ମୁମ୍ବାଇ,୨୫।୭: ଦେଶର ବ୍ୟାଙ୍କିଙ୍ଗ୍ ସିଷ୍ଟମ ସୁରକ୍ଷିତ ରହିଛି। ବ୍ୟାଙ୍କଗୁଡିକ ବର୍ତ୍ତମାନ ଅନାଦାୟ ଋଣ(ଏନ୍ପିଏ) ସମସ୍ୟା ସହ ଜୁଝୁଛନ୍ତି। ବର୍ତ୍ତମାନ କରୋନା ଯୋଗୁ ଦେଶର ବଜାର ଗଭୀର କ୍ଷତିଗ୍ରସ୍ତ ହୋଇଛି। ଏଭଳି ସ୍ଥିତିରେ ଏନ୍ପିଏ ବୃଦ୍ଧି ବ୍ୟାଙ୍କଗୁଡିକର ଚିନ୍ତା ବଢାଇବ। ବ୍ୟାଙ୍ଗଗୁଡିକର ମୋଟ ଏନ୍ପିଏ ଅନୁପାତ ୮.୫%ରୁ ୨୦୨୧ ମାର୍ଚ୍ଚ ବେଳକୁ ୧୨.୫% ଛୁଇଁପାରେ ବୋଲି ରିଜର୍ଭ ବ୍ୟାଙ୍କ ପକ୍ଷରୁ ଏକ ଆକଳନ କରାଯାଇଛି। ସ୍ଥିତି ଯଦି ବେଶି ବିଗିଡେ ତେବେ ଏହା ୧୪.୭%କୁ ମଧ୍ୟ ବୃଦ୍ଧି ଘଟିପାରେ ବୋଲି କେନ୍ଦ୍ରୀୟ ବ୍ୟାଙ୍କ ଏହାର ଦ୍ୱିମାସିକ ଫାଇନାନ୍ସିଆଲ ଷ୍ଟାବିଲିଟି (ଏଫ୍ଏସ୍ଆର୍) ରିପୋର୍ଟରେ ପ୍ରକାଶ କରିଛି। ଏହି ରିପୋର୍ଟକୁ ରିଜର୍ଭ ବ୍ୟାଙ୍କ ଗଭର୍ନର ଶକ୍ତିକାନ୍ତ ଦାସ ଉନ୍ମୋଚନ କରିଥିଲେ।
ଏହି ପରିପ୍ରେକ୍ଷୀରେ ଗଭର୍ନର ଦାସ କହିଛନ୍ତି ଯେ, କୋଭିଡ୍ -୧୯ ଯୋଗୁ ଏକ ଅନିଶ୍ଚିତ ସ୍ଥିତି ସାମ୍ନାକୁ ଆସିଛି। ଏହା ହୁଏତ ଆମେ କେହି ପୂର୍ବରୁ କେବେ ସାମ୍ନା କରିନାହାନ୍ତି। ଦେଶର ଅର୍ଥ ବ୍ୟବସ୍ଥା ଗଭୀର ମାନ୍ଦାବସ୍ଥା ଦେଇ ଗତି କରୁଥିବା ବେଳେ ଠିକ୍ ଏତିକି ବେଳେ ମହାମାରୀ ଜନିତ ସମସ୍ୟା ଦେଶକୁ ସାମ୍ନା କରିବାକୁ ପଡୁଛି। କୋଭିଡ୍ ଯୋଗୁ ଦେଶର ବିଭିନ୍ନ କ୍ଷେତ୍ର କ୍ଷତିଗ୍ରସ୍ତ ହୋଇଛି। ଲକ୍ଡାଉନ କଟକଣା ଧୀରେ ଧୀରେ କୋହଳ କରାଯାଉଥିବାରୁ ବଜାର ଟ୍ରାକ୍କୁ ଫେରୁଥିବା ପ୍ରତୀୟମାନ ହେଉଛି। ଅର୍ଥ ବ୍ୟବସ୍ଥାକୁ ଟ୍ରାକ୍କୁ ଫେରାଇ ଆଣିବାକୁ ହେଲେ ଦେଶର ଫାଇନାନ୍ସ ସିଷ୍ଟମକୁ ଦୃଢ କରି ରଖିବାକୁ ହେବ। ସେହିଭଳି ଫାଇନାନ୍ସ ସିଷ୍ଟମର ଅଂଶୀଦାରମାନେ ରିସ୍କ ମ୍ୟାନେଜମେଣ୍ଟକୁ ଫୋକସ କରିବା ସହ ନିଜକୁ ଶକ୍ତିଶାଳୀ କରିବାକୁ ପଡିବ ବୋଲି ଶକ୍ତିକାନ୍ତ ଆହ୍ବାନ ଦେଇଛନ୍ତି।
ଅଭିବୃଦ୍ଧି ନିମ୍ନଗାମୀ ରହିବ
କୋଭିଡ୍-୧୯ର ପ୍ରଭାବ ବଜାର ଉପରେ କେତେ ସମୟ ଯାଏ ରହିବ ତାହା ବର୍ତ୍ତମାନ ଅନିଶ୍ଚିତ ହୋଇ ରହିଛି। ଏହା ଯୋଗୁ ଆର୍ଥତ୍କ ବର୍ଷ ୨୦୧୯ରେ ଭାରତର ଅଭିବୃଦ୍ଧି ନିମ୍ନଗାମୀ ରହିବ ବୋଲି ରିଜର୍ଭ ବ୍ୟାଙ୍କ ମତ ପ୍ରକାଶ କରିଛି। ଅଭିବୃଦ୍ଧି ନିମ୍ନଗାମୀ ହେବା ନେଇ କେନ୍ଦ୍ରୀୟ ବ୍ୟାଙ୍କ ପୂର୍ବରୁ କହି ସାରିଥିବା ବେଳେ କେତେ ହାରରେ ଜିଡିପି ଖସିବ ସେ ନେଇ ସ୍ପଷ୍ଟ କରି ନ ଥିଲା। ହେଲେ ଦେଶର ଜିଡିପି ୯.୫% ଖସିଯିବ ବୋଲି ବଜାର ବିଶେଷଜ୍ଞ ମତ ପ୍ରକାଶ କରିଛନ୍ତି। ମାତ୍ର ମହାମାରୀ ଯୋଗୁ ଅଭିବୃଦ୍ଧି ଲଗାତର ଭାବେ ଖସିବ ବୋଲି ରିଜର୍ଭ ବ୍ୟାଙ୍କ ଶୁକ୍ରବାର ଏଫ୍ଏସ୍ଆର୍ ରିପୋର୍ଟରେ ପ୍ରକାଶ କରିଛି। ଦେଶର ସ୍ବାସ୍ଥ୍ୟ ଭିତ୍ତିଭୂମି ଉନ୍ନତ ହେବା ସହ କରୋନା ମାମଲା ହ୍ରାସ, ଚାହିଦାରେ ଉନ୍ନତି ଏବଂ ଯୋଗାଣ ବ୍ୟବସ୍ଥାରେ ସୁଧାର ଭଳି ଘଟଣା ଅର୍ଥ ବ୍ୟବସ୍ଥାକୁ ଟ୍ରାକ୍କୁ ଫେରାଇ ଆଣିବା ଦିଗରେ ପ୍ରମୁଖ ଯୋଗଦାନ ରଖିବ। ଏ କ୍ଷେତ୍ରରେ ବିଶ୍ୱ ସ୍ତରର ବାଣିଜ୍ୟ ଏବଂ ଫାଇନାନ୍ସ ସ୍ଥିତି ଅନେକ ଗୁରୁତ୍ୱବହନ କରେ ବୋଲି କେନ୍ଦ୍ରୀୟ ବ୍ୟାଙ୍କ ସୂଚନା ରହିଛି।
