସପକ୍ଷରେ ପ୍ରଚାର କରିଛନ୍ତି। ଛତିଶଗଡ଼ ମୁଖ୍ୟମନ୍ତ୍ରୀ ପଞ୍ଚମପୁରରେ ଏକ ନିର୍ବାଚନୀ ସଭାରେ ଯୋଗଦେଇ ଦଳର ପ୍ରାର୍ଥୀ ଜୟ ଢୋଲକିଆଙ୍କୁ ଭୋଟ ଦେବାକୁ ନିବେଦନ କରିଥିଲେ। ଏହି ଅଞ୍ଚଳ ଛତିଶଗଡ଼କୁ ଲାଗି ରହିଥିବାରୁ ଏଠାକାର ଭୋଟରଙ୍କୁ ଆକୃଷ୍ଟ କରିବା ପାଇଁ ଛତିଶଗଡ଼ର ଅନେକ ବିଧାୟକ, ଏମ୍ପି, ପୂର୍ବତନ ବିଧାୟକ ଓ ଏମ୍ପି ଛତିଶଗଡୀ ଲରିଆ ଭାଷାରେ ଭୋଟ ପ୍ରଚାର କରିଥିଲେ। ଏହି ସଭାରେ ଭାଜପା ପ୍ରଭାରୀ ବିଜୟ ପାଲ ସିଂ ତୋମାର, ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓଙ୍କ ସମେତ ଓଡ଼ିଶାର ଅନେକ ବିଧାୟକ ଓ ଏମ୍ପି ଯୋଗଦେଇଥିଲେ। ଅପରପକ୍ଷେ ଓଡ଼ିଶା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କୋମନା ବ୍ଲକ ଉଦ୍ୟାନବନ୍ଧରେ ରୋଡ୍ ଶୋ କରି ପ୍ରଚାର କରିଥିଲେ।
ସେହିପରି କଂଗ୍ରେସ ପାଇଁ ଆଗକୁ ସଚିନ ପାଇଲଟ, ଅଳକା ଲାମ୍ବା, କହ୍ନେୟା କୁମାର ଆସି ପ୍ରଚାର କରିବା କାର୍ଯ୍ୟକ୍ରମ ରହିଥିବା କଂଗ୍ରେସ ବିଧାୟକ ପ୍ରାର୍ଥୀ ଘାସିରାମ ମାଝୀ କହିଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ପୁଣି ଶୁକ୍ରବାର ଏଠାକୁ ଆସି ଖରିଆର ରୋଡ୍ ଓ ନୂଆପଡ଼ାରେ ରୋଡ୍ ଶୋ କରିବା ସହିତ ଅପରାହ୍ନରେ ପରକୋଡଠାରେ ଏକ ନିର୍ବାଚନୀ ସଭାରେ ଯୋଗଦେଇଥିଲେ। ସଭାରେ ପୁଣି ସେ ବେଇମାନ ପ୍ରସଙ୍ଗ ଉଠାଇବା ସହିତ ଭାଜପା ଲୋକଙ୍କୁ ଡବଲ ଧୋକା ଦେଇଥିବା କହି ଟାର୍ଗେଟ କରିଥିଲେ। ଏହା ସହିତ ସେ ବିଜେଡି ପ୍ରାର୍ଥତ୍ନୀ ସ୍ନେହାଙ୍ଗିନୀ ଛୁରିଆଙ୍କୁ ଭୋଟ ଦେଇ ବିଜୟୀ କରାଇବାକୁ ନିବେଦନ କରିଥିଲେ। ପ୍ରଚାରର ଶେଷ ଦିନ ଅର୍ଥାତ୍ ୯ ତାରିଖରେ ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବ ନୂଆପଡ଼ାକୁ ଆସି ଦଳର ପ୍ରାର୍ଥୀ ରମାକାନ୍ତ ହାତୀଙ୍କ ପାଇଁ ପ୍ରଚାର କରିବେ ବୋଲି ସ୍ଥିର ହୋଇଛି।
