ନୂଆଦିଲ୍ଲୀ,୫।୬: ରିଜର୍ଭ ବ୍ୟାଙ୍କ ଗଭର୍ନର ସଞ୍ଜୟ ମାଲହୋତ୍ରାଙ୍କ ନେତୃତ୍ୱରେ ତିନି ଦିନ ଧରି ଚାଲିଥିବା ମନିଟାରୀ ପଲିସି କମିଟି (MPC) ବୈଠକ ପରେ ରେପୋ ରେଟ୍ ଉପରେ ବଡ଼ ନିଷ୍ପତ୍ତି ଆସିଯାଇଛି। ଆରବିଆଇ ସୁଧ ହାରରେ କୌଣସି ପରିବର୍ତ୍ତନ କରିନାହିଁ ଏବଂ ଏହାକୁ ୫.୨୫ ପ୍ରତିଶତରେ ଅପରିବର୍ତ୍ତିତ ରଖିଛି। ରିଜର୍ଭ ବ୍ୟାଙ୍କ ଗତ ଏକ ବର୍ଷ ମଧ୍ୟରେ ରେପୋ ରେଟ୍ ପ୍ରାୟ ୧.୨୫ ପ୍ରତିଶତ ପର୍ଯ୍ୟନ୍ତ ହ୍ରାସ କରିସାରିଛି, କିନ୍ତୁ ଗତ କିଛି ବୈଠକରେ ରେପୋ ରେଟ୍ରେ କୌଣସି ପରିବର୍ତ୍ତନ କରାଯାଇ ନାହିଁ। କେନ୍ଦ୍ରୀୟ ବ୍ୟାଙ୍କ ନିଜର ଆଭିମୁଖ୍ୟ ମଧ୍ୟ ‘ନ୍ୟୁଟ୍ରାଲ’ (Neutral) ରଖିଛି।
ଗତ ବର୍ଷ (ଜାନୁଆରୀ ୨୦୨୫ରୁ ଆଜି ଜୁନ ୨୦୨୬ ପର୍ଯ୍ୟନ୍ତ) ଭାରତୀୟ ରିଜର୍ଭ ବ୍ୟାଙ୍କ (RBI) ରେପୋ ରେଟ୍ରେ ମୋଟ ୪ ଥର ପରିବର୍ତ୍ତନ କରିଛି। ଏହି ସମୟ ମଧ୍ୟରେ ସୁଧ ହାରକୁ ୬.୫୦% ରୁ ହ୍ରାସ କରାଯାଇ ୫.୨୫% କୁ ଅଣାଯାଇଛି, ଯାହାଦ୍ୱାରା ମୋଟ ଉପରେ ୧.୨୫% (୧୨୫ ବେସିସ ପଏଣ୍ଟ)ର ଏକ ବଡ଼ ଆଶ୍ୱସ୍ତି ମିଳିଛି। ଏହି ସମୟ ମଧ୍ୟରେ ପ୍ରଥମେ ଫେବୃଆରୀ ୨୦୨୫ରେ ରେପୋ ରେଟ୍ରେ ୦.୨୫ ପ୍ରତିଶତର ପ୍ରଥମ ହ୍ରାସ କରାଯାଇଥିଲା। ତା’ପରେ ଏପ୍ରିଲ ମାସରେ ମଧ୍ୟ ୦.୨% ହାର କମାଯାଇଥିଲା। ଗତ ବର୍ଷ ଜୁନ ମାସରେ ୦.୫୦% (୦.୫୦ ପ୍ରତିଶତ) ର ଏକ ବଡ଼ ହ୍ରାସ କରାଯାଇଥିଲା। ଏହାପରେ ଡିସେମ୍ବରରେ ଆଉ ୦.୨୫ ପ୍ରତିଶତ ହ୍ରାସ କରାଯାଇଥିଲା। ଏହି ବର୍ଷ ଫେବୃଆରୀରେ ଅନୁଷ୍ଠିତ ବୈଠକରେ ସୁଧ ହାରରେ କୌଣସି ପରିବର୍ତ୍ତନ କରାଯାଇ ନଥିଲା।
ଲୋନ EMI ରେ ହ୍ରାସ- ଗତ ବର୍ଷ ଆରମ୍ଭ (୬.୫୦%) ତୁଳନାରେ ଆଜି (୫.୨୫%) ସୁଧ ହାର ବହୁତ କମ ରହିଛି। ଏଭଳି ପରିସ୍ଥିତିରେ, ଯେଉଁମାନେ ଫ୍ଲୋଟିଂ ରେଟ (floating rate) ରେ ହୋମ ଲୋନ୍ ନେଇଛନ୍ତି, ସେମାନଙ୍କ EMI ଗତ ବର୍ଷ ତୁଳନାରେ ବେଶ କମିଯାଇଛି।
FD ସୁଧ ହାରରେ ହ୍ରାସ- ଗତ ବର୍ଷ ଯେତେବେଳେ ରେପୋ ରେଟ୍ ଅଧିକ ଥିଲା, ସେତେବେଳେ ବ୍ୟାଙ୍କଗୁଡ଼ିକ ଫିକ୍ସଡ ଡିପୋଜିଟ (FD) ଉପରେ ଚମତ୍କାର ରିଟର୍ନ ଦେଇଥିଲେ। ବର୍ଷ ଶେଷ ସୁଦ୍ଧା କ୍ରମାଗତ ଭାବେ ହ୍ରାସ ପାଇବା ପରେ ବ୍ୟାଙ୍କଗୁଡ଼ିକ FD ସୁଧ ହାରରେ କମି କରିଛନ୍ତି।
