ନୂଆଦିଲ୍ଲୀ,୩।୧: ଚାଇନାରେ କରୋନା ତାଣ୍ଡବ ରଚିବାରେ ଲାଗିଛି। ପ୍ରତିଦିନ ଲକ୍ଷ ଲକ୍ଷ ଲୋକ ସଂକ୍ରମିତ ହେଉଥିବା ବେଳେ ଶହ ଶହ ଲୋକ ଜୀବନ ହାରୁଛନ୍ତି। ଭାରତରେ ମଧ୍ୟ କଂରୋନା ସଂକ୍ରମଣ ବଢ଼ୁଥିବାରୁ ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାର ଦେଶରେ କେତେକ କଟକଣା ଜାରି କରିଛନ୍ତି। ସମସ୍ତ ବିମାନବନ୍ଦରରେ ରେଣ୍ଡମ୍ ଟେଷ୍ଟିଂ ଚାଲିଥିବା ବେଳେ ପରିସ୍ଥିତି ଉପରେ ସ୍ବାସ୍ଥ୍ୟମନ୍ତ୍ରଣାଳୟ ନଜର ରଖିଛି। ଇତିମଧ୍ୟରେ କେନ୍ଦ୍ର ସରକାର କରୋନା ଭାକ୍ସିନର ଦ୍ୱିତୀୟ ବୁଷ୍ଟର ଡୋଜକୁ ବର୍ତ୍ତମାନ ବାଧ୍ୟତାମୂଳକ କରିନାହାନ୍ତି। ଏଥିସହ ସରକାରଙ୍କ ପକ୍ଷରୁ ଏଭଳି କୌଣସି ଅଭିଯାନ ଚଳାଇବାକୁ ଯୋଜନା ନ ଥିବା ଜଣାପଡ଼ିଛି। ଦେଶରେ ନାଗରିକମାନଙ୍କର ଏକ ବୃହତ୍ ଅଂଶକୁ କରୋନାର ଉଭୟ ଭାକ୍ସିନ ଦିଆଯାଇଛି। ବର୍ତ୍ତମାନ ବୁଷ୍ଟର ଡୋଜ ଦିଆଯାଉଛି। କିନ୍ତୁ ବିଶେଷଜ୍ଞଙ୍କ ସହ ଆଲୋଚନା କରିବା ପରେ ସରକାର ନିଷ୍ପତ୍ତି ନେଇଛନ୍ତି ଯେ, କରୋନାର ଦ୍ୱିତୀୟ ବୁଷ୍ଟର ଡୋଜ୍ ଦେବା ପାଇଁ କୌଣସି ଯୋଜନା ନାହିଁ। କାରଣ ନାଗରିକଙ୍କ ଶରୀରରେ ପର୍ଯ୍ୟାପ୍ତ ପରିମାଣର ଆଣ୍ଟିବଡି ରହିଛି। ଏନେଇ ମଙ୍ଗଳବାର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