ଉପନିର୍ବାଚନରେ ପୁଳାପୁଳା ଟଙ୍କା ଖର୍ଚ୍ଚ ହେଉଛି। ପ୍ରାୟ ସବୁ ଦଳ ଭୋଟରଙ୍କୁ ଟଙ୍କା ଦେଇ ଭୋଟ କିଣିବେ ବୋଲି ସବୁଠି ଆଲୋଚନା ହେଉଛି। ଭୋଟର ପିଛା ପ୍ରାୟ ୧ ହଜାରରୁ ୨ ହଜାର ଟଙ୍କା ଲେଖାଏ ବଣ୍ଟାହେବ ବୋଲି ଚା’ ଖଟି କିମ୍ବା ଗାଁ ଗହଳିରେ ଆଲୋଚନା ହେଉଛି। ଆମେ ଶୁକ୍ରବାର ନିର୍ବାଚନୀ ଖବର ସଂଗ୍ରହ ପାଇଁ ପଞ୍ଚମପୁର ଅଞ୍ଚଳକୁ ଯାଇଥିବା ବେଳେ ଭେରାଠାରେ ଲୋକେ ଏହି କଥା ଆଲୋଚନା କରୁଥିବା ଶୁଣିବାକୁ ପାଇଲୁ। ଆଉ ଦିନେ କି ଦୁଇ ଦିନ ମଧ୍ୟରେ ଭୋଟରଙ୍କୁ ଭାଜପା ଓ ବିଜେଡି ଟଙ୍କା ବାଣ୍ଟିପାରନ୍ତି ବୋଲି ନୂଆପଡ଼ା ବ୍ଲକ ଛକର ଏକ ଚା’ ଖଟିରେ ଆଲୋଚନା ହେଉଥିବା ଜଣେ ବ୍ୟକ୍ତି ଆମକୁ କହିଛନ୍ତି।
ଭୋଟ ପାଇଁ ଟଙ୍କା ବଣ୍ଟା ହେବ ବୋଲି ଚର୍ଚ୍ଚା ହେବା ପରେ ଭୋଟରମାନେ କୌଣସି ଦଳକୁ ନେଇ କିଏ ଜିତିବ, କିଏ ହାରିବ, କାହାକୁ ସେମାନେ ଭୋଟ ଦେବେ ସେକଥା ଆଉ କହିନାହାନ୍ତି। ଯଦି ଜଣେ କୌଣସି ଗୋଟିଏ ନିର୍ଦ୍ଦିଷ୍ଟ ଦଳ ଜିତିବ ବା ହାରିବ ବୋଲି କହିବ କିମ୍ବା ସେ ଗୋଟିଏ ନିର୍ଦ୍ଦିଷ୍ଟ ଦଳକୁ ସମର୍ଥନ କରୁଛି ବୋଲି କହିବ ତେବେ ତାଙ୍କୁ ଅନ୍ୟଦଳର ଟଙ୍କା ମିଳିବ ନାହିଁ। ଏହା ଭାବି ଭୋଟର ସମ୍ପୂର୍ଣ୍ଣ ନୀରବ ରହୁଥିବା ସାରାବଙ୍ଗ ଗ୍ରାମର ମନୋଜ ମାଝି ପ୍ରକାଶ କରିଛନ୍ତି। ତେଣୁ ଏବେ ସଭାସମିତି ଓ ରାଲିରେ ଲୋକ ଦେଖି ବିଭିନ୍ନ ଦଳର ନେତା ମଧ୍ୟ ଦଳର ସ୍ଥିତିନେଇ ଉତ୍ସାହିତ ହେଉଥିବା ଦେଖିବାକୁ ମିଳୁନାହିଁ। ତେବେ ନୀରବ ଭୋଟର ସଂଖ୍ୟା ଏବେ ବଢୁଥିବାରୁ ତିନି ଦଳ ପାଇଁ ନିର୍ବାଚନୀ ଆକଳନ କାଠିକର ପାଠ ହୋଇଗଲାଣି ବୋଲି ଚର୍ଚ୍ଚା ହେଉଛି।
