ନୂଆଦିଲ୍ଲୀ,୯।୧: ପାକିସ୍ତାନର ପୂର୍ବ ଦ୍ରୁତ ବୋଲର୍ ଶୋଏବ ଅଖତରଙ୍କୁ ବିଶ୍ୱର ସବୁଠାରୁ ଦ୍ରୁତ ବୋଲର ଭାବେ ଗଣାଯାଏ। ୨୦୦୩ରେ ଇଂଲଣ୍ଡ ବିପକ୍ଷରେ ଖେଳାଯାଉଥିବା ମ୍ୟାଚ୍ରେ ସେ ୧୬୧.୩ କିମି ବେଗରେ ବଲ୍ ଫିଙ୍ଗିଥିଲେ। ଏହାକୁ ନେଇ ସେତେବେଳେ ବେଶ ଚର୍ଚ୍ଚା ହୋଇଥିଲା। ଆଧିକାରିକ ଭାବେ ଉକ୍ତ ବଲ୍କୁ କ୍ରିକେଟ ଇତିହାସର ସବୁଠାରୁ ଦ୍ରୁତ ବଲ୍ ଭାବେ ଗଣାଯାଉଛି। ହେଲେ ଏଭଳି ଏକ ସମୟ ଥିଲା ଯେତେବେଳେ ‘ସ୍ପିଡ୍ ଗନ୍’ ନଥିଲା। ଫଳରେ ବଲ୍ର ଗତି ରେକର୍ଡ କରାଯାଇପାରୁ ନ ଥିଲା। ଏହି ସମୟରେ ଏଭଳି ଏକ ବୋଲର ଥିଲେ ଯାହାଙ୍କ ବୋଲିଂର ସ୍ମୃତି ଆଜିବି ଅନେକଙ୍କ ମନରେ ରହିଛି। ସେ ହେଲେ ଚାଲର୍ସ କୋର୍ଟରାଇଟ୍। ଶନିବାର ତାଙ୍କ ଜନ୍ମଦିନ ଉପଲକ୍ଷେ ଆସନ୍ତୁ ତାଙ୍କ ବିଷୟରେ ଜାଣିବା କିଛି ସ୍ମରଣୀୟ କଥା।
୧୮୭୧ ଆଜିର ଦିନରେ ଇଂଲଣ୍ଡରେ ଜନ୍ମଗ୍ରହଣ କରିଥିଲେ ଚାଲର୍ସ। ତାଙ୍କ ସମୟରେ ଇସେକ୍ସ, ଫ୍ରି ଫୋରଷ୍ଟେର ପାଇଁ ସେ ଖେଳୁଥିଲେ। ସେତେବେଳେ ସବୁଠାରୁ ଦ୍ରୁତ ବୋଲର ଭାବେ ବିବେଚନା କରାଯାଉଥିଲା। ବ୍ୟାଟ୍ସମ୍ୟାନଙ୍କୁ ବୋଲ୍ଡ କରିବାରେ ଖୁସି ଅନୁଭବ କରୁଥିଲେ ସେ। ଅଧିକାଂଶ ଥର ତାହାହିଁ ହୋଇଥିଲା। ୧୮୮୫ରୁ ୧୮୯୮ ପର୍ଯ୍ୟନ୍ତ ଖେଳା ଯାଇଥିବା ପ୍ରଥମ ଶ୍ରେଣୀ କ୍ରିକେଟରେ ସେ ମୋଟ ୨୯୭ ଉଇକେଟ ନେଇଥିବା ବେଳେ ୨୦୧ଜଣଙ୍କୁ କେବଳ ବୋଲ୍ଡ କରିଥିଲେ। ଏହାପରେ ୧୯୦୭ ପର୍ଯ୍ୟନ୍ତ ୧୭୦ ମ୍ୟାଚ୍ ଖେଳି ୪୮୯ଟି ଉଇକେଟ ନେଇଥିଲେ। ଗୋଟିଏ ପାଳିରେ ୫୭ ରନ୍ ଦେଇ ୮ ଉଇକେଟ ନେବା ତାଙ୍କର ଶ୍ରେଷ୍ଠ ପ୍ରଦର୍ଶନ କରିଥିଲେ।
ଏକଦା ସେନାର ଏକ ଟିମ୍ ସହ ଖେଳୁଥିବା ବେଳେ ବାରମ୍ବାର ଜଣେ ବ୍ୟାଟ୍ସମ୍ୟାନ୍ ବାମ ଗୋଡ଼ର ଆଙ୍ଗୁଠି ଆଗକୁ ବଢ଼ାଇ ଖେଳୁଥିଲେ। ଏହା କୋର୍ଟରାଇଟ୍ଙ୍କୁ ଅଡୁଆରେ ପକାଉଥିଲା। ଏହାପରେ ସେ ନିଜର ସମସ୍ତ ଶକ୍ତି ସହ ୟର୍କର ଫିଙ୍ଗିଥିଲେ। ଫଳରେ ବ୍ୟାଟ୍ସମ୍ୟାନ୍ଜଣଙ୍କ ବୋଲ୍ଡ ହୋଇଯାଇଥିଲେ। ଏପରିକି ତାଙ୍କର ଗୋଡର ଏକ ଆଙ୍ଗୁଠି ଭାଙ୍ଗି ଯାଇଥିଲା।
ମୃତ୍ୟୁ ପୂର୍ବରୁ ସେ ଦେଇଥିବା ଏକ ସାକ୍ଷାତକାରରେ ଏକ ମଜାଦାର କଥା କହିଥିଲେ। ତାଙ୍କର ଏକ ଦ୍ରୁତ ବଲ୍ ପଡ଼ିଆରେ ବାଉନ୍ସ ହେବା ପରେ ଉଇକେଟକିପରଙ୍କ ଉପର ଦେଇ ବାଉଣ୍ଡ୍ରି ବାହାରକୁ ଯାଇଥିଲା। କ୍ରିକେଟ ଇତିହାସରେ ପ୍ରଥମ ଥର ପାଇଁ ବଲ୍ରେ(ବାଏ) ପାଇଁ ୬ ରନ୍ ମିଳିଥିଲା। ବିନା ବ୍ୟାଟ୍ରେ ପଡ଼ିଆ ବାହାରକୁ ଯିବା ଦୃଶ୍ୟ ପ୍ରଥମ ଆଉ ଶେଷ ହୋଇ ରହିଛି।
ତେବେ ଚାଲର୍ସଙ୍କ କ୍ୟାରିୟର ଦୁର୍ଭାଗ୍ୟପୂର୍ଣ୍ଣ ମଧ୍ୟ ଥିଲା। ତାଙ୍କର ବଲ୍ର ଗତି ରେକର୍ଡ ହୋଇ ନ ଥିବା ବେଳେ କେବେ ହେଲେ ଅନ୍ତରାଷ୍ଟ୍ରୀୟ କ୍ରିକେଟ ଖେଳିପାରିନାହାନ୍ତି ସେ। ଏହା ଆଜିବି ବଡ଼ ପ୍ରଶ୍ନ ହୋଇ ରହିଛି।
