ନୂଆଦିଲ୍ଲୀ,୧୬।୭: ଭାରତ-ଇଂଲଣ୍ଡ ମଧ୍ୟରେ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଆରମ୍ଭ ହୋଇ ନ ଥିବା ବେଳେ ଟିମ୍ ଇଣ୍ଡିଆର ୨ଜଣ ସଦସ୍ୟ କୋଭିଡ୍ ପଜିଟିଭ୍ ଚିହ୍ନଟ ହୋଇଛନ୍ତି। ଉଇକେଟକିପର ବ୍ୟାଟ୍ସମ୍ୟାନ୍ ରିଷଭ ପନ୍ତଙ୍କ ପରେ କୋଚିଂ ଷ୍ଟାଫ୍ ଧ୍ୟାନଚାନ୍ଦ ଗରାନି ମଧ୍ୟ କରୋନାରେ ସଂକ୍ରମିତ ହୋଇଛନ୍ତି। ସେମାନଙ୍କ ସମ୍ପର୍କରେ ଆସିଥିବା ଯୋଗୁ ରିଦ୍ଧିମାନ ଶାହା, ଅଭିମନ୍ୟୁ ଈଶ୍ୱରନ୍ ଏବଂ ବୋଲିଂ କୋଚ୍ ଭରତ ଅରୁଣ ଏବେ ଆଇସୋଲେଶନରେ। ଏଭଳି ଚିନ୍ତାଜନକ ପରିସ୍ଥିତିରେ ବିସିସିଆଇ ବିକଳ୍ପ ପାଇଁ ଖେଳାଳିଙ୍କୁ ଇଲଂଣ୍ଡକୁ ପଠାଇବାକୁ ମନା କରିଦେଇଛି।
ଇଂଲଣ୍ଡକୁ ୨୦ ସଦସ୍ୟ ବିଶିଷ୍ଟ ଭାରତୀୟ ଟିମ୍ ପଠାଯାଇଛି। ଏଥିସହ ୪ ଖେଳାଳି ଷ୍ଟାଣ୍ଡବାଇରେ ଅଛନ୍ତି। ଯଦି କିଛି ହେଲା ତେବେ ରିଜର୍ଭ ଥିବା ଖେଳାଳିଙ୍କୁ ପ୍ରମୁଖ ଟିମ୍ରେ ସାମିଲ କରାଯିବ ବୋଲି ଯୋଜନା କରାଯାଇଥିଲା। ସମସ୍ତ ବିଭାଗରେ ବିକଳ୍ପ ଖେଳାଳି ଥିବାରୁ ଆବଶ୍ୟକତା ପଡ଼ିବ ନାହିଁ ବୋଲି ବିସିସିଆଇ କହିଛି।
ପୂର୍ବରୁ ଶୁଭମନ ଗିଲ ଆହତ ହେବା ପରେ ଭାରତୀୟ ଟିମ୍ରେ ବିକଳ୍ପର ଆବଶ୍ୟକତା ପଡ଼ିଥିଲା। ପୃଥ୍ବୀ ଶ ଏବଂ ଦେବଦତ୍ତ ପଡିକ୍କଲଙ୍କୁ ତାଙ୍କ ସ୍ଥାନରେ ପଠାଇବା ଲାଗି ଚର୍ଚ୍ଚା ହୋଇଥିଲା। ହେଲେ ଚୟନକର୍ତ୍ତା ଏହାକୁ ଗ୍ରହଣ କରି ନ ଥିଲେ। ଯେଉଁ ଖେଳାଳି ଅଛନ୍ତି, ସେମାନଙ୍କୁ ହିଁ ଖେଳାଯାଉ ବୋଲି କହିଥିଲେ। ଏଣୁ ଗିଲଙ୍କ ସ୍ଥାନରେ ଈଶ୍ୱରନ୍ଙ୍କୁ ସାମିଲ କରାଯାଉ ବୋଲି ନିଷ୍ପତ୍ତି ନିଆଯାଇଥିବା ଜଣାପଡ଼ିଛି।