ନିର୍ବାଚନ ହେଲେ ନେତାମାନେ ଗାଁକୁ ଆସି ତାଙ୍କ ଦଳକୁ ଭୋଟ ଦେବାକୁ କହୁଛନ୍ତି। ଆମ ଦଳ ଜିତିଲେ ସବୁ ସମସ୍ୟାର ସମାଧାନ କରିଦେବୁ ବୋଲି ପ୍ରତିଶ୍ରୁତି ଦେଉଛନ୍ତି। ମାତ୍ର ନିର୍ବାଚନରେ ଜିତିଗଲା ପରେ ଆଉ କାହାରି ଦେଖା ମିଳୁନାହିଁ। କେହି ବି ଆମ ସମସ୍ୟାର ସମାଧାନ କରିବାକୁ ଆସୁନାହାନ୍ତି। ତେଣୁ ଏବେ ଆମେ କାହାକୁ ବିଶ୍ୱାସ କରିବୁ ବୋଲି ସୁନାବେଡା ପଞ୍ଚାୟତ ଶିବନାରାୟଣପୁର ଗ୍ରାମର ରବି ଭୁଞ୍ଜିଆ ପ୍ରକାଶ କରିଛନ୍ତି।
ନୂଆପଡା ନିର୍ବାଚନମଣ୍ଡଳୀ ନୂଆପଡ଼ା ଓ ଖରିଆର ରୋଡ୍ ଏନ୍ଏସି ସହିତ ନୂଆପଡ଼ା ଓ କୋମନା ବ୍ଲକକୁ ନେଇ ଗଠିତ। ନୂଆପଡ଼ା ବ୍ଲକରେ ୩୧ ପଞ୍ଚାୟତ ଓ କୋମନାରେ ୩୨ ପଞ୍ଚାୟତ ରହିଛି। ଏହି ନିର୍ବାଚନମଣ୍ଡଳୀର ଅଧିକାଂଶ ଲୋକ ଗ୍ରାମାଞ୍ଚଳରେ ରହନ୍ତି। ସେମାନଙ୍କ ମଧ୍ୟରୁ ଅଧିକାଂଶ ନାମମାତ୍ର ଚାଷୀ। ପ୍ରାୟତଃ ପ୍ରତି ପରିବାରରୁ ଦାଦନ ଯାଇଥାନ୍ତି। ସେମାନଙ୍କ ପରିବାରର ଆର୍ଥିକ ସ୍ଥିତି ସେତେ ସଦୃଢ଼ ନୁହେଁ। ତେଣୁ ଏବେ ନିର୍ବାଚନରେ ଭୋଟରଙ୍କୁ ଟଙ୍କା ବଣ୍ଟାଯିବ ବୋଲି ଶୁଣି ଭୋଟରମାନେ ପ୍ରାୟ ନୀରବ ରହୁଥିବା ଜଣେ କଂଗ୍ରେସ ଯୁବନେତା ପ୍ରକାଶ କରିଛନ୍ତି।
ଏବେ ଲୋକଙ୍କୁ ସଭାସମିତି ଓ ରାଲିକୁ ଡାକିଲେ ଖାଦ୍ୟ, ପାନୀୟ, ଗାଡ଼ିରେ ତେଲ ଖର୍ଚ୍ଚ ବାଦ୍ ଦୁଇ ଶହ ଟଙ୍କା ଲେଖାଏ ନ ଦେଲେ ଲୋକେ ସଭାକୁ ଆସୁ ନ ଥିବା ପଶ୍ଚିମ ଓଡ଼ିଶାର ଜଣେ ବିଧାୟକ କହିଛନ୍ତି। ତେବେ ନିର୍ବାଚନ ପାଖେଇ ଆସୁଥିବାରୁ ଓ ଭୋଟର ନୀରବ ରହୁଥିବାରୁ ସବୁ ଦଳର ନେତା ଚିନ୍ତାରେ ପଡିଯାଇଛନ୍ତି।
Dharitri – Odisha’s No.1 Odia Daily
